Dr Uffgweggt 2015

Menü:
»Dr Uffgweggt
»2015
»2014

Froggsch mi wieso, singsch du jetzt do und zeigsch kai Helge
waisch: Ych ha Schiss, s klappret s Gebiss wie luggi Felge
ych zeichne nyt und mool au nyt, bi doch nit doof
uff Karikature droht jetzt nämmlig d Todesstroof
Doch sich yyschiichtre loo, das wär au bitter
drum sing ych ab jetzt mit Helge wytter

Griegsch Jod-Tablette, was zur Not di rette tät
Im ne Fall vo schlimmer Radio-Aktivität
Doch luegsch: Dschungelcamp, Bachelor, Schawinski, Frauentausch....denn merksch immer
Färnseh-Aktivität isch no vill schlimmer
Isch ächt die Färnseh-Aktivität so schlimm, villicht,
dass d Cornelia Boesch grad zämmebricht?

(Melodie: Dr Ferdinand isch gstorbe)
Ou s Elsass wird gly gstorbe, oje, oje, oje
S Elsass wird gly gstorbe, das duet mer hütt scho weh
Äs, wo so vill het gworbe, um Arbet in Tout Bale
S Elsass wird gly gstorbe, das isch brutal.

Wie oft bisch doch go ässe, in s Elsass irgendwo
Bisch im ne Beizli gsässe und hesch e Wyyli gno
Häsch Süüchrüüt yyne biige, di Buch hets nit verdrait
Und sitthär weisch au du, wieso me Shit-storm sait

Mit andere Regione wird s Elsass zämmegschweisst
S könnt si, dass denn di Zone wäg em Preesi Holland heisst
Me sait em Flammeküeche halt nur no tarte de feu
und woorschyyns wird dr Waggis denn zum Depardieu

Es frässe Reh statt Klee, bim Hörnli Gräber kahl
Vill Lütt, die klage, wänn se jaage ganz brutal
Ich find die Reh darfsch nit verschyyche, die muesch schone
Will villicht sin das jo Reh-Inkarnatione
Duet ein e sone härzig Tier exekutiere
Wird ich das sofort wieder reh-animiere

Dr Fedrer gwinnt und gwinnt und gwinnt, dä gueti Ma,
verliert är moll, findt ärs nit toll, denn gurkts en a
„My letscht Satz, e Katastrophe“, gheersch en klaage
Dass könntsch bi jedem zweite Satz vom Morin saage
Schampar stark schloot dr Rodscher uff, dasch woor
Und au mi Krankekasse macht das jedes Joor

Dr Roche-Turm spriest und schiesst bis zu de Wolke gly
Luegsch näbdra dr Mässturm a, denn wirggt dä chly
Vo wage Höheunterschied kasch gly moll denne
Der Mässturm Euro und dr Rocheturm Frangge nenne
”Muess mi Wolgge uffgee, schimpft Gott, nur d Entscheidig macht mer Mieh
Soll ich zu Zeus, zu Krishna, Allah oder Budda zieh?”

Bi villne Lytt isch dyttlig s Hirn im Schäädel oobe
Bi Bodybuilder ischs in Biizeps abe schoobe
Es isch bi Schutter in de Bei und, es isch hart
Bim Dschihadischt ischs glaub im sim zerzauste Bart
Was eine glaubt isch mir egal, nur, s isch doch wohr
Do fählts, beim Barte des Propheten, an Humor!

Kyybelwyys sich Yys lo leere ibre Kopf
macht zwar kei Sinn, doch das isch inn bi Promis, gopf!
Dr Eric Wäber, so wie dä sich muess bewyyse
wurdsch glaub besser grad vo Kopf bis Fuess veryyse
Was dä als uselosst, das gseehn die meischte yy
Isch vill vercheerter no als s Merlin-Schiff im Rhy

Die Basler Fasenacht, ja, die ist einfach Spitze.
Da gibt’s Musik und in den Kneipen singt man Witze.
Diesen Vers da hab ich öppen nicht gestohlen.
Nein, den bin ich günstig mit dem Tram go holen.
Kunnt dr 8er zrugg vo Weil, ghörsch d Trämmler klaage
Wurdsch däm statt Trämmli besser Gieterwaage saage

He du, ich kenn ganz sicher mee und tölleri Määrli.
Jä und? Drfür griegsch halt vo mir kein Gummibäärli.
Dasch mir doch glyych, ich ha jo sälber ganz vyyl Dääfeli.
Aber du, du brünzlisch immer näbe s Hääfeli.
Was? Ich ka zelle und gang ganz elei uf s Töpfli.
Hör jetzt uf, sunscht hau dr s Schyyfeli uf s Köpfli.
Jä, so döönts halt ab und zue emol im Kindsgi
- und so döönts au in dr Talk-Show vom Schawinski.
S schwätzt dä Schawinsky ständig dry, de het kei Stil
Do miend eim d Hoor jo z Berg stoo wie em Thiel

Ou nei, im Mai, wählt me dr Fifa-Preesidänt.
Dr Sepp Blatter fürchtet gar kei Konkurränt.
„S het kein e Chance gege mi“, meint är nur troche,
„schliesslig hani alli jo scho lang be ... stimmt überzügt durch mini Leischtige
S allerwichtigste, betont dä FIFA-Bolle
Isch nit das d Bäll, sondern das d Rubel rolle

S hän d Grieche gwählt, druff stöhnts gequält im Euro-Land
D Merkel froggt ganz ploggt: „Wieso nur? S isch e Schand!“
Ä Psychiater sait ere si Diagnose:
“D Grieche hän halt ganz e schrecklichi ---- Eurose!”
Ein vo dr SVP luegts fascht als Gottesgoob a,
Rieft: “Uff Europa, Judihui, reimt sich s Wort Faux-pas!!”

“Me het is trennt,” so flennt dr schwarzi Baselstab,
“Unsri Romanze, me verbannt se grad ins Grab!
Doch d Wahl im Baselbiet, die änderet das grad
Die wänn kei Rote me, drum kumm zu mir in d Stadt
Was isch schlimm dra, wenn die Roote dien regiere?
S dien alli andre au nur roote bim regiere!

Quelle: Youtube Kanal der Tageswoche