Schlyychwäärbig 2019

Menü:
»Schlyychwäärbig
»2024
»2023
»2020
»2019
»2018
»2017

	Yylauff, Yyglemmts, Yydritt, Yystoo und Yybrächer, E-Sport, E-Bike, E-Book pfyyft s nei vo allne Dächer! Nur ai «Yy» isch drnääbe und macht is wiirgglig wee: Es kunnt us Bäärn, goot uff e Sagg und het am Änd e B!
	Am Baarfi wirsch verschlaage, bim Minschter wirsch no ginggt! Am Claara goot s dr an dr Graage, an dr Mäss wirsch denn no glinggt! Joo, Baasel haig e Gwaltbrobleem und drotzdäm gangi uuse: Dehaime miessti, s isch extreem, mit dr Alte schmuuse.
	An dr Formel-E in Ziiri dien uns d Piloote laid! Mit Raasemaaier Renne faare, macht bestimmt kai Fraid. Und s Schlimmschti bi däm Hottere, fir d Faarer, s isch zem Gruuse: egaal wie schnäll ass d faare duesch, kunnsch nie us Ziiri uuse!
	Als Wältkulduur sin miir als Bangg die Väärs go präsentiere. Z fimpfte sin mer midenand, go d Woored zelebriere. Vo Island bis Südafrika isch nie ebbis basiert. Hänn denn d Saudis uff dr Lischte ghaa, jetzt singe mir no z viert!
	E Mami goot in Groosse Root, s gheit alles us em Loot. Dr Root dää gseet graad root, bis dä Binggis wiider goot. Unsre Root, du glai Chaot, due no biztli waarte. In vier, fimpf Joor isch s noonig z spoot fir in richtig Kindergaarte.
	Es isch halt woor, dää Bangg kaasch immer singe … Es kunnt ächt jedes Joor, drumm diemer s wiider bringe. Es wäär zwoor daasmol scheen, mir kennte driber schwiige, doch d Granggekasseprämie stiige, stiige, stiige …
	Schoggi, die macht gliggig, daas waiss jo jedes Kind. Mit Endophin im Hirni hausch kaim ains an dr Grind. Toblerone git s jetz halal, dr fäärni Oschte schreit: Juhee! Numme bi de Saudis griegsch kaschoggi me.
	Leesli, kauffet Leesli, riefts bim Daame-FCB. Statt Cüpli in de Gleesli, het s Sandwich z frässe gee. Leesli, kauffet Leesli, dr Schnäller isch dr Gschwinder d Niete schteen scho uff em Fäld und dr Hauptbryys isch e Inder.
	D Witwe Meier ganz ellai, het z Nacht e Grysch vernoo. Drum lyttet si de Schugger aa, die miesse sofort koo. Dr Schugger sait zer Meiere: «Jetzt mien si staargg syy und guet loose. Hilf kunnt erscht in 15 Stund, dr Tesla steggt no an dr Doose.»
	Dr Toni Brunner nimmt dr Huet und maint, yy haa s jetz gsee! E sone gscheit Entscheid, daas hättsch däm gaar nie gee. Bim Wessels doo kaasch Gift druff nää, dää goot sicher noni. Im Umkeerschluss bedyttet daas, dää isch dimmer als dr Toni.
	Si schwänze d Schuel und geen uff d Strooss fir e besser Glyyma. Macht daas jede, s wäär famos, denn giecht s däm Glyyma wiider prima! Gege d Äärderwäärmig «s bescht Rezäpt», maint dr Trump und jetze spinnt er, «Isch immerno ganz radikaal e nukleaare Winter.»
	Kunnsch zrugg vom Wald, denn hesch bestimmt e riise Zägg am Ranze. Die Vyycher sin glyych unnutz, wie sone gruusigi Schtinggwanze. Es näärve Wäschpi, Mugge, Bräme, Flöö und Silberfisch, Doch alles numme halb so schlimm, solang s kai Schwoobekääfer isch.