Bebbi Bängg

Basler Schnitzelbägg

Wyybuure 2022

D'Fäärs mit Helge vo de Wyybuure kasch uff https://wyybuure.ch/2022/ aaluege.

An der Herbschtmäss frieener hets e mängg Kuriositäte gee.
Deert hesch e zwaikepfige Maa und au Amphibiefraue gsee.
Kuriosi Mensche gits deert nimm, aber fyr die, wo so ebbis wänn:
Hyt gits Männer wo iiri Gloggen uf de Schulteren oobe hänn.

„Hey Fritz! Wo blybsch?
Mir sinn vo de Kääsküechli zu de Frieeligsrolle gloffe.
Und hänn no deert bim Chaletstand 13 warmi Holdrio gsoffe.
Syt zwai Stund bisch uf der glyche Baan, mir bstelle jetz no baar Stange.“
„Ich wär jo scho lang bi euch, aber das Schyssbändeli het sich verfange!!!“

S Schwyzer Pandemiekonzäpt isch s beschte wyt und brait.
Das hänn mir letscht Joor au do däm Hygienehaini gsait.
Noch ere Halbstund schwätze hänn mir gfrogt, ob är e Ziggi mag.
Wo kai Antwort ko isch, hänn mir gmerggt: Daas isch e Bebbi-Sagg!

Sali Hans
„ Du loos was machsch eso? Hesch welle kommentiere?“
„Jo mir sinn do bi der Rosetalalaag bitz am spaziere.
Ou do het e Ziircher sy Masgge ligge lo“ - „Muesch doch kai Saich verzelle!
Waisch jetz sinn doch sicher graad die vom Knie am Zält ufstelle!“

Nach em Homeoffice goot der Andi Gen ins Fitnesstudio „Task-Force-One“
Sufft Spike-Protein, boosteret syni Musggle und schreit derbi lut „Wuhaan“!!
Derno springt är in de Pooling, schwimmt Roche 10 Längi, ass es nur so duet spritze!
Dernäbe sitzt die hibsch RNA, dringgt Corona und sitzt dangg iim jetz in ere Pfitze.
Obwool sie scho yber Quarantäne isch, wirggt sie gaar Moderna und der Andi wird spitz.
Är sait zu iire: „Pharma zu mir hai, in Isolation, oh Sie mi Virus vo Bümpliz.
Won är dehei sy „Pfitzer“ uspaggt, do isch es denn bassiert:
Statt mit eme haisse Zoom-Meeting wird sie mit eme Lock-Down konfrontiert.
Är schluggt Tablette vo Biontec, macht e Sälbschtescht und fyylt sich wien e Klon.
Sie maint „Novartis bitzli ab“, doch sy Pfitzer gseet immerno us wien e Rosynli-Mutation.
Sie sch-impft mit iim: „Sie mien halt nid so viel Chemie schlugge, Sie glatte Klaus!
Ich faar jetzt nach Omikron zu de Zwilling Johnson&Johnson und Sie…
Bleiben Sie zuhaus!!“

Unser Gitarischt het yys grad Letschti, allem Änd
Gsait är fyyli sich als Frau, zu Vierevierzg-Prozänt.
Jetz daarf är schynds im Storche-Paarking, duet är ys verzelle,
vo Zwai bis Acht sy Auti uf e Fraueparggplatz stelle.

Unser Gitarrischt het mit sym Laptop us ere Barragge
Sich in Karli Odermatt sy Compiuter kenne hagge.
Denn isch am Gitarrischt sy Laptop von ellai in Schoofegg gloffe
und isch abgstyrzt…

„Sali Hans!
Du, loos mi Frau het wäg der Pandemie glaub afo spinne!“
„Kai Wunder d Lyt hänn Zyt verbrocht, fascht immer numme dinne.“
„Syy het mir uf e Zeedel gschryybe, mit dunggler Bleiystiftmiine:
Schatz, ich bi bim Psychiater… s Ässe isch in der Wöschmaschiine.“

Du ......... di....... uet,....... aisch..........etz........... nämmli
Mit ........ kaufsgugg..........laade............er Drämmli.
Am................ich...............eeter a..............oorg............. Schatz.
Der........pfang........mega.........lächt.......steen do.......Määrtplatz.

Dass d Primate yys sehr äänlig sinn, das gseet me däänen a.
Die hänn zu 98% die glychi DNA.
Dass sie vor em Gsetz glyych wie mir sinn, fände mir nid schlächt.
Will bi unserne Bankchef-Affe wär daas nyt als guet und rächt!

Als Wyybuur dängge mir modärn und sinn letscht Joor gedyyge
Mit ere eigene Kryptowäärig in Wältmäärt yynegstyyge.
Mir hänn das in ere Beiz denn gfyyrt mit Bier, Wyy und Schnaps im Tee.
Und do druff do ka me guet, unsere Haiwääg gsee.“

Unseri Schwyz het mit der EU grad vertraagligi Brobleem.
Vor allem d Wisseschaftler und au d Forscher klaage do extreem.
Do miesst sich d Schwyz e Byschpyyl nää am FCB in dääre Laag.
Heyoo der FCB dä het e laufende „Rahmen-Vertrag“.

„Der Joel Thüring vo der Basel-Städter SVP.
Ka me in der Zytig und uf TeleBasel gsee.
Egal ob me ab iim e Freid het oder gaar au Wuet.
Daas do ka der Joel Thüring, also wirgglig guet:“
Prooossscht zämme!

S Masgge-Liedli (Melodie vo „Dr Sidi Abdel“)

Am Morge bin i gloffe wien e Lama.
In d Migros und dört han i im Pyjama.
Hinter der Schutzmaskee,
Zwei schöni Auge gseh.
Das isch der Afang worde vo dem Drama.

Sie het mir gseit ich soll doch nid so gaffa.
Ich wäri nid ihr Typ will dick und schlaffa.
Ich gfalli ihre nid,
Sie heig lieber Covid,
Als müesse mit so eim wie mir go schlafa.

Uf son e blödi Abfuehr gang i nid y.
Und ha ihre denn gseit, dass ich no blybi.
Do schreit sie eins zwei drei
Und scho kunnt Polizei.
Ich lueg sie a und sag, sie übertrybi.

Paar Tag spöter lauf ich mit Zigarra.
Über Wettsteibruck wie e Dromedara.
Do han ich sie wieder gseh,
Bim demonstrieree.
S isch d Sibel Arslan gsi ohni Maskara.

Dass sie kei Maske a het isch nid gschidi
Sag ich zu ihr, und sie seit „was fallt dir y“!
Do schrei ich eins zwei drei
Und scho kunnt Polizei
Sie luegt mi a und meint, ich übertrybi.

Doch wenn es Nacht wird über der Clara,
Lueg ich der Mond am Himmel häll und klara.
Und truur denn hie und do,
De schöne Auge no
Und dänk so Maske sinn e grossi Gfahra!