Bebbi BänggBasler Schnitzelbägg |
|
Wyybuure 2020
D'Fäärs mit Helge vo de Wyybuure kasch uff https://wyybuure.ch/2020/ aaluege.
Dangg modärnschter Satellitelaserscanntechnologie
und neuschter raschterchemische Nanobiologie.
Derzue no vyyl Geduld, bitz Gligg und Verstand… e gsunde,
Het e Forschergruppe z Basel-Stadt e freie Parggblatz gfunde.
„Du Hans, i ha vernoo, es sig nid gloffe sowie s sett.“
„Jo, bi hai ko gescht, do liggt e fremde Maa bi mir im Bett.
Es dät em Laid, är haig s Huus verwäggslet!“- „Das isch denn e Idiot!“
„Hejo, dä sigi schyyns do bi der Patrouille Suisse der Chefpilot.“
Greta-Regle:
„Laufsch z Engelbärg am Meer entlang
No isch der Klimawandel voll im gang!“
Obwool de dääglig 40 Flugi heersch, dien mir gärn z Allschwil woone.
Das sinn pro Flugi zwanzg Sekunde Lärm wo di nid schoone.
Täglig sinns 13 Minute wo de gar nyt hersch und so
Kunnsch pro Wuche uf Anderthalbstund, wo di Frau nid kasch verstoo.
„Du Hans, ich ha vernoo, du wirsch mit Hassbrief bomardiert.
Jetz han ich vo dir welle wisse, was isch denn bassiert?“
„So Klimaaktivischte windsche mir der Tod scho gli.
Will i an der Herbschtmäss mit der Tochter uf s Fluugi gstyyge bi.“
Greta-Regle:
„Duet d Sunne wyter so stargg schyyne,
Passt der Rhonegletscher gli in di Longdrink yne!“
Bi der Vereidigung vom Kanzler z Eeschtrych het me doch, ojee
Im Färnsee glatt der falschi Untertitel kenne gsee.
Der Schuldigi het „Sorry“ gsait, besser frie als z spoot.
Es dät em laid, är sig halt bii der Patroille Suisse Pilot.
Unsri Fraue hänn ys letschti gsait, sie mechte s au mol bringe
Und an unsrer Stell an d Fasnacht Schnitzelbängg go singe.
Mir händ ne gsait, es sig in Ordnig, au wenn uns das maag.
D Bedingig aber wär, mir mache die erschte drei Daag!
Greta-Regle:
„Dr CO2-Fuessabdrugg am beschte hinterloosch,
Wenn de uf der Alp in e Kueeflaade stoosch.“
„Sali Hans, du los, ich ha vernoo, du wärsch geschter fascht gstorbe.“
„Jo bim Dusche han i gmaint ich wäri zem Transgender worde.“
„Das isch jo verruggt!“ - „Hejo, vor Schregge bin i fascht verreggt
Zem Gligg han i denn gmerggt: Mi Ranze het en jo verdeggt!“
Was soll dä Genderstress wäg de Signal, s git nur e Puff.
Jetz leend uf däne Schilder doch die Männli aifach druff.
Begryffet doch jetz, liebi Fraue, unseri grossi Not.
Mir bruuche die Signaal, iir wissed jo scho lang wie s goot!!
Greta-Regle:
„De merggsch, s 5G-Netz duet guet funktioniere,
Wenn d Pommes Frites von ellei fritiere!“
In Schwede sott der Sex am beschte schriftlig klar veryybart sy.
Fyr das gits deert e Formular und so schrybt me das dri:
„Wöllsch mös Smörrebröd römpömpe möt dö lönge Ööferööhr.
Denn sön mene Köttbular pöröt, för dö Gschlöchtsverkör.“
Z Aarau isch am Baanhof aini glatt mit iirem Karre,
Uf em Perron umme und denn fascht no d Stäägen abegfaare.
Der Schuggerei het sii denn gsait: „Machet doch kai Gschiss,
Ich bi doch d Frau vom Chefpilot vo der Patrouille Suisse.
Greta-Regle:
„Quiitscht bim ässe lut der Fisch
No waisch, ass är voll Plastigg isch!“
An unsrne Schuele soll gli alles Genderneutral wärde.
All Bueben und all Maitli solle glych sy uf dären Ärde.
Drum leere d Buebe kecherle, Kosmeetik und au Strigge.
D Maitli leere Schutte und reede nur no yyber s
Fyynmechanikerstudium an der Fachhochschuel Nordweschtschwiz.
Ob bi- oder homosexuell, es isch yrelevant.
Wär Transgender nid akzeptieert, dä isch en Ygnorant.
Sexuelli Diskriminierig, die gheert nid in unseri Zyt!
Doch mien mir saage, isch so ebber Ziircher, daas goot nit!!
„Ich ka bi däne E-Trottis s Bezaalsyschdem umgoo.
So bin i vo der Heuwoog mit so aim bis Thärwil ko.“
„Wie hesch das gschafft? Ha gmaint s Zaaligssyschdem wär doch so gscheit?
„Ha s Trotti gno und denn in Kofferuum vom Taxi kheit.“
Greta-Regle:
„Wenn d Frau Müller mit 15 Yoghurtbächer in der Schnurre Velo faart,
No waisch sii het im Migros e Plastigg-Gugge gspaart!“
Dä jung Grätimaa isch bitz e Spitzbueb und gseht uf em Wäg nach hei
D Claudette e super Cremeschnitte mit scheene Maitlibei.
Schänggeli ganz goldig bruun, zwei Gugelhepf scheen rund.
Es zwiebackt ihm am Krapfe und kauft ihre e Rosekiechli-Bund.
Ganz Diplomat spricht är sie uf ihri Zöpf a und zaigt Respäggt.
Well wott är e Beggeschmutz bekoo, muess är syy politisch korräggt.
Pleetzlig kunnt e Berliner, ein nid ganz bache, son e Doofe
Dä zeigt ihre sy gross Baguette, jetz het sie e Brot im Oofe.
Dä Fall vo däm Berliner zaigt ganz ooni z ybertryybe.
Glych ob politisch inkorräggt: e Schwöbli wird immer e Schwööbli blyybe.
Wartisch z Basel uf der Bus, jo denn bisch du sälber Schuld.
D BVB die strapaziert scho lang unseri Geduld.
Denn stoosch du an der Haltstell und de dänggsch „dä kunnt scho gli“
Derbi isch d Chance greeser s fliegt mol d Patroullie Suisse verbi.“