MS Fischbrötli 2026

Menü:
»MS Fischbrötli
»2026

Bisch superriich und nymmi leedig,
Buechsch für d Hochzyt ganz Venedig.
Trüffel, Hummer, tüüre Wyy,
Gäld verprasse, das muess syy.
Dr neuschti punkto Dekakdänz,
Leischtet sich jetzt d Prominänz:
E Auto Korso am Hochzytsstart,
Wo äxtra durch Birsfälde fahrt!

Für neui Zeen wirsch z’Ungarn fündig,
Auge lasere, kurz und bündig.
Z’Thailand muesch nid lang studiere,
Dert giz Brüscht zum implantiere.
Für dichters Hoor gosch in Türkei,
Implantiert gsehts uss wie ney.
In d USA dert anefarsch,
Für dr allergröschti Arsch.

Dr Louvre isch vonere Gängschter Horde
Amne Sunntig draischt bestohle worde.
Niemer ka das rächt verstoh,
Wie sin die numme inekoh?
Dr Plan isch gsi – originel!
Ganz Frankreich stuunt – exceptionnel!
Mir hingege hän dumm gafft,
Ass me z Frankriich au am Sunntig schafft.

Syt neuschtem het jetzt d Innenstadt,
D Trämmli und au d Schiine satt.
UUSE, UUSE mit de Trämmli,
Wott me jetzt versueche nämmli.
Für e Innestadt no attraktiver,
Wär dochs eifach effektiver:
Nid rede um dr heissi Brei,
E Innenstadt-Baustelle-frei!

Dä Sex-Kaländer stillt alli Glischt,
Ob Dildo, Pfyffli oder Brischt,
Ob Nippel oder Hodesagg,
S het ebbis fir e jede Gschmagg.
Bisch bsunders masochistisch drimmt,
Schmärzaffyyn, gärn fremdbestimmt,
Gits uff d Wiehnacht fir die Harte,
En FC Basel Saisonkarte

Dr Sparfuchs Ralph us Weil am Rhein,
Sait zum Schatz; “Des kann ned sein!”
"Lass uns in d Schwiiz in d Migros faahre,
Zum emol so richtig spaare!”
Im Migros spaart är nid bim Riis,
Au nid bim Kääs zem halbe Priis,
No bim Tee oder de Weggli,
Är spaart bim Gmiess am Plastikseggli.

In Globus muess sie nid wyt laufe,
Duet drum nur no dert yykaufe.
Sushi, Häppli und Chinotto,
Morchle für e Pilzrisotto.
S Hundeli darf me nid vergässe,
Griegt nur s allerbeschti Ässe.
Drumm, verstönn die allermeischte,
Ka d Soland sich kei Wohnig leischte.

Bim verhandle um die Zollprozänt,
Belehrt e Wyybuur dr Presidänt,
Ass fuffzää Prozänt d Gränze isch,
Au wennd die greeschti Fläsche bisch.
Vo zwai Prozent uff nyynedrissig,
Denn uff fuffzää, s macht eim schyssig,
E Logik isch do nid drbyy,
Dr Zoll kennt au "six - seven" syy!

Said dr Pappe zu sim Sohn:
“Hütt kunsch mit ins Stadion!”
Doch d Mamme wo an der Tüüre stoht
Beidne mitem Bizeps droht.
“Ihr hän bis jetzte Vorrang gha,
Jetzt bi ych und d Tochter dra,
Für s Znacht do mien ihr sälber dängge
Und denn au no d Wösch uffhängge!”
D Mamme said; “I kas nymm gseh,
Es mache mir do d Auge weh.
Wie Maitli hüüle, das isch schlimm,
Drum Männer-Fuessball lueg ich nymm!”
Die EM het e Füür entfacht,
Stadie gfüllt, e Froid ys gmacht!
No Öppis het ys gar nid gstöört,
Dr Ruefer het me gar nie ghöört.
Trotz Vorurteil uff Instagram,
Lippestifft und Wimpere lang,
S Designertäschli vo Dior,
Ah nei, die ghört em Okafor!
Vo dr Fraue EM d Quintessänz,
Fraue verdiene mee Presänz,
Als Maa hesch die Presänz scho gseh,
In dr Pause im Männer WC!