Bebbi Bängg

• Menü:
• »Wyybuure
• »2024
• »2023
• »2022
• »2020
• »2019
• »2018
• »2017
• »2016
• »2015
• »2014

Wyybuure 2015

Unsere Ufftritt bi Telebasel (ab 34:20)

D'Fäärs mit Helge vo de Wyybuure kasch uff https://wyybuure.ch/2015/ aaluege.

Us dr Staizyt baar Waffe, vo de Reemer Amphore.
Skulptuure und Grab-Schmugg vo de Pharaone.
Und luegen in dausig Joor d Lyt bi uns aabe,
Denn finde syy Abfallcontainer vergraabe.

"Hilfe Polizei, ich bi der Rabbiner Jowowitz.
Mini Lyt wänn mi verpriigle, drum renn i wäg und schwitz e bitz!"
"Jä was hänn Sie denn aagstellt, dass daas jetz so lauft?"
"I ha nummen im Migros baar Kaffiräämli kauft!"

Die Fischstääge näb däre Staumuur bringt nyt.
Me miesst se vergresseren und das tres vite!
Do z Basel sinn d Fisch nämmlig voll uf dr Schnuure,
Well soo kemme sii mit den Yykeif kuum duure.

"Hey Alte! Ich ha mir die gailschti 3D-Brille kauft."
"Jä und was isch do s Gaile draa, wenn die mol lauft?"
"Jo... Du hängsch dängg e Kamera an d Brille draa,
Schaltsch yy und denn hesch s Gfyyl, hesch kai Brillen aa!"

Der guet Hakan Yakin isch glatt mit sym Karre,
Druurig vom Europa-Park haimegfaare.
Enttischt het är gsait, sy Moral syg dief unde...
Är haig deert in Russland sy Brueder nid gfunde.

"Sali Murat, do Hakan, hey Brueder muesch looose.
Alli Lyt wänn en Autogramm vo mir uf de Stroose!"
"Mann Hakan!
I ha dir doch gseit, s luege di alli Lyt a,
Will wenn d nid rasiert bisch, gseesch us wie d Conchita!"

Dr Simenli Ammann isch gschdaardet perfäggt.
Denn het s en mit aarg vyyl Schwung in d Wyti gfäggt.
Isch gfloogen und gfloogen und dennen yyskalt,
Diräggt graad in Rand vo der Helge dryygnallt.

"Scheich Hamad"
"Hey Papi! Katar wird stolz uf mi sy und mir dangge!
Ich ha do der Gaugin kauft für ganz vyyl Frangge!!!
"Mi Sohn! Bisch du nid ganz bache, das macht mich ganz wild!!
Der Gaugin isch kei Fuessballer, das isch e Bild!"

Vo Ravensburg isch e neis Spyyl usekoo.
Es haisst "FIFA-Business" und daas goot esoo:
S Gäld kunnt in d Mitti bis me kains me het.
Und ganz am Schluss gwinnt aifach immer der Sepp.

"Du los, ich ha minere Frindin, doch immer
Huffe Selfies vo mir gschickt, maischtens us mim Zimmer.
Aber au wien ich sportlig an der Sunne bi glääge,
Oder e Selfie us Paris unter streemendem Rääge.
Baar Selfies han ich ihren au gsändet ka,
Us minere Studierais duur Panama.
E Selfie bim speertle us em Fitnessstudioo.
E Selfie us em Drämli und e Selfie us em Zoo.
Jetz het sie hütt schluss gmacht am Morge am 11..."
"Jä... jetz heissts halt fyr di wider 'do it your selfie' "

Der Hans dä isch zfryyde, im Wind weyyt sy Fryyse.
Är het fir vyyl Gäld kennen e Cabrio lease.
Doch noch finf Minute luegt är dri wie gschluucht.
Är het syni Herbschtmässjettons scho verbruucht.

"Sali Fritz, du loos, es goot mir rächt schiter.
Ich sitz imme Cabrio und kumm nimmi wyter!"
"Kai Panik! Ich hool di grad ab, guete Maa!!
I sitz do im Abschlepp-Auti hintedraa!"

Der Lehrplaan 21, dä isch korrigiert,
kaschiert, optimiert, raffiniert reduziert.
So findet lut Lehrplan, das stoot schwarz und satt,
der Unterricht jetz neu ooni Schieler statt.

D Schnitzelbängg wärde, heert me als wie me,
Immer wie schlächter, das duet scho fascht wee.
Kai Värsmass, misi Pointe und s Thema e Seich.
Doch die Schlimmschte sinn die wo sich nid emol reime dien.

Quelle: Youtube Kanal der Tageswoche