Bebbi BänggBasler Schnitzelbängg |
|
Schlyychwäärbig 2026
Uns’re Bangg git s scho baar Jeerli und Runzle dien erschyyne.
Drum dien mer is vom Fudifett e Bitz in d Lippen yyne.
Hyaloron zem alles Glette, nur ebbis steert is naimeduure:
Miir stryyche d Hemoroidesalbi neierdings an d Schnuure.
Fuessball-WM in dr USA, wäär wird ächt driumpfiere?
Miir wuurde s allne genne! Hauptsach d Schwoobe dien verliere!
Ai Land isch glaar im Noodail und isch ganz schwäär z beduure:
Mexiko bikunnt dää Ball jo gaar nie iber d Muure!
E drämlifreii Innerstadt, die Idee isch doch apaart.
Es macht e groossen Underschiid eb di e Drämli oder e Drotti iberfaart.
Au s Dieffbauamt, daas hätt e Fraid, und s Esthi Käller rieft:
«Joo, doch!»
So haan y ändlig ganz viil Blatz fyr s nägschti groossi Loch!
Dangg Tracking uff dr Smartwatch gseen y, woo myy Dochter blyybt:
Ob bim Shoppe, ob bim Sport – waas si mit iirem Frind so dryybt.
Die ständig Iberwachig macht si schon e Bitz ranzig:
«Loos, Bappe, de kaasch heere – yy bi scho nyynezwanzig!»
Dr Andrew und sy glaine Brinz, es deent e Bitz banaal –
mit junge Maitli … yy glaub däm spinnt s, drum isch äär nimm royaal.
Im Louvre isch dr Schmugg ewägg, daas duet in intresiere:
Dert kennt äär syyni Groonjuweele leegaal go bräsentiere!
Schiffli faaren uff em Ryy, villicht isch daas scho glyy verbyy!
Drum springt jetz en Inveschtor yy,
schiesst nummen e baar Fränggli yy.
Lieben Inveschtor, loss daas syy, schmaiss dää Stutz diräggt in Ryy.
«Daagesschau» uff s Minimum und nit emool me Klatsch.
S SRF nim «bi de Lüt» und kai gscheite Fuessball-Matsch!
«Arena» in dr Ändlooschlaufe, waas wänn miir mit däm Gfaasel?
Wenn daas denn soo wiiter goot, lueg y lieber Tele-Züri.
S Lotti het vom Gotti daas Drotti doo bikoo.
Jetz duet daas Drotti ooni s Lotti uff em Drottwaar ummestoo.
Drno fliege gopelotti alli ibers Drotti,
und s Lotti, wel s jetz muess, goot ab sofort wiider z Fuess!
Die Birsfälder, s isch dubios, dien Autifaarer schygganiere.
Miir finde s grandios, dien s fir dehaim graad adaptiere:
Bringt d Dochter son e Bumpi hai und isch s nit son e Tolle,
Fliegt dää noo nere Viertelstund – soo mache miir Verkeerskontrolle.
Am Fimfi schriib y E-Mails, am Säggsi duen i mi rasiere.
Am Siibeni lytt y dr Muetter aa, y muess jo nit bressiere.
Am Achti schnyyd y d Neegel, am Nyyni duen y mi im Byyroo mälde:
«Machet mer uff Zääni dr Kaffi warm, y stand no in Birsfälde!»
E Ufo suecht e Landeblatz, scho glyy isch aine gfunde.
Iberem Joggeli wird s veiellett, si landen uff em Raasen unde.
No bivoor dr Rauch verzoogen isch, gseen si e Schild an ere Stange:
«Rauche jetz verbotte», jo do sin si wiider gange!
Friefranzeeisch isch hit nimmi gfrogt, my Soon kaa kuum e Satz.
«Une gifle» isch e Gläbber, «ferme ta geule» haisst: halt dr Latz!
Und well äär daas halt nit verstoot, isch äär voll undeduure.
Bikunnt aggzäntfrei in dr Baadi uff franzeesisch ains an d Schnuure.
Kennt epper von eich epper, wo villicht epper kenne duet?
Wenn sich dää Epper bin is mäldet, fände miir daas ebe guet.
Miir suechen eben eppis, au s Gäld isch scho baraat:
Well irgendwoo, doo git s doch no e Phäggli Chips mit Aromaat.
Dr Trump macht uff Messias. Wuurd sich sicher nit beglaage,
wenn men im statt Donald aifach Hailand wuurdi saage.
Und wenn er scho will Jesus syy, denn hälfe mir däm Fleegel:
Bringet iir dr Hammer und miir Vier bringe d Neegel.