Bebbi Bängg

• Menü:
• »Bangg Rott
• »2023
• »2021
• »2020
• »2019
• »2018
• »2017
• »2016
• »2015
• »2014

Bangg Rott 2016

He, kasch mir finf Stutz leene?
Gäld? - Ha ych scho lang kains mee,
e Loch isch in mym Bortmenee.
Ych glaub, ass ych saage sott, mir zwai Bänggler sin Bangg-Rott.

Miir Bangg-Rott? Bisch bsoffe?
S Mammi sufft, dr Fötus isch blau,
daas gitt blöödi Kinder – ganz genau!
Und wenn si gross sind, kasch si seeh:
Me trifft si in dr SVP!

Vitus Huonder, Bischoff vo Chur,
maag Schwuuli nit, do isch äär stuur
Waas isch bim Vitus denn schieff gloffe?
Vyylicht - het si Mami gsoffe?

In dr Bible, schyyns do stoot,
d Stroof für Homos sygg dr Tod.
Gillt das au für Pädophyyli,
gäbs vo de Gaischtlige nimm so vyyli!

Bschysse, liege, unterschloo,
verseggle, schwindle, mitgooloo!
Zämmefassend: Josef Blatter,
nit nur d Mueter – au dr Vater!

Bombe-Terror in Paris!
So Type find ych eehrlig myys!
Und es macht mi au bedroffe -
will dämm sy Vater het nit gsoffe!

Verantwortig will schyyns d SVP
im Bundesroot jetz überneeh!
Dr Parmelin setzt Zaiche doo,
bringt Wysswyy mit zem Apero.

Du, wääge dere Bundesrootswahl - do hets vyyl Ungraimthaite und Unreegelmässigkaite gä!
Hesch rächt, vyyl Ungraimthaite und Unreegelmässigkaite!
Gwäählt isch doch dä Parmesan.
Verzell doch nit e soo e Kääs!
Immerhin besser als Broothärdöpfel.
Ah du meinsch dr Röschti!

(Melodie: Mir faahre mit dr SBB)
Im wunderscheene Aargau-Dorf Oberwil (Strich) Lieli,
hets ganz vyyli scheeni, rächti, dunggelbruuni Kiehli.
Si heisse Trudi, Elsi, Vreni und e baar au Reesi -
die bruunschti Kueh vo alle heisst: Glarner, Gmeinipräsi.
Myy Dochter stürmt: „Will in Coop goo,
will Disney-Bildli üüberkoo“!
„Jetz haa ych alli“, daas isch woor
und mir händ yykauft für drey Joor.

„Yyyyy ... do stinggts, was isch do loos?“
„Ych bis nit, s kunnt vo dr Stross!“
„Doch du stinggsch – du hesch kai Wäärt,
du hesch gfelschti Abgaaswäärt.“

Ych wett au gärn eso e Kaare,
wo gscheit isch und duet sälber faare!
Wo dr Wääg grad sälber suecht
und bi Stau au grad no fluecht!

Dr Donald Trömp duet jokere,
dr Putin duet gäärn pookere,
dr Johnny spiilt dr Depp
und d FIFA spiilt „Tschau Sepp“!

Basel-Stadt find, s wuurd sich loone
Und zaalt de Ländler 20 Millione.
Druff aabe maint e Typ uss Laufe:
„Do chasch jo grad e WM chaufe!“

Stell dir vor, dr Stephan Lichtsteiener und dr Xherdan Shakiri stöön nääbe enender bi dr Landeshymne.
Daas ka ych mir vorstelle!
Also ych wäär dr Shakiri, du dr Lichtsteiner:

Alkohol macht d Biire dumm,
wirsch apatisch, hesch kai Mumm!
„Kapier ych nit, isch nit normaal,
aaber s isch mir schyssegaal.“

Nommol zrugg zur SVP,
vo deene gits jetz immer mee!
Fascht e Drittel vo eych alle
sind em Alkohool verfalle!

Mir zwai sind als Schnitzelbangg,
als "Zentrumslaischtig" anerkannt!
De Stedter saage mir jetz: „Dangge!“
D Landschäftler zaale je zää Frangge!

Mir haue s jetzt – das isch e Gschängg,
gsunge hän mir alli Bängg,
Vom Wirt e Gschpritzte, das wär flott!
Mir zwai Bänggler sind Bangg-Rott!