Bebbi Bängg

Basler Schnitzelbängg

Wyybuure 2026

D'Fäärs mit Helge vo de Wyybuure kasch uff https://wyybuure.ch/2026/ aaluege.

Der Odermatt stirzt sich wie wild der Hang durab, galant.
Denn scharf in d Kurve linggs, denn rächts und alles gar rasant.
Und wenn är yyber d Schanze springt, denn het das au sy Raiz.
Unsre Odermatt macht s Glyych, halt aifach nur vo Baiz zu Baiz.

Z Basel dien do ab de Baim e huffe Kraiee kraiee!
Denn schysse die no obenaabe, s isch zem duuredraiee!
Vom Regieerigsroot baar Fetelii, hänn mir an d Baim dra bunde!
Jetz kraiee d Kraiee nimm, derfir dien s dobblet so viil pfunde!!!

"Sali Hans, wie goot s?"-"Jo bländend hösch, bi wiider voll derbi!
Ich bi jo geschtert zem go Baade, im Gartebeedli gsii.
All Jugendlichi hänn mi griesst, ha Respäggt biko, und wie!"
"Hesch dängg wiidermol vergässe dini Unterschliich us z ziee"

Dr Giuseppe Farinello, dä fillt Iisostaar in d Fläsche.
Maiit dr Fuessballplatz und duet vo de Binggis d Triggot wäsche.
Bim FC Reigoldswil, do waiss es jeede, hösch bigott:
Falls dr Liechtsteiner patzt, bikunnt denn är s näggscht Ufgebott.

"Du Fritz, bi wiider ins Gartebad, wo d Sunne isch go schyyne.
Doch dismool bin ich ooni Unterschliich ins Wasser yne!"
"Ojee...
Denn hesch sicher au d Badhoose vergässe und bisch blutt in s Beggi dri."
"Uups...
Dämfall isch daas, won i im Wasser gsee ha, doch kai Chlorhuen gsi."

Dr Trump dä mecht das jeede huffe Gäld ligge loot.
Wo in d USA kunnt oder au nur duure goot.
Zem do derfyr die beschti Taggtigg z wääle, duet är mälde,
Sitzt är mit Expärte zämme vo dr Gmaind Birsfälde.

Au mir hänn glatt nach Triggli gsuecht, wie me mit em Karre
koschtelos und ooni Buess ka duur Birsfälde faare.
Syt me Monet dien mir ruggwärts duurefaare und hänn so
Vo dr Gmaind Birsfälde 30'000 Stutz uszaalt biko.

Der Theo macht KASSESTURZ, zieet BILANZ und sait "allem Änd...
Bruuch i hyt unbedingt e HAPPY DAY und zwoor mit Happy Änd!"
Är goot in e Erwachsene-CLUB, klopft an d Diir: "DOK, DOK, DOK."
Und scho stoot im Diirraame d MONA MITTEDRIN im gar gurze Rogg.
Am Theo si PULS raast. Är dänggt "POTZMUSIK, waas fyr e Frau!"
Do sait sii "MINI KUCHI isch DINI KUCHI, ich bi hyt di TAGESSAU"
Är wäält s SPORTPORNORAMA, sii styge in d ARENA, iiri MALONEY leese sy Krampf.
Der Theo het s Gfyyl är kennt jetz 1 GEGE 100 wie im SUPER-10-KAMPF.
Sie flischtert am Theo: "Ich will METEO.. METEO" bi iim bricht e Damm.
Doch trotz STERNSTUNDE und viil WILLE droot leider e SPARPROGRAMM.
D MONA seit: 
"Wenn dä bis 10VOR10 nid stoot, gang i zum GREDIG DIRECT, ohni Sang und Klang!"
Dr Theo luegt truurig abe und gseht: D HALBIERIGSINITIATIVE isch voll im Gang.
Denn syni ANTENNE isch scho lang nimm in der SCHWIZ AKTUELL und so
kriegt d MONA e SUMMERLACHER, stoot uf und isch grad UF UND DERVO!

"Sali Hans, du loos hesch mitbikoo, das wär jo schandbar glatt.
Do wänn baar kaini Drämmli me, zmittst duur d Innerstadt!
Denn könnt me ändlig yber d Stroos!" - "Das miesste mir denn fieere,
No kennte mir ys ändlig gsee und miesste nimm delifooniere!!

Baselbieter Waggiswääge wärde breiter, hänn s yys gsait.
Well s muess jetz e Verschaalig dra, wääg dr Sicherhait.
Jetz frogt sich z Lieschtel jeede Chauffeur, daas mit guetem Grund:
Wien är duur das änge Deerli bsoffe duure kunnt?

E guete Schnitzelbangg singt yber aktuelli Sache,
Wo d Lyt beschäftigt und sii denn do driiber kenne lache.
Drum hänn mir nocheme Parkplatz-Värs gsuecht, eme scheene Runde.
Hänn gsuecht und gsuecht und gsuecht und gsuecht 
und gsuecht... und gsuecht und gsuecht und gsuecht 
und gsuecht... doch kaine gfunde!

Melodie: Henry Valentino - "Im Wagen vor mir"
(Er:)
Im Waage vor mir sitzt e jungi Frau.
Sie schynt seer scheen z sy und au no seer nätt.
Ich glaub ich glopf an iiri Autischyybe und frog sii ob
sii ägscht Zyt fyr e Kaffi mit mir hätt.

(Sie:)
Im Waage hinter mir starrt mi e Typ aa.
Ich bi mir ziimlig sicher i kenn dä nid.
Jetz kunnt är uf mi zue und glopft an d Schybe, jemmer nai
Är gseet aber no guet us und no fit.

Zerscht hets e Kaffi gä, denn e feins Ässe.
Druf aabe no e mäng romantisch Nacht.
Sinn zämmezooge, hänn d Wält beraist und pletzlig het är iire
Uf de Maledive e Hochzytsaatrag gmacht.

Der eldischt Soon dä isch Profässer woorde.
Und d Dochter hänn sii bsuecht, die woont jetz z Wien.
Denn sinn sii wiider in iiri Auti gstyyge und gurz druff
Zaigt d Amble am Banggeplatz ändlig grien!