Bebbi BänggBasler Schnitzelbägg |
|
Bangg Rott 2015
He, kasch mir finf Stutz leene?
Gäld? - Ha ych scho lang kains mee,
e Loch isch in mym Bortmenee.
Ych glaub, ass ych saage sott, mir zwai Bänggler sin Bangg-Rott.
E Spriichwoort sait wie Stadt und Land,
sitt Joore umgeen mitenand:
Dr Gschyyderi git noo
und s Baselbiet blybbt stoo!
D Ärzt hänn dr Wessels uff em Disch,
well sy Huftglängg lottrig isch.
Dodermit hets aimool mee,
e neyi Basler Baustell gee.
As dr Bebbi Sagg kasch iine due,
haissts Glabbe uff - und Glabbe zue.
Im Grosse Root duets anderscht goo,
Glabbe uff - Mischt uuse loo!
Fir die neggschte Waale, mien si loose,
s git die erschti Waal-Brognoose!
Dangg Stimmebschiss und kumuliere
wurd dr Eric Wääber fiehre.
Kasch es draie wie de witt,
d Ziircher meege d Basler nit!
Kasch bättle, bitte- au ganz fromm,
d NZZ, die will kai Somm!
Dr -minu maint: „Ihr miend nit lache,
ych will jetzt au e Selfie mache!“
Nur froog ych als technisch Dotteli,
wie macht me Panoramafotteli!
Im Summer hett bim FCB
dr Yann Sommer denn si Abschied gee.
Do sait dr Summer, ych schliess mi aa
- drumm hänn mir kai Summer gha!
Dr FCB isch organisiert,
alli Spieler sinn nummeriert,
und dr Sousa, isch guet draa,
will är d Uffstellige löösle kaa.
Uff WM-Platz zwai duet Argentinie stoo,
drei Holland, denn isch Brasilie koo.
Uns Schwiizer hett s nit glänggt
- dr Räscht hänn mir verdränggt!
Burkhalter, Staimaier und dr Käärry,
alli zömme geen uff d Fääri.
Dr Putin nit – är isch verschtimmt,
will dr Fäärimaa, kai Ruubel nimmt!
My Glaine lacht, winggt mit dr Hand,
fillt si Haafe bis zem Rand!
Är isch zfriede, stell ych fescht:
är fyyrt sy aige Haafefescht!
Am Zoll Otterbach bi Weil am Rhy,
faar ych wiider z Basel yy.
Frischflaisch? Froggt dr Zöllner doo.
So fräch muesch myn’re Frau nit koo!
Mir hänn trainiert, Daag fir Daag,
Salto, Fliggflagg, Yyberschlaag,
Kopfstand, rolle uff em Fass!
Jetzt macht me Schluss mit „Wetten Dass“!
E Lööli und e blööde Siech, e Glünggi und e Stürmi,
händ letschti do so Grach gha, e riesegrosses Gschtürm gsi,
dr blöödi Siech zum Lööli sait, äär syg e blööde Siech
und dää hett gsait: lägg mir doch - was au nid jede miech!
Druff aabe hett dr dummi Siech em andre gsait: du Lööli!
Dr Lööli denn zem blööde Siech: „du woonsch doch in re Höhli“!
Dr blöödi Siech aeit denne: du schnuursch doch numme Saich.
Dr anderi druff aabe: „du bisch doch birewaich“.
Jetze wird dää aber suur: „du bisch e dumme Schnuuri“,
„Und du e grosses Arschloch, glaine Boodesuuri“
„Wenn du s Muul denn uffmachsch, kunnt doch numme Drägg“,
„Di sott me doch verquätsche, du wiiderlige Zägg“!
Das wäär no Joor so wyttergange, wie sich die beschimpfe,
geg’ so e Schrott im Fäärnseh, sottsch di kenne impfe!
Welle isch dr Lööli, welles Arschloch, froog doch nit so vyyl
Vo mir uss Baidi baides: Schawinski und dr Thiel!
Mir zwai sind als Schnitzelbangg,
als "Zentrumslaischtig" anerkannt!
De Stedter saage mir jetz: "Dangge",
d Landschäftler zaale je zää Frangge!
Mir haue s jetzt – das isch e Gschängg,
gsunge hän mir alli Bängg,
Vom Wirt e Gschpritzte, das wär flott!
Mir zwai Bänggler sind Bangg-Rott!