Bebbi BänggBasler Schnitzelbägg |
|
Styyrverwaltigg 2019
Aatemloos syge sy zäh Joor scho dur d Nacht
doch jetzt hets au bi dääne Baide richtygg kracht
mer hänn drumm d Helen gfroggt worum hesch ihn lo hange?
es syyg ihm halt scho nach zwai Schtunde d Luft uusgange.
Als Bollyzischt schtohsch in dr Gsellschafft ganz elai
hesch kainy Frind und jede brinzlet Diir an s Bai
es isch drumm langwyylygg muesch z Basel Schugger syy
doch dangg de Tesla kunnt jetzt e glai Schpannigg dryy.
Die neischty Bätschlerett – isch das e syydyggs Hääsli
volle Libbe, satty Brischt und e schmaals Nääsli
und sii schwätzt Baseldytsch, was jo au scheen und rächt isch
numme isch das laider s Ainzig wo no ächt isch.
Es wäär e Meeruffwand, e admimischtrative
drumm verschtand se nit – d Hornkueinitiative
Hornvieh syg schwiiryg, me bruuch drumm meh Subventioone
e soo gseh duet my Schwiigermueter au nit loohne.
Mer hänn Museum doo fiir d Kunscht und fiir d Kultuure,
Fiir Schpiilzygg, Pharmacie, und fiir d Architektuure,
Hischtoorie, Tinguely, Fyywehr -- und nit vergässe
Ab näggscht Joor hämmer no s Museum vo de Mässe.
Dr Heiri Bienz, e Buur vo Scheenebuech ganz hinde
verletzt sich an dr Winde, jetzt sott me s verbinde
är fahrt in d Schtadt – und merggt bim Schpittel konschterniert
„die cheibe Schtädter hei jo gar nit fusioniert“.
Im Huus fiir Schpiilzyggwälte schtellt me uus, im Bsundere
meh Muet zem Huet – doch uns zwai wurds jo hailos wundere
wenn au dr Wessels kennt dää fyyny Wingg verschtoh
muetig sy Huet nimmt und denn ändligg wurdy goh.
Die lääre Drämmli wo im Elsass d Runde drille
mien sy jetzt je no mit zwai Wachpersoone fille
soo will me s Drämmli vor em Vandalismus schitze
und falls dr Fahrer yyschlooft, ka me dää no schtitze.