Bebbi BänggBasler Schnitzelbägg |
|
Bangg Rott 2021
FCB, oh jee, oh jee!
Ych kaa die Schutterei nimm see.
Irgenwie bii ych gaanz froo,
daarf me nimm ins Stadion goo!
Dr Trump, dää vo Amerika,
dää leggt kai Schnuuremassge aa!
Ych verstand das neumeduure,
s git kai Massge fiir so grossi Schnuure.
Dr Elefant sait: wo, jo woo,
isch myy Massge aanekoo?
Dr Giraff druff: „mir isch oohni wool,
doo Oobe git s kai Aerosol.“
„Santi Niggi Näggi, hinter em Oofe stägg y,
giib miir Nuss und Biire, denn kumm ych hinde fiire!“
Äär isch nit koo, dä gueti Maa,
syy Esel het Corona gha!
Es schmeggt so fein, s Gleggli schällt,
S Jesus-Kindli kunnt uff Wält:
Ganz fuudi-bludd, dr Esel lacht,
uss syyne Windle het me Massge gmacht.
Ych hogg mit de Frinde in dr Baiz,
doo het ain e Hueschteraiz.
Schryyb myn're Frau: "Bi in dr Baiz do ääne -
ych blyyb graad do in Quarantäne".
Dr Alain Berset stuunt und lacht:
„das Viirus ischt für Schweiz wie gmacht“.
Die neyschti Schwitzer-Mutation,
goot nur bis an d Gränze vom Kanton!
Dr Baschi Dürr, dää isch fruschriert,
me het in aifach abserviert.
E Frau, maint äär, kääm noch im draa,
Das stimmt doch nit, es kunnt Ey Maa!
S Stimmvolgg sait zem Baschi Dürr,
lueg do Baschi, do isch d Düür
und zem Schluss au no e Bitt:
nimm au d Aggermaa graad mit!
QAnon-Deppe sind nit zem lache,
Verschweerer, Neonazi und nicht bache!
Soo vyyl Bleedsinn - ych grieg e Wuet -
Ych gang in Käller und dringg Kinderbluet!
Es blöökt ein vo dr SVP:
„Ych ha no nie e Viirus gsee,
e Burka gsee ych au nie doo,
doch wenns dr Blocher sait, denn stimm ych Jo“!
D Frau Burckhardt het e Burka aa,
dr Herr Burckhardt het au Fraid draa ghaa.
D Frau Burckhardt findet nüt do draa,
au dr Herr Burckhardt zieht si mängisch aa!
E Bebbi sait ganz gnabb und barsch,
dr Erdogan, das isch e ...!
Dr Bangg Rott, dää dänggt derby:
„dää kennt em Trump syy Brueder syy!“
Ych hätt e Värs vom Trump bereit!
Aber s gilt „Inländervorrang light!“,
Wenn mir dää jetze wurde singe,
mien mir ain vom Blocher bringe!
Dr Assad isch in Syrie usse,
dr Vladi Putin bi de Russe.
Nordkorea het dr Kim,
dr Glarner find ych fascht so schlimm!
Mir zwai sind als Schnitzelbangg,
als "Zentrumslaischtig" anerkannt!
De Stedter saage mir jetz: „Dangge!“
D Landschäftler zaale jee zää Frangge!
Mir haue s jetzt – das isch e Gschängg,
gsunge hän mir alli Bängg,
Vom Wirt e Gschpritzte, das wär flott!
Mir zwai Bänggler sind Bangg-Rott!