Wyybuure 2019

Menü:
»Wyybuure
»2024
»2023
»2022
»2020
»2019
»2018
»2017
»2016
»2015
»2014

D'Fäärs mit Helge vo de Wyybuure kasch uff https://wyybuure.ch/2019/ aaluege.

Wotsch go "basejumpe" no muesch du in der Schwyz nid wyt vo do,
Am beschte grad bi Luterbrunne uf d Bärgen uffe go.
Ab de Churfirste z Walestadt, duet s Flieegen au guet glinge.
Und z Basel kasch bi de Haltstelle vom Trottoir aabespringe.

"Du die Trottis wo me het kenne miete, die sinn denn gar kai Saich."
"Jo was ägscht, ich ha so ains gmietet ka, hey biiireweich!!!
S het mi e halbs Vermeege koschtet... das han ich jetz miesse leere.
Bi mit so aim halt in s Dramglais ko und ha uf Aesch miesse go keere!!"

Jetzt wänn doch d Färnseesänder, uuh daas goot ys bees an d Niere,
S Yyberspringe vo der Wäärbig aifach so bloggiere!
Doch blyybet ruiig, kai Panik, s wird in Zueggunft trotzdäm glinge,
Uf Telebasel kenne guet vo Wäärbig zu Wäärbig springe.

Wäärbig (Nit yberspringbar!):
"Magsch es zääch statt logger,
denn nimm Valentin s Härdepfel-Stocker."
"Mit dem bekchommst du..." maint der Streller,
"..den Maagen-Koller um so schneller!"

Ändi letscht Joor in de Baize, hey zerscht hänn mir s nid verstande.
Isch fascht uf jedem Menu e Gricht mit Pfäärdeflaisch dinngstande.
Immer Pfärde-Entrecote duet di halt scho denn ainisch schluuche.
Aber irgendwie het me die Herbschtmässponys miesse bruuche!!!

"I ha mit der Familie son e Schifffaart gnosse ka,
Do griffen yys vo allne Syyte Seepiraten a.
Ich schnapp mir grad baar Faggle und attaggier se eebefalls.
Jo und jetzte han ich vom Europapark e Klaag am Hals."

Wäärbig (Nit yberspringbar!):
"Wotsch im Büro uffalle, denn syg kai Niete.
Fyr daas kasch bi uns e Buschi miete."
"Zyt dass es bald jede kennt: Lea Steinles - Baby Rent."

Mir drei sitzen uff em Trottoir duss und dringge grad e Wyy.
Do lauft e Schugger mit eme Tesla am Ruggen uf der Stroos verbii.
Isch d Batterie usgange? Frooge mir, do hyylt är unterem Kaarre:
Nai. Bi yyne sigi s halt eso, ass der Gschyderi darf faare.

"Ich stand bi der Geburt vo minere Dochter grad dernääbe.
Und bi aifach nuur gligglig daarf ich all das miterlääbe.
Doch ebbis het mi Frau seer gsteert, s isch glaar ass dass nid goot:
Dasch wäärend der Gebuurt dä Sitzigslärm im Groosse Root.

Wäärbig (Nit yberspringbar!):
"Wotsch Möbel lagere oder zügle
Die us em Elsass dien s scho bügle."
"Die mache alles ohni Drugg,
griegsch aifach d Meebel nimmi zrugg!"

"Endschuldige Sii, isch das Taxi frei?" - "Siicher komme Sii nur iine."
"Ich miesst uf Allschwil." - "Kei Broblem für mich und mini Maschiine.
Aaber ich faar nur mit Hübrid!" - "Toll, no dien mir d Wält bitz rette."
"Guet, nur ei Momänt will mi Cousin der Hübrid isch no uf Toilette."

"Wiider zrugg live us em Stadioon, der FCB gryfft aa.
Der Widmer spiilt e hoche Ball, der Zuffi nimmt en aa.
Är laitet wyyter zem Karambal Karan Sooar
Tarmaans Mahila Shud Kalal Bundi
Baladikumaran Chandra Markandar Karmaril
Mahatma Paravan Taran Tori Paadandara
Chutny Mandir Laritaral Mahai.
Do sait der Abwart: Kumm jetz klemmed ab, d Lyt sinn scho lang dehai!

Wäärbig (Nit yberspringbar!):
"S neu Buech vom Almi gits au in 3D... jetz denn gli."
"Doch das kasch numme lääse, wenn de schiile duesch derby."

Am Fritig sinn mir statt in d Schuel, lut go proteschtieere,
Um e gueten Umgang mit der Umwält z proklamieere.
Mir hänn denn miesse frieener hai, go unseri Täsche fasse,
Dermit mir unser Week-End-Fluug nach London nid verpasse.

"Ich schliess mi de gääle Weschten aa, denn mir steen alli yy,
Fyr weeniger Abgobe, me Gäld und au mee Demokratii!!
Wie Sklaave ooni Perspeggtiive duet men ys benutze!!!
Do sait mi Frau: Kumm halt jetz d Schnuure und fang a d Kuchi putze!!"

In Sache Vorfasnachtskultur stoot Basel an der Spitze.
Der Hans duet in jedi Vorfasnachtsverastaltig dinn sitze.
Mit eme Fasnachtsbändeli am Arm darf är gratis schnabuliere.
Fasnachtskiechli gits keini me, jetz muess är halt s Läggerli brobiere.
Scho nach em erscht Conzärtli het der Hans, daas isch nid toll,
Vor luter Wyy, Schnaps und Bier sy Kopfladäärnli voll.
Völlig rämpläm leert är d Sabine kenne, sie isch uf Männersafari.
Sie sait: "Kumm mir geen zu dir, bi mir dehai isch ai Charivari."
Voll riducule lallt är "On y va". Als "Menü SüürprYYs" waggelt sie mit em Hösli.
Är zaigt iire sy Monschter Drummeli, aber im Bett isch är e Mimösli.
Am näggschte Morge dänggt der Hans, will sy Pfyfferli macht so wee:
"Guet gits kai Fusion mit Baselland, sunscht hät i jetz e Rotstab Cabaret!!"