Bebbi BänggBasler Schnitzelbägg |
|
Styyrverwaltigg 2020
Wääglaitygg zer Schtyyrerkläärygg
Miir Schwyzer zelle halt nit ze de bsunders Hälle
drumm iiberrollt ys letschte Herbscht e „Grieny“ Wälle
mit Hilf vo „Linggs“ rette sy d Wält, heert me se praale
und wie immer miens die „Biirgerligge“ zaale.
Wär Nyt wird, wird Wirt, dä Schpruch dä kennt jo Jeede
und mängge Wirt isch nit emool e soo e Bleede
doch bisch als Wirt den au no ganz e bitz e Duubeli
denn probier s doch aifach mit me Fasnachtsschtuubeli
Ob Scheengaischt, Supermaa, Maa ohni Furcht und Tadel
ob Chauvi, Blöffsagg, oder alte Basler Adel
ob Playboy, Gigolo, ob Beau, oder au Stenzer
hitte sinn das alles numme Influenzer.
S isch e-pidemisch, will s e-fang e jede Lappi hett
e e-Mobil, e e-Bike oder e e-Trotinett
bii all dämm e-Wahn, do vergässe d Basler nämmli
syt 125 Joor hänn miir s e-Drämmli.
Miir fahre mit em Porsche schnäll uff Ziiri Kloote
fliiege vo dert uff Stockholm, s koscht nuur e baar Noote
denn z Oobe s Glyyche – dasmool aifach umgekehrt
derfiir hänn miir e Vortraag vo dr Greta gheert.
Die sicher Drammschiine – e Vortail ganz e glaare
jetzt kenne miir doch ändligg sicher Velo faare
doch ai Verbesserigg die fählt, das duet ys näärve
Diend ändligg d Fuessgänger ab unsre Trottoir wäärfe.
Ob Super Hornet, Rafaal, oder Eurofighter,
d Froog, welles Fluugi macht ys langsam dr Verlaider
e Händyhalterigg haigge schyynts alli dinn
- ass d Piloote kenne „google“ wo sy sinn.
Dä Arm het d Rippi quätscht und au e brochne Haggse
het e verschlaages Gsicht, är kaa fascht nimme gaggse
Herjee, was isch dämm Maa bassiert, froggt me verschtoole
- Är het bim Suter welle Maitlibai go hoole.
Wessels, Bruntschin, au d Herzog dien Adiée wingge
das duet ys stingge, ally Lingge klopfe d Fingge
jetzt kennte se die Rächte, rächt in d Pfanne jätte
wenn sy als Gegekanditat e Nätte hätte.