Bebbi Bängg

Basler Schnitzelbägg

Familie M. Steiner 2019

Mir sin genau so wie mir sin denn wie mir sin macht Sinn,
und sin mir nit so wie mir sin denn isch kei Logig din.
Drum sin mir lieber eifach so und mir wurde wette,
ihr sind doch lieber au wie ihr - und nid wie d`Bätschlerette.

Truurig und voll Wehmuet sin mir über d`Muba gloffe,
noch über 100 Joor kunnt s`Änd das macht is sehr bedroffe.
Mir hoffe uff e neui Mäss mit Ussteller e huffe,
dört kaufe mir zwar wider nüt - drfür kasch gratis suffe.

Franggryych ziet dr Stegger z`Fesseheim im AKW,
und im Rhyy do kasch im Summer fascht dr Boode seeh.
Drum spaare mir deheim jetz Stroom ihr sottet das au iiebe,
sunscht mien am Änd die arme Schugger - ihri Tesla schiebe.

Mir sin nach Russland und hän d`Schwizer Nati unterstützt,
und freudig gstuunt wie Schutte doch bim integriere nützt.
Unsri wilde Männer staargg wie Löie spiile d`Gäägner stiff,
und zum Abschluss macht dr Xhaka denn - no ein uff Vogel Gryff.

Dr Almi und dr Salvi die hän in de letschte Joore,
noch Zaanlugge und Ranze au no s`Publikum verloore.
Jetz sin si im Europapark als Retter anngaschiert,
e kurze Uffdritt längt - und scho isch evakuiert.

D`Kinese mergge uff em Mond, dasch sensationell,
die dunggli Syte isch nit dunggel die isch nämmlig hell.
Viil heller seht`s jetz au dr Brunner är het`s ändlig tscheggd,
si Kopf het z`lang im dunggle - Hinderdeil vom Blocher gschteggd.

Am Dorf-Turnfescht verkauft bi uns d`Fraueriigi Löösli,
„jedes Loos e gwünn“ verspricht im Babbe s`Maier Röösli.
Im Dorf do lauft`s halt gliich wie das bim FC Basel isch,
bim Fescht mien d`Fraue schaffe - und d`Niete sin am Disch.

Dr Donald lüttet ganz nervös sinre Melani-a,
und brichtet vomne Gschbrööch mit em Bresidänt vo Kiina.
Im Land vom Drache sige si jo au nit viil Humaner,
die hän scho lang e Muure - und drum keini Mexikaner.

Noch de Gschbrööch mit Kiina haut dr Trump dr Wessels a,
ob denn Basel au Broblem mit Mexiko wurd ha.
Är findet drum die hooche Muure z`Basel wunderbar,
Herr Trump das sin nit Muure - das sin unseri Drottwaar.

Noch sim Schiffbruch mit em Fischerboot het är neui Blään,
dr Silberiise d`Mamme freut`s wird Draumschiffkapitään.
Und falls är dört au Schissdrägg baut hän mir dr Verdacht,
är kennt dr Hampe Wessels - dä weiss au nid was är macht.

Ihr könneds alli glaube s`isch uns wirgglig ganz egal,
ob öbbis koscher broduzierd isch oder au halal.
Mir finde multikulti guet Rassismus ligt is färn,
mir hän dehaim halt eifach - Toblerone nid so gärn.

Bim Alkohol und Fleischkonsum setzt d`Mamme jetze Gränze,
es stinggt ihre drum rächt dehaim die Männer-Flatulänze.
Doch sit me wiili miffeleds nach richtig miisem miif,
underem Sofa liggd vergammlet - e Versichrigsdedektiv.

Mir foordere dr gliichi Loon ob Frau bisch oder Maa,
nur dien si das schiins nit emool im Bundesroot so ha.
Und wurd me sii emool wääle dört denn sin mir gspannt was goot,
bekunnt d`Martullo Loon - als Bundesröötin oder Root?

Bis z`letscht het är alles gä und alles uusbrobiert,
und bis z`letscht het är die halbi Schwiiz terrorisiert.
Bis z`letscht het är nit gmerggd, das si ihn zum Duubel macht,
ihri Vorwahl die isch eigentlig - 078.

Unsre Glai do mit dr Punkfrisuur, lehnt sich gärn mol uff,
nid nur gege d`Ornig und s`uffruume vo sim Buff.
Är het au an e Demo vo so gääle Weschte welle,
drbi sin das in Basel nur - BVB Baustelle.

Jetzt brenne d`Staffeleie vo Kliilützel bis Chiasso,
si renne und si schreie s`git Scharmützel dangg Picasso.
Blutti Brüscht im Beyeler jä d`Stimmig isch am Koche,
und well`s z`Basel haiggel wär - fäält s`schwarze Bild mit Knoche.

Dr Babbe meint i ha dr längscht dr Jung seit nei s`isch miine,
im Opi sin dä isch zwar schön nur leider biz e kliine.
Ihr dängget alli rächt versaut bim wär dr länger hett,
im Värs goots nur um s`neue - Basler Hoochhuusbau Quartett.