Bebbi Bängg

Basler Schnitzelbägg

Familie M. Steiner 2022

Well mir 4 uns hän lo impfe
hörsch jetzt d anti Impfer schimpfe
d Steiners hän dra Schaade gno
nei nei mir sin scho immer so

Dr Babbe goot jetzt als Option
zum Jasse grad in d Teschtstation
bim Sprütze denn dr groossi Schogg
wo d Ärztin ihm seit „Gstoche Bock!“

D Mamme und ihri ussgflippte
Fründinne sin uff Ägypte
Dört wänn drum die digge Fraue
Späck durch Aqua-Fit abbaue
Glii dien denn die 13 runde
Fraue dr gross Pool erkunde
so kunnt s wirgglig zum Skandal
Stau in däm Suez-Kanal

Shaqiri dasch für di kei Seich
fliegsch jetzt über dr grooss Deich
nääbe groosse Disney Schlösser
isch dört au di Bänggli gröösser

Bim FCB laufts nit ganz rund
dr neu Chef hört me sig dr Grund
s isch halb so schlimm jä dängget dra
dr Däge könntsch au dopplet ha

Dr Yakin macht e super Tschobb
well är verstoot drum d Spiiler top
was nit nur d Mannschaft richtig schätzt
au mir verstöön dr Trainer jetzt
Dr Petkovic verstoosch nit rächt
au z Frankriich dört verstöön s’iin schlächt
und umgekeert hesch jetzt vernoo
duet är vom Schutte nüt verstoo

Wetten Dass..? lauft in dr Glotzi
unsri Mamme luegt denn motzt si
Giggerbögg mit dünnem Hoor
seh ich dehei scho s ganze Joor

Verdräumt luegt d Mamme d Roche-Dürm a
und dänggt drbi an ihre Maa
i wär io wirgglig schampar froo
si Durm wuurd amme gliich schnäll stoo

E Genderdiskussion am Disch
was Frau was Maa was sunscht was isch
dr Jung luegt kurz in d Hoose drii
und dänggt i könnt glaub alles sii
‘Es goht nur drum was in Dir steggt
Und jetz muesch loose - dasch verreggt:
Will het d Mamme kei Larve aa
denn isch sie nämlig au e Maa!’

D Helene Fischer griegd e Kind
in Uri knallt im Böögg si Grind
do git s ei Gmeinsamkeit dasch richtig
beides isch nit wirgglig wichtig

Dr Eric Wäber zeigt normal
si Gsicht und Arsch ihm isch s egal
ob Arsch ob Gsicht es isch zum gruuse
beides lott nur Schissdrägg use

Beleidigt well me ihn nit wott
z Australie dr Tennisgott
drum finde mir är isch e biz
e nit so glatte Djokowitz
Si Vatter frogt uns druff wie wärs
mit me geile Novac Värs
är sig io fascht scho Jesus gliich
drum gän mir uns grad bsunders mieh…

Ich höör sone Glöggli und s wär wirgglig nätt
wenn dä wo duet glöggle kei Glöggli me hätt.
Doch ich befüürcht dass dä geischtig glei Maa
nit wirgglig viiel mee als nur blööd schälle ka
Si lütte für d Freiheit und draagen e Joch
do sehsch ihrem IQ dämm fäält s ebbe doch
Mir haue s gli witter jä s het uns Freud gmacht
de Trychler mee Hirni und uns mee Fasnacht