Dr Uffgweggt 2014

Menü:
»Dr Uffgweggt
»2015
»2014

Wottsch das see: Ä BVB-Diräggder blutt?
Doch nit drumm schiggt me dä Dummling frischtlos futt
Nai, will dr Strytt mit dr BLT nur drum ussbricht
Will stuur äär dää will syy , wo d Margrethe sticht
Dr Grund, ass d Aazaigetafele gschpunne haige:
Si hänn d Bildli vo dämm Typ nit welle zaige

Bisch total blind, wirsch hitt als Kind scho integriert
Me setzt di glyy denn neume yy, wo s funktioniert
Und all die Massnahme dien scho so guet griffe,
ass me e Blinde losst e Championsleague-Match pfyffe
S isch nach dämm Match dää Schyyri unter grossem Flueche
Im ganze Stadion syyni Linse go sueche

S bediene gopf us jedem Topf, es isch e Schand,
sich wie blööd d Regierigsrööt vom Baselland
Me sott ne alles kiirze, sogar, wenn das goot,
im Titel s Re, denn haisst so ain Gierig-sRoot
Bim Wüethrich wundret aim am maischte bi dämm Ganze:
Syy hohli Hand het me Voluume als syy Ranze

Ä Super-Hirn hesch in dr Stirn als Schnitzelbangg
Nur sott ych Nämme zämme stämme, macht s mi grangg
Weiss nimm, s isch schlimm, wie haisst nur dää Regierigsroot
Wo Continuirligg d Conti-Contingänt umgoot
Goots ums Gäld yysagge, denn sind laider, ja Mann,
nit moll d Bundesrööt uss em Schneider..........Amman

S wänn die z Ziri doch für ihri Tschutti-Giele
Kai Stadionbau me zaale, au wenn die mien briele
Wer e Beweegigsdrang sott haa in deere Stadt
Dä weiss, daas findet numme no in Boxe statt
Nur mach döört inne denne nit e z grosses Gschrey
störsch in dr Boxe nääbedraa sunscht d Polizey

Hogg ganz schnäll ab, dr Blatz isch knapp im Zug efang
Jetzt fiert me glyy scho Steehblätz yy und s goot nimm lang
kunnt die neggscht Errungeschaft und me darf denne
zum ermässigte Pryys em Zug noochrenne
Kunnsch em Zuug nimm noch und nitzt kai Schreye
Losch halt em Baschi Dürr si Schrillalarm lo gheye

Aini hätschle, andri tätschle, uffgreggt gurre
Mit ainre schmuuse, Griff an Buuse, Blödsinn schnurre.
Als neggschte Bachelor, scho zittrig in de Hoose,
Bewirbt sich schyyns dr Presidänt vo dä Franzoose
Z Italie gitts die Sändig au, die heisst syt Joore
Dört : Il bacio-bacio-bunga-bungalore

Es gitt kai Wändi, ooni Ändi brrrrmmst myy Händy
Mir fallt kai Gländ yy, wo n ych nit fändi, ou jetzt sändi
Und waiss y nümm, was y gescht gschriibe ha, okay,
denne froog y halt ganz eifach d NSA
Gheert dr Obama d Merkel moll extatisch stööne,
wird är sich das haimlig loose scho abgwööne

Myy Sohn isch z digg, das sig nit schigg und au nit gsund
Nur wieso isch dä eso erstuunlig rund?
Är spiilt doch Tennis Fuess- und Handball ooni Rue
Und klappt erscht z Oobe spoot erschöpft dr Laptop zue!!
Natürlich tschogg y, sait verläge är und lyys
D Schoggy die verdrugg y tafelwyys

„Der Bestatter“ luegt dr Vatter, s Kind und d Frau
De Mike Müller sig e Knüller, haissts jo au
Drumm duet dr Blocher jetzte nach de Waale praale:
„Ych bi dr Bestatter vo de Bilaterale!“
E zwaite Gotthard-Dunnel wurdi vyyli stööre
Doch no schlimmer wär e zwaiti Blocher-Rööre