Bebbi BänggBasler Schnitzelbägg |
|
Schlyychwäärbig 2020
D'Fäärs mit Helge vo de Schlyychwäärbig kasch uff http://www.birsfaelder.li/ aaluege.
S Glyyma macht is Soorge, au miir mien reagiere!
Es bringt jo nyt, sich aifach, mit däm Wandel z arrangiere.
Mir staarte moorn am moorge, leen dr SUV loo stoo
Und kauffe drum, well s wäärmer wird, halt e Cabrio!
Mit de Teenies isch s hit soon e Sach, d Erzieig s grossi Theema.
D Dochter straiggt und rebelliert, basst nit in unser Scheema.
Am Zääni muess si jetz ins Bett, die Reegle isch dr Hit!
An d Zyt duet si sich halte, nur d Adrässe, die stimmt nit …
2020 s goot em an dr Graage, mi Frau mit schaidig droot
2020 s schloot em uff e Maage, wel si droot und denn nit goot.
2020 mit däm Drache, und drotzdäm wird s famos:
Y bii zwor nit mi Drache, drfyr denn dr Wessels loos!
Dr Bappe, dä sait nai, em Goof duet daas grad wee.
Drum frogt me halt schnäll d Mamme, villicht findet s die okee.
Bim Ozeanium, doo gseet s äänlig uss, miir finde s allerhand!
Baasel isch dr Bappe und d Mamme Baaselland.
Dää Duurm do, maint mi Soon, dää stiechi doch in Rom.
Und s Baasler Minschter, s isch e Hoon, sig vo Mailand jo dr Dom.
Geographie, maint är, isch mee als dumm, doch mache mr kai Gschyss.
Wenn s nit längt zum Studium, wird är Pilot bi Patrouille Suisse.
E veielette Frytig, kai Frau goot me go schaffe.
Kaasch s lääse in der Zytig, jetz isch Straigge iri Waffe.
Die Gritte hogge sich voor s Dram, steere dr Verkeer bis nooch de zääne.
Viil liichter wääris doch dehaim; Sorry Schatz, y haa d Migrääne!
Dr Meyer vo dr SBB, dää goot, bevor s‘ en schigge.
Villicht kaa jo dr neu Chef mee, zem Bispiil Diire fligge.
Vergässe wird dää sicher nit, mir finde s no dr Waan.
Sini Memoire sin scho jetz dr Hit, si haisse: «Globi bei der Bahn».
Die ainte wette d Summerzyt, die andre Status quo.
Die Dritte finde d Winterzyt miesst me sicher loo.
Waas sell die ganz Debatte, mir saage; sig s wie s well.
Miir woone bim Rocheturm im Schatte – dert isch sowiso nie hell!
Iiber Kunscht loot sich nit strytte, daas zaigt doo die Banaane.
Duesch mit dr Moode rytte und glääbsch se neimen aane.
Hundertzwanzigtausig fir e Banaane, wo glii stinggt!
Drum wurd is jetz no Wunder nää, waas die alti Zwätschge Merkel bringt.
Wie sälle doo im Internet han y e Rhysprung welle mache.
Drissig Santimeeter z kurz – im Spidaal bin y verwache!
Und d Moraal vo dääre Gschicht – au wenn y s als Maa nit woor will haa:
Schlussamänd kunnt s drotzdäm halt nur uff d Lengi aa.
D Nochfroog glay und es laufft nyt, denn zaalsch nit son e Huffe.
Nochfroog gross und viili Lyt, denn geen die Priisen uffe!
Dynamisch Prising nennt sich daas, d Faasnacht zaigt weis funktioniert
S wird fir e Stiggli Waaie, dr halbi Moonedslohn kassiert.
Wälder brenne, s isch e Saich und in dr Seel duet s wee!
Kirchedächer, Huusgebälgg: hesch sen uff immer gsee …
D Nôtre Dame isch gligglig grettet, dr Schwaarzi Bäären au.
Drum Ziircher, wenn dää Schneemaa brennt, denn intressiert s kai Sau!
Mit Ässe spiilt me nit, hänn mir als Goofe gleert bikoo.
Dr Däller isst men uss und loot kai Räscht lo stoo!
Foodwaste isch e Schand, daas isch wirklig nit dr Hit,
Aaber Ziiri-Gschnätzlets friss y aifach nit.