Bebbi BänggBasler Schnitzelbägg |
|
Styyrverwaltigg 2018
D Entsorgiggskoschte maint d Novartis kenn sy schpaare
und loht dä roschtigg Kraan an s andre Ufer fahre
nuur isch dää Umzuug z letschtemmänt denn doch e tyyre
denn was sy gschpaart hänn mien sy jetzt bi uns verschtyyre.
so wie n y Dii kenn – Du Kamuff
schlohsch no e Drittel oobedruff.
My Schwiigermamme duet grad wie e Moodepuppe
kauft sich e i-Phone zäh in so me Swisscom-Schuppe
jetzt het sy sich no lifte loo, die dummy Henne
sythäär duet se d Gsichtserkennigg nimm erkenne.
Jetzt due doch wägge dämm nit wild
Dii kennt jo nit’mool s Spiegelbild.
Dr Trump kunnt uff Davos, das findet kaine Spitze
är koschtet nuur e Huffe Gäld und duet Nyt nitze
fiir ass ihm nyt bassiert, mien miir vyyl Frangge ryybe
derbyy kennt doch dää Dubel Allne gschtoole blyybe.
ihr syyget Brieder, kennt me maine
denn Dii Digge – will jo au Kaine.
My Frind dr Wessels het bald alles, was er wott
die letschty Baiz goht zue und d Lääde gehn banggrott
e soo entfallt am Moorge frieh, das frait ihn sehr
ändligg e mol, dä leschtygg Zueliifer-Verkehr.
ohny Verkehrslärm, s isch zem Gruuse
duesch Du jo scho am Moorge pfuuse.
Bi dr Schmiir dien sy jetzt d Schtraiffe ney vergäh
d Tour siibe griegt dr Schorsch, d Jolanda d Runde zäh
dr Kurt griegt s Zwelf, dr Heinz het s Vierzäh iiberkoh
im Ste-Vau Meyer hänn sy ally Schtreiffe gnoh.
Dr Meyer Rolf griegt kurz und barsch
vom Baschi Dürr e Schutt in Arsch.
Letschte Fryttyggmittag, bii n y mit mim Kaare
voor das Verbottsschild do bim Barfi unde gfaahre
und wo n y alles glääse haa – und kehre wott
grieg y e Buess, hejoo – y schtand im Haltverbott.
So wie Du schaffsch – Du alte Bääse
kaasch halt nit vyyl schnäller lääse.
S Baselbiet – das schtoht schynts ze sym Wort
uff jede Fall schtoht gnau dä Täggscht bi jedem Ort
doch wenn y zrugg dängg an die Zyte, an die alte
denn wäär das s erschte Mool ass die ihr Wort dien halte.
Du haltsch die Andere au fiir Affe.
Wenn De saisch De gohsch go schaffe.
Y lieb Italie, d Pizza vom Salvatore
„Past’asciutta“, dr „Chianti“ und „l amore“
„la dolce vita“ – jo y glaub s verschtoht my jeede
vor Allem will dert Kain me iiber Fuesball reede.
Fuesball isch e Beweegyggssport
- y waiss Du myydysch e so Ort.
Es het im Zolli jungi Nilpfärd, jungi Affe
jungi Lama, Zebra, Rentier und Giraffe
au s Nashorn, s Känguru, dr Lai – dien Jungi halte
und numme s Frailain an dr Kasse isch no s Alte.
s git Kassefrailain – jungi, tolli
die schaffe aber nit im Zolli.
Er hännd jo gseh, y ha miir doo Notize gmacht
soo mergg y miir, wäär iiber uns Beamty lacht
wäär maint är kääm ungschtrooft dervoo, dä irrt sich gwaltig
miir Baidy schaffe nämmligg bi dr Schtyyrverwaltigg.
Y gseh scho Eyri Häls – die digge
wenn miir Eych dien d Rächnigg schigge.