Bebbi BänggBasler Schnitzelbägg |
|
Bangg Rott 2014
Gäld? - Han ych scho lang kains mee,
e Loch isch in mym Bortmenee.
Ych glaub, ass ych saage sott,
mir zwai Bänggler sind Bangg-Rott.
D Italos sind ändlig ooni
Bunga Bunga Berlusconi.
Dr Drämmli-Chef empfääl ych seer,
au dä het Aahnig vom Verkehr!
Dääge-Zyklus, - Teil I
Das isch jetze voll dernääbe,
dr Murat Yakin bringt dr Dääge.
Jetz dribblet äär grad aine uss
und au dr Neggschti losst äär uss
und jetze schiesst äär s erschte Gool
und s zwaite Gool - und s dritte Gool.
„Fertig“ - rieft dr Muri dryy:
„S Ainzeltraining isch verbyy!“
50 Prozänt, die stimme „Jo“,
glaubsch die sind au jetze do?
Sind das die do, s isch e Schand,
do am rächte Rand!
D Pisa-Studie macht yss Muet,
mir Schwyzer sind jetz subber guet!
Die Studie, ha ych gsee,
isch ooni d Wähler vo dr SVP!
Dääge-Zyklus - Teil II
Dr Yakin schwöört syy Mannschaft yy:
„Agressiv miend ihr hitt syy,
grätsche, kämpfe - au bi Rääge,
wie ‚11 Fründe’ – und zwai Dääge.“
(Melodie: Uff de schwäbsche Eisebahne)
Dr Simi Ammann, was hesch was gisch,
voll Gutzi richtig Schanzetisch
und fliegt, und fliegt .... dä gueti Maa!
Ych find mir mien kai Gripen ha!
Dää Gripen wäär denn unterwäggs,
vo 8 bis 12 und 2 bis 6,
am Frytig numme bis am drey
und am Wucheänd isch frey!
Dääge-Zyklus - Teil III
Es lyttet is dr Carlo aa,
syy Konti haig baar Fäähler ghaa!
Syy Ruggdritt isch kai Sääge,
besser fänd ych, s ginge d Dääge!
Dr Obama, unschyniert,
het my Händy observiert!
Jetz kennt är, s isch pervärs,
scho sit zää Daag unsri Värs!
Dääge-Zyklus - Teil III
Vier steen im Absaits – oder mee,
doch die Pfyffe hets nit gsee!
Dr Dääge scho, äär hett e Wuet,
vo dr Tribüne seet me s guet!
(Melodie: Grün, grün, grün, sind alle meine Kleider)
Schwarz, schwarz, schwarz sinn alli myni Konto
in dr Schwyz, vo dääne ych nüt waiss.
und däm Gäld, däm saage si döört Schwarzgäld,
will ych Alice Schwarzer haiss.
(Melodie: Dört ääne am Bärgli ...)
Mi Arzt isch e Ditsche, bim Türk kauf ych
Uss Ungarn my Begger, dr Griech bringt dr Wyy
Holeduli, Holeduli, Holeduli-duli-duli-o!
Dr Metzger vo Frankryych, e Bosnier faart Buss,
Uss Holland my Schlosser, my Bier bringt e Russ
Kroat isch dr Pöschtler, e Thai my Masseur
E Inder kocht s Ässe, e Schweed isch Monteur
D Strosse die wüscht ain, dä kunnt uss Tschaipur
und au d Ludmilla, die kunnt nit uss Chur
Holeduli, Holeduli, Holeduli-duli-duli-o!
Und hets denne wirgglig - kai Blatz me doo,
denn schaffe mir uss - Blocher und Co.
Dääge-Zyklus - Teil V
Chelsea hett, mi macht s veruggt,
em FCB dr Salah gmuggt!
Als Stroof mien die - vom FCB
no graatis baidi Dääge nee!
Miir zwai sind als Schnitzelbangg
Als Zentrumslaischtig annerkannt!
De Stedter saage mir jetz: „Dangge!“
D Landschäftler zaale jee zää Frangge!
(Melodie: Ich liebte ein Mädchen...., Ingo Insterburg)
Ych wäär au gäärn e Bätscheler,
so Fuudibagge-Dätscheler;
so Stryycheler vo Schiinli,
vo superscheene Bienli!
So blondi Tussi-Schmüüseler
mit haisse Schnittli-Pfüüseler
und so Häärzenssbrächer
und scharfi Püppli-Stächer!
Mit dr Anja isches cool,
so stundelang im Swimming-Pool.
Sexy-Paula uss Luzärn,
Erotic-Dance daas macht die gäärn.
E Tantra-Massage vo dr Ruth
die goot richtig unter d Hutt.
Mit dr schööne Dörte
ka me subber flöörte.
Ins Himmelbett zu jeeder Zytt
mit dr Dana uff e Ritt;
Beweglig wie e Schlange
d Vanessa an dr Stange;
D Olga die gitt Guzzi
bim spiile im Jaguzzi,
au mit alle andere
wurd ych gärn - go wandere
Und wetsch vo mir e Roose,
denn muesch mir -
Mir haue s jetzt - das isch e Gschängg,
gsunge hän mir alli Bängg,
Vom Wirt e Gschpritzte, das wär flott!
Mir zwai Bänggler sind Bangg-Rott.