Bebbi BänggBasler Schnitzelbägg |
|
Schlyychwäärbig 2025
Mit em Zytgaischt wott my Dochter goo. Doch yy haa dr Verdaacht:
Mit Queer- oder Diväärs-Syy het si e Duurenander gmacht.
Noochem stundelang erglääre, haan yych s denn langsaam satt.
Jetz het si halt diväärsi Frinde und schlooft sich gweer dur d Stadt.
E billigs Kuchigräät, daas bruuch y, haa s graad bi Temu bstellt.
Statt e Phäggli het dr Böschtler e «Frau Li Wang» voor d Diire gstellt.
Dass dää Handel soo daarf meeglig syy, daas duet mi seer belaschte.
Y muess si retuurniere, die het kai Blatz im Kaschte!
Sii leen mi scho in Graaben aabe, bi scho glyy im Himmel oobe.
Doo kunnt my Alti aanezdraabe, denn hän s mi wiider uffezooge.
Sii sait, dr Bund haig sich verzellt und macht e Mordsradau:
«Stäärbe kaasch au speeter no, zerscht beziesch dy dryzäänt AHV!»
Wäägem Glyyma wänn die Griene unsri Staigäärte verbiete.
My Noochber understitzt daas voll und fangt bi sich scho aafoo wiete.
Schreit, y sigg e Glyymasinder, my Reaggzioon druff isch fataal.
Y haa die Stai au ussegnoo – und äär liggt im Spidaal …
Schoggi, die macht gligglig, daas waiss joo jedes Kind.
Mit Endorphin im Hirni, hausch kaim ains an dr Grind.
Dubai-Schoggi kennt e Leesig si, es wäär drum nit vermässe,
Wenn die im noochen Oschte iiri Schoggi sälber frässe.
Zwai Millioone fir baar Sunneschiirm – daas isch mee als iiberrisse!
Het s dr Regierig z Baasel diräggt ins Hiirni … dropft?
Miir hän s bro Bebbi noochezellt, mit 195 Schiirm duet daas nit batte,
I woon drum lieber bi dr Roche und haa dr ganz Taag Schatte!
«Mami, isch daas Nemo e Maa ooder e Frau?»
D Mamme luegt dr Bappen aa, und dää frogt sich daas au!
Sy kindgerächt Ergläärig, au wenn die nit verhebt:
«Stell diir e Daamevelo vor, won e Ständer het.»
D Schlacht uff em St. Jakob, die isch in d Gschicht iigange.
Tausig stolzi Aidginosse sin deert untergange.
Trotz Hellebaarde, Moorgestäärn het me se bezwunge.
Am Schluss sin alli mausedoot – aaber – immerhin het kaine gsunge!
Wenn yych mool zu de Schwoobe gang, bring y en Escort-Daame hai.
Wenn y s bitter neetig haa, denn sin s au scho mool zwai.
Bevoor dää Väärs jetz schlipfrig wird, dien miir doo gscheiter stoppe!
Y bruuch die baide Daame nur, wenn y zollfrei will go shoppe.
Olympiaade in Paris – und d Journalischte finde s miis:
Me waiss nit, boxt doo aine – oder aini, daas isch fiis!
Die halb Wält isch empeert, doch miir finde s banaal:
Well, wenn de ains an d Schnurre griegsch, isch dr s Gschlächt egaal.
«Am Anfang war das Feuer», saagen ämmel d Atheischte,
Lut Chrischten isch dr Adam mit em Evi zerscht in d Kischte.
Miir Baasler wisse s besser und behaupte rigoroos:
Z allererscht isch d Baustell gsi an dr Clarastrooss!
Worum rennt men am Stadtlauff mit? Miir kenne s nit kabiere,
Koschtet 36 Stutz und muesch au no bressiere.
Seggle kenntsch au graatis haa, miir gseen daas ganz bragmaatisch:
Gang z Nacht mol in Dreiroose-Park – und scho rennsch automaatisch!
Homeoffice und Flexoffice – au bim Staat wool glii passée!
Jetz muess y wiider dusche, me wott mi halt im Byyroo gsee.
Drum haisst s jetz zrugg an Arbetsblatz, y find s nit mol so doof.
Soo kumm y deerte wiider mol, uff achtehalb Stund Schloof.
Linggs gang y go wääle, draag Dransparänt am erschte Mai.
Alles linggs vor Mitti isch myys bolytische Dehai.
Doo gseen y dr Trömp im Fäärnsee, vo syym linggen Oor dropft Bluet.
Doo dänggi s allererschti Mool, e Bitz mee rächts wäär au no guet!