Bebbi BänggBasler Schnitzelbägg |
|
Wyybuure 2024
D'Fäärs mit Helge vo de Wyybuure kasch uff https://wyybuure.ch/2024/ aaluege.
Lut Statistigge isch Basel-Stadt, das isch doch glatt e Witz,
Die gwalttäätigschti Stadt…schiinds, vo der ganze Schwiz.
Daas isch doch nuur Angschtmacherei. Glaubet joo nid dra.
Und falls doch… no kennet iir jetz baar uf d Schnuure ha!!!
Me wott en nid als Bundesroot, au wenn är s gärn wär gsi.
Die aigeni Partei, wär froo, är wäri nimm derby.
Das zaigt wie schwär s aim in der Schwiz immer no ka go,
Wenn im Familiename ganz am Änd en „itsch“ duet stoo.
„Sali Hans, wie goots?“ - „Gaar nid guet. Mi Laptop het sich erhängt.“
„Wie isch denn daas passiert?!“ - „I glaub i ha der Raame gsprängt.
Ha am KI - Programm en Ufgoob gstellt. Nur e kurze Satz:
- Löse bitte das Verkehrsproblem am Aeschenplatz. - “
Mit Lamborghinis und Ferraris, daas isch ebbe s Dumme,
Au mit Whirlpool duss im Gaarte, kriegsch kai Frau me umme.
Gucci-Täschli und Schmugg dien hytte d Fraue nimmi raize.
E Chance hesch nuur, wenn dini Woonig uf 20 Grad kasch haize.
Mit der Duube-Initiatiive, wott me d Duube reduzieere.
Das goot nuur, wenn me iiri Paarigsluscht ka minimieere.
Das glappt guet mit däm neue Song do vo der SVP:
No sinkt zwor d Aazaal Duube, doch sii schisse zää Mol mee!
„Hallo, do isch der Bäärgproktoloog, der Doggter Alp am Apparaat“
„Guete Daag i bi der Gotthard, i lyt a wääg em Resultaat.
I ha doch die duurverstopfti Röhre“- „Jesses jo, s isch zem vergässe.
Do hilft nur Ains: Sofort weeniger Holländerli und Schwöbli frässe!“
Wo der Jans zem Bundesroot gwäält worden isch, s isch wunderscheen.
Do het me gsee wie syni Frau und Kinder zun em steen.
„Doch wo me miii zem Presidänt gwäält het, do hersch mi Frau nuur motze.
Statt stolz sy uf der neui Bierzapfpresidänt im Ochse!!!“
Fyr der Wyybuurekaländer hänn mir füüdleblutt posieert.
Mit unserne Ränze in de Rääbe hänn die uns fotigrafieert.
Uf dääne hochufgleeste Feteli hänn mir, das macht yys froo.
Erlychtert kenne gsee: Es isch no alles do!!!
„Du Hans i stegg in Brüssel fescht und mecht uf Basel zrugg!“
„Worum bisch du denn z Brüssel?!“ - „Jo, wäg der Margrethebrugg.
Well sy jo gspeert isch, bin i dangg eme Menscheverstand - e gsunde -
Mit em Auti undeduure, uf s Glais ko und ha bis jetz kai Usfaart gfunde!!“
E huffe Lyt wänn d Fasnachtsdääg au vo dehai us gniesse,
D Bilder live vom Cortege dien iir Alldaag grad versiesse.
Der Cortege miesst am beschte duur d Dreiroosenaalag duure.
So gäbtis mol en Ufzaichnig, wo der Dani nid heersch schnuure.
Mit Cola, Popcorn und baar Nachochips mit Cheddar-Dip,
Luege die der neusschti Krimi-Thriller-Action-Hit.
Sie gniesse d Schleegereie und zelebrieere jedes Krache.
Das sinn do d Schugger wo d Dreirosenaalag yberwache.
D Esther Käller het der Schuggerei verschreggt delifonieert.
Sie haig e Randalieerer gsee und wär vellig schoggiert.
Dä haig do iiri Beimli gnoo und gryfft Persoonen aa.
Do sait der Schugger: „Liebi Esther, dasch nuur der Wild Maa!“
Mir sinn grad letschti am ene Kongräss gsi, wunderbar.
Deert het der Reinhold Messner gschwätzt, dä Bärgstyyg-Superstar.
Und het vo synere Expedition in Basel brichtet,
Är heig deert wirklig und ganz kurz, e freie Parkplatz gsichtet.
Beize-Lied
Melodie: Mani Matter, Wilhälm Täll
E Beiz isch gstoorbe z Basel-Stadt, an d Beäärdigung sinn s ko.
Der Papa Joe dä stoot zer Mägd und sait „Hallihallo“.
Der Alexander bekunnt das mit und wird zem Wilde Maa.
Voll Leuezorn gryfft är zem Bääsestil und hebt sich dra.
Der Mister Pickwick will Harmonie, hebt e Walliser Kanne und sait„Proscht“
Do kunnt d Lilyi’s us em Holzschopf grennt, wie „die alti Post“.
D Eintracht isch ändgyltig verbi, d Liliy’s rennt zem Mister Wong.
Und zieet an sym alte Schluuch, do gits em grad der Gong.
Do kunnt der Vito us em Schützehuus und sait gar lut „I wett..
I bi der ainzig Hans im Glück, wo der lengschti Schnaabel het!“
„Nur mit ere Latini“, sait der Donati dä Spruch hät är gscheiter glo.
Jetz hänn sich alli im Lotus Garden mit alte Stöckli afo schloo.
Da Roberto isch bsoffe im Viertel Kreis torgglet und denn in Schnydersitz.
Är sait Zum Tell „Hesch du gwisst, ich wird mit Cafi Spitz.“
Do haut em der Tell mit em Roschtige Anker voll ains ins Torstübli dri.
Die Beize-Schlacht isch eskalieert und pletzlig isch s ruuig gsi.
Es sinn Beize gstoorbe z Basel-Stadt, an d Beäärdigung sinn s ko.
Die wo s Ganzi yyberläbt hänn sinn do zämme ko.
Migros, Coop und Gastrokettene, hänn gwäält und daas no ring:
Ab jetz isch z Basel der Mc Donald der woori Burger King.