Bebbi Bängg

Basler Schnitzelbägg

Familie M. Steiner 2018

D Mamme bringt die früschi Wösch zum Junge in si Zimmer,
es drifft si fascht dr Schlag jä das wird jo immer schlimmer.
Spinne, Würmer, Made, Drägg und sunscht alles verreggte,
är seit nur Mami hösch bliib cool - i zücht für Coop Inseggte.

Si het ganz schöni Hügel doch uffgrisse wird si nit,
si loot nit jede driiber für e schnälle kurze Ritt.
Verkehr wott si nit z viil das erstuunt an und für sich,
e Wunder bi däm Name denn - si heisst Margrethe Stich.

Wenns z Basel säicht denn säichts so richtig das säit d Wättersändig,
drum ischs käi säich sin d Buessezeedel neu Wätterbeständig.
Do seesch das au e Säich dr grööschti Säich ka überstoo,
drum isch jo drotz em grööschte Säich – dr Baschi Dürr no do.

Am Ässdisch het dr Opi glääse inre Blocher Zyttig,
en Ussdritt us dr EU sig in männge Länder strittig.
Gwüssi Staate wooge jetzt schiins no dr gröösser Schritt,
und mache nit emool me an - dr Fuessball WM mit

D Mamme findet s lauft nur Schutte fascht uff allne Sänder,
dääglig uss dr Schwyz uss Ängland und no viilne Länder.
Am Sunntig Oobe lauft nüt duet dr Babbe kurz erwääne,
das stimmt seit d Mamme do lauft nyt - schiins hesch denn Migräne.

Bim Zollibsuech do hämmer gseh, s eint Nashorn isch nimm do,
die Kue het sich vom Bull schiins eifach nit bestiige lo.
E Dütschi Frau stoot nääben uns und meint nur: mit Verlaub,
ich dät des au nit mache - ohni Vaterschaftsurlaub.

Stell dr vor s wird gschlachtet z Sissach und kei Sau wär aane,
die Säu sin mir nit Wurscht seit do dä Pfarrer e Vegaane.
Är bittet d CVP um Hilf,​ ​doch das bliibt unerhöört,
kei Wunder die hän sich no nie - an Sauereie gstöört.

Dr Constantin le Président dä Walliser Kampfstier,
dä hätt am ne No Billag überhaupt gar kei Plaisir.
Är miesst sich denn, wenns Fäärnsee fäält mir wurde driiber lache,
als wirgglig einzig Fuessballkenner - sälber eini Bache.

E Wägsel-Värs vo Katalane / Zyyrcher hämmer dänggt,
dä wird jo sicher ganz viil ko, drumm hämmer uns dä gschänggt.
Mir wänn kei Värs wo alli bringe und so nääbe bi,
ihr glaubet jo nit wirgglig - d Spanier wurde so blööd si.

Dr Opi reist uff Wunsch vom Kim ins schöne Nordkorea,
är zaalt derfiir e rächte Priis - drotz sim düre GA.
Dr Kim wott wüsse wie me d Lüt no besser könnti blooge,
do muesch doch nit dr Opi nei - do muesch dr Wessels frooge.

Noch fünf Joor Basel goot dr Andi Beck als Intendant,
doch s Theater ums Theatergäld das blibt und het bestand.
Jä gwüsses bliibt und anders goot das isch im Lääbe so,
nur bim Trump ischs wie mit Fuesspilz - dä bliibt und wott nit go.

Dr Assad, Putin, Trump und wie si sunscht no alli heisse,
sitze in dämm Schwoobe Zug, wo z Basel duet entgleise.
Mir hänns scho lang vermuetet s git derfiir e huffe Zaiche,
wie sunscht bi mängem Ungligg au - s liggt an däne Waiche.

In dr Metzgerei stoht vor uns und duet Würschtli bschtelle,
dr Schuggerkomandant wird gfrogt: sunscht no öbbis welle?
Darfs no biz Lyoner si, für ihre glaine Spross?
Si sehn das wirgglig falsch das isch - dr Baschi Dürr mi Boss.

Well d Fasnacht Wältkulturerb isch dörf No Billag nit gwinne,
das SRF miesst Spaare und ihr Programm rächt usdinne.
Dr Queerschnitt vo dr Fasnacht wurd no kürzer jä so wärs,
denn kunnt nur no dr Morgestraich - und unseri 10 Värs.

Unsre Bundesroot dä isch perpläx und findets unerhöört.
Dr Burnout kunnt bi Kinder a? In Bärn sin si empöört!
Si bilde grad e Kommisioon und hogge an e Disch,
do froogt dr Schneider-Ammann zerscht - wär dä Burnout isch.

Im Kopf hän viil e Muure ob die Rächte oder Lingge,
das stimmt halt scho s`isch wie bim Fisch s’fangt oobe aafoo stingge.
Gedangge sige frei seit me doch viili Gfoore luure,
uss dr Gschicht do wird nüt gleert - scho wider baut me Muure.