Über uns

Bebbi Bängg - gegründet am 1.11.1995 (Linde, Glaibasel)

1995, im Restaurant Linde
Dasch s Joohr, wo d Bebbi Bängg sich grinde
Vo dr BSG frisch separiert
(dr Friide isch lengscht repariert)
gänn is unseri Grindigsvätter
- allisamt Schnitzelbangg Verdrätter -
klaari Reegle, frey vo Staddudde
oohni HR Yydraag und Voorstandsknudde
Wobyy…drotz flacher Hirarchyy
Dr Bresidänt daarf z ooberscht syy!

Eb „iiber“ oder „über“, mir gseehn das bragmaatisch
sinn weder fanaatisch, no dogmaatisch
Elitäär simmer nit, und dien s au vermyyde
dass mer de Fründe s Fuetter nyyde

Traditioon isch is wichtig, aber drotzdämm gäärn
geehmer au mit dr Zyt und blyybe modäärn
Als Familieverbund vo Individualischte,
Hiirnaggrobaate und Gsangsaartischte
simmer handwäärgglig mee unkonventionell als biider
Aber immer e Gmeinschaft – als Egomaan bisch is z wiider

Und so blybt is allne dr toll Zwägg zer Pflääg
vo dr Faasnacht - de drey scheenschte Dääg !!!

Wotsch bi de Bebbi Bängg ko bänggle?

Hättisch Inträsse bi de Bebbi Bängg go singe?
Denn mäld di per Email () bi uns.