Bebbi Bängg

Basler Schnitzelbägg

Familie M. Steiner 2024

D'Heimsyte vo dr Familie M. Steiner: http://www.fam-m-steiner.ch/

unsere Refrain:
D Familie Steiner sin mir Vier, mir dringge Whisky und au Bier
au Waggis hän mir alli gärn, so sin mir halt mir vier

Wenn s Gäld stimmt ka s zur Trennig ko
sehsch s bi Novartis und Sandoz
Mir wurde s ganz Erspaarte gää
würd öbber unsre Opi nää

Hösch Charlie du neu änglisch King
goosch gärn uff d Jagd dasch voll di Ding
statt heilig Graal und Drache jaage
kasch im Wallis Wölf an Kraage

Vom Doggter wott d Mamme die Sprützi
wo schiins vom digg wärde schützi
au das muess dr Opi lache
wird uss dir kei Barbie mache

Dangg e-Vignette ka d Frontschiibe
bi uns jetzt Kläber frei bliibe
doch jetzt hängt dört dasch dr Mischt
sit Wuche sone Aggtivischt

S Volgg sig d Chefin seit dr Jans
das stimmt zum Teil aber nit ganz
bi uns deheim Herr Bundesroot
isch d Mamme die wo seit was goot

Dr Düüfel steggt schiins im Detail
das findet unsre Pfarrer geil
so gits no öbber het är tscheggt
wo gärn moll neume dinne steggt

Mir liebe dä neu Beatles-Song
au d Stones hörsch bi uns all night long
do kasch uff gar kei Fall ruhig stoo
drum gwaggelet dr Biden soo

CS wird UBS dasch bitter
nur no X heisst das nüm twitter
au z Berlin isch das nit neu
dört wird e Wildsau schnäll zum Leu

In dr Zolli-Voliere
dien sich d Vögel rasch vermeere
bisch nid wirgglig vogelfrei
denn blibt dir halt nur d Vöglerei

Mit em Dram in d Stadt go ässe
hän mir welle, kasch vergässe
well wotsch mit em Drämli goo
denn bruuchsch viel z lang - d Beiz isch nüm doo

D BVB het Sitz loo teschte
welle wär für s Fudi s Beschte
das ka schiins wie d Jodtablette
wenn s moll rumplet s Füdle rette

Dr Babbe wott sich neu ussrichte
und uff s Mooler-Gwand verzichte
z Basel stellt me jetzt io glii
als Schugger fascht scho jede ii.
Neus muess au bim Opi goo
well s Hotel Basel isch nüm doo
au s Mascotte mit de heisse Nixe
jetzt muess är dehei Bier dringge

D Mamme und ihri 12 runde
Fründinne wänn d Stadt erkunde
glii nach däre Groossparaade
het d Margrethebrugg dä Schaade.
Drum mien die dralle Walking-Fraue
in de Bärge Späck abbaue
dört foot wäg däm stöggele
dä Bärg in Brienz a bröggele.
Uff em Heimwäg dien die stargge
Fraue bim St.Jakob pargge
hälfe dört rasch dene Pfluume
unsre FCB uffruume.
Und jetzt d Moral vo däre Gschicht
in Basel hän d Fraue mee Gwicht
jä well s uff däre Wält  z viel kracht
mien Fraue wie d Mamme an d Macht!