Bebbi Bängg

(Melodie: Dört ääne am Bärgli)
Miir sin so gligglig und miir sin so froo –
Frisch gwäsche und glettet, so steen miir jetzt do.
Holeduli ...
Miir hän e Lampion, da’sch Schwyzer Kultur
Baschtlet vo Kinder - in Singapur

An dr WM vo Katar, an dääre gläbbt Bluett
Es isch doch d Hauptsach, d Schwyz schuttet guet
Holeduli ...
Saudis die mischle bi dr CS mit
Isch uns doch glyych – will: Gält stinggt jo nit

D Ukraine, die bluetet – uns isch‘s egaal
Miir sin zwai Schwyzer und miir sin neutral!
Holeduli ...
Miir sin zwai Schwyzer und Gott sei Dangg
S Gweehr isch im Kaschde - nit alli Dasse im Schrangg!

 (Melodie: Ich liebte ein Mädchen...., Ingo Insterburg) 
In dr Schwyz isch öppis loos!  -  
D Jugend, die gläbbt uff dr Strooss!
Au miir Bangg Rott, miir hänn gsait,  
wänn Fasnacht mit Noochhaltigkait!

D Goschtyym doo, woo miir doo händ –  
sit Joore sin die Seggendhänd
und uns’ri Värs, jo eehrlig woor,  
rezikliert vom letsche Joor!

D IG Wääge duet beschliesse,
kai Orange, numme Öpfel schiesse.  
D Waggis, die sin au derbyy,  
komposchtierbaar mien jetz d Räppli syy!

E Waageclique duet jetz d Roose,  
sälber züchte – au d Mimoose.
Statt de Dääfi, daas macht Sinn,
gits jetze döörti Öpfelring.

Fasnacht muess noochhaltig syy! – Ihr und mir sin au derbyy!

Traktore die düend Luft verpeschte,  
me will Elektrotrotti teschte.
E Waggiswaage, s isch nit glooge,
dää wird jetz vo Waggis zooge!

Ross als Zuugtier – alli muurre,  
will daas Ross, daas gheit uff Schnuure!
Küeh goot nit, wie me waiss,  
z vyyl Methan – wääg em Scheiss.

Liechter abb am Morgestraich,  
daas fände mir scho lang kai Saich!
D Tourische blyybe au dehai,  
die Faahrerey macht CO2  

Dr Zuug vo Ziiri faahrt am Zwai,  
stoot ai Stund – denn wieder hai
Vo Bäärn blyybt äär in Olte stoo,  
die selle doch ins Wankdorf goo!

Fasnacht muess noochhaltig syy! – Ihr und mir sin au derbyy!