Bebbi Bängg

Basler Schnitzelbägg

Familie M. Steiner 2020

  D Värs 2020 uff YouTube

Bisch Männli, Wyybli, androgyn, zwitter, variabel,
transmaskulin, transfeminin, e Intersexuelle,
hermaphrodit, pansexuell, gendervariabel,
e nit binäre gender queere oder weder noch?
Debatte um die Gender Sach die isch jo au verreggt,
oder hesch an dir villicht no öppis anders schöns entdeggt.
Und well ihm Solidaridääd wichtig duet erschiine,
stoot dr Opi nümme nei - är hockt ins Pissoir yyne.

Dr Jung het zu sim Schätzli gseit: i stand uff dini Pföschte,
das isch e riise Fääler gsi, wenn nit ein vo de Gröschte.
Si het em uff e Ranze gä vermööblet und verschlaage,
und alles nur well hütt jo nümm - Meitlibei dörfsch saage.

D Greta reist vyyl umme und si duet für s Klima kämpfe,
es schyynt dass au die bsunders Dumme iire Muet nit dämpfe.
Wo mir si frooge het si gsait:  «ganz eerlig ooni z liege,
wurd y bi de Schwoobe halt - am liebschte drüber fliege»

D Mamme spiilt Gitarre well s verdeggt guet ihres Fass,
wenn si no breiter wird denn bruucht si bald e Kontrabass.
Im Babbe längt s drum setzt är iire s Mässer biz an d Kehle,
lueg uff däm alte Foti hösch - do spiilsch no Ukulele.

Well s Würm het in däm Öpfel vo dr schwyzer Volggspartei,
git s e Riisegschtürm um d Würm und ai Parteiegschrei.
Die Buure sott es besser wüsse mir dien drüüber stuune,
d Würm findsch nit in griene Öpfel - numme in de Bruune.
 
Doch au die meischte vo de Griene wärde denne spööter,
wenn s Sünneli duet uff si schyyne dääglig e bitz rööter.
Die bsunders alte Öpfel saage vor i aabekei
gang i zue den andere - in d Schwyzer Volggspartei.

Dr Trömp dä lüttet hässig bi sim Doggter a letscht Frittig,
wiisoo sin mini Rönggebilder hütte in dr Zyttig?
Do meint dr Doggter: «liebe Donald jä beruhig di doch,
das Bild zeigt nit di hoole Schäädel - es zeigt das schwarze Loch»

Es git für d Münze vo de Promis en exklusive Märt,
dört haig die mit em grosse Loch dr höggschti Sammelwärt.
Wenn d soone Schatz dehai hesch isch s Beschte de versteggsch n,
denn s handlet sich um d Ässhoule-Münze - us dr Trump-Colleggschn.

Dr Wessels losst sich banggsioniere well s für iin rentiert,
s isch männge froo wenn är si Velo ändlig umparkiert.
Im Baudebb dien en d Mitarbeiter für dä Schritt verflueche,
wär weiss wie lang me d Lugge wo - dä hinterlosst muess sueche.

Bim Möbelufbau z Kanada froggt dr Härry d Meegen,
was soll y mit däm Kaschte mache - stellen oder leegen?
In däm Momänt het si entdeggt ass iire glyy könnt stingge,
denn s einzig wo dä wiirgglig tscheggt - isch lächle und blööd wingge.

D Waal zum Sportler 2019 jä dr Stucki gwünd se,
drfüür git s jetzt vom Federer e so ne super Münze.
Dr Stucki mit sim Schtieregrind seit: «d Wahl isch wool für d Katz,
uff däre Münze hätt jo nur - mi Naseflügel platz»

Mir faare mit em Drämmli dääglig bis nach Münchestei,
dasch logisch denn mir vier sin nämmli z Münchestei dehei.
Doch wemme do die Drämmli scho fascht sälber faare muess,
göön mir vier hei nach Münchestei - halt lieber wider z Fuess.

Dr Streller het im letschte Joor dr Koller wägem Koller,
drum isch dr Streller gange und dr Koller dänggt jä soller.
Vergliiche kasch dr Streller und dr Koller nit diräggt,
mir wüsse nur dr Streller het - dr toller dialäggt.