Bebbi Bängg

Basler Schnitzelbängg

Familie M. Steiner 2026

D'Heimsyte vo dr Familie M. Steiner: http://www.fam-m-steiner.ch/

Dr Eric Wäber het uns gsuecht,
letscht Fasnacht unsri Värs verfluecht.
Mir hoffe spürsch e bitzli drugg,
Jä Eric mir sin wieder zrugg.
-
D Steiners wänn euch nur kurz mälde,
mir hän kei Värs vo Birsfälde.
Well mir sin nit, wie dä do,
so doof zum döört lang ummestoo.
-
E Drämmlifreii Innestadt,
Herzog de Meuron fändes glatt.
Für d Stadt wär s wool die bescht Arznei,
si wär Eric Wäber-frei.
-
Isch la Madame Frau oder Maa,
das goot nur s Macrons öbbis a.
Het d Brigitte eventuell e Glöggli,
macht dr Emmanuel halt s Böggli.
-
Nit jede us de USA,
muess au e riise Schnuure ha.
Höörsch nüt vom Papst mir schätzes sehr,
mängmoll isch weniger halt mehr.
-
Bim Louvre-Raub unsre Verdacht,
dr ExPrinz Andrew het mitgmacht.
Är het, dien mir moll in Ruum stelle,
halt au moll e Krone welle.
-
D Mamme und d Weight Watchers Fraue,
mien jetzt wider Spägg abbaue.
Well statt Gsunds wie Fäldsalat,
mampfe si Chips mit Aromat.
Die Fraue freue sich scho bitz
uff s neue Schwümbi am Dreispitz.
Nit wägem Sport das isch für d Katz,
nei in däm Pool hän alli platz.
Doch au die Gschicht het e Moral
bisch nit perfeggt isch das egal.
Vo uns bekunnt drum, als Bewiis,
d Mamme dr Friidensnobällbriis.
-
Dr Unterschiid Mensch und Schimpans,
nit Hemmige odr dr Schwanz.
Was schlimm isch und au bitz konfuus,
dr blöd Aff woont im wisse Huus.
-
Mir finde unser Rächtssyschtem
isch mängmoll wirgglig rächt extrem.
Doch d Schwoobe hän e rächts Brobleem,
well d AFD isch Rächtsextrem.
-
Kuum griegt dr Trump e Rolex gschänggt,
scho wärde d Zollgebüre gsänggt.
Im Eric Wäber muesch nüt schängge,
däm si Niveau kasch nüm sängge.
-
Dr Jungi het sich lo verwütsche,
ganz ellei bim Eierdütsche.
Was dr Opi ihm empfiilt:
Mach witer so und blyyb verspiilt.
-
Mir hän s leider miesse vernää,
Nemo het dä schön Priis zrugg gää.
Do seht me är isch doch e Maa,
für dass muesch nämmlig Eier haa.
-
Kuum zieht dr Babbe an sim Stumpe,
kunnt scho sone Ordner z gumpe.
S Rauche stöört die Andre do,
wo ihri Pyros wänn abloo.
-
Wie d UBS hän mir s erwooge
sin fascht in d U S A  zooge.
So wäre mir, Trump sei dangg,
dr bescht Grönländer Schnitzelbangg.