Bebbi BänggBasler Schnitzelbägg |
|
Giftnuudle 2015
Es sait dr Phaapscht me deerfs nid wie d “Karnickel” dryybe
was het er geege d Hääsli, het er jetzt e Schyybe
wenn’s Haase rammle yym nid basst, mer miens verhiete
sunscht will er bletzlig au no Ooschtere verbiete
E neii Nazi-Himne will me komponiere
e neii Melodyy und Wort drinn ussbrobiere
i waiss halt numme nit, was sell denn das au bringe
will unsri Nazispiiler kennte s ee nid singe
D Soziaalempfänger deerfe wider Auti faare
e Gricht het gmaint e jeede bruucht si aigne Kaare
das macht au Sinn, main i ganz verstoole
so mien si nimme mit em Taxi s Gäld go hoole
Es sait dr Roger Schawinsky zem Andreas Thiel
äär syg e A-loch und das wäär nit mol z vyyl
au dr Mörgeli mischt sich yy, i gha s nit fasse
das duet doch hoorgenau ze allne dreyne basse
Bi Inter Mailand isch dr Shaqiri schon e Held
e baar Millione griegt er dert wie me verzellt
e Weermuetsdropfe gitts, äär rysst scho bizz e Schnutte
jetz muess dää aarmi fir das bizzli Gäld no schutte
Bi soo K.O. Dropfe liggt d Wirggig uff dr Hand
s Hirni schaltet denne uss das isch bekannt
bim Eric Weber duet sich s laider soo verhalte
doo wäär me gottefroo s wuurd ändlig mol yyschalte
D Schotte blyybe jetze doch bim Keenigsryych
au bi de baide Basel blybt jetzt alles glyych
dr Wessels blybt au wyterhyn bim baue flyssig
und dr Blatter blybt no bis zwaiduusig dryssig
S Spyyl Monopoly isch lengschtens scho passé
au Kartespyyle duet efang fascht niemer mee
au d Zauberwirfel findet kaine me so gail
es spyyle alli numme no Eile nach Weil
Ganz huffe Schieler dien sich jetze schyynts beschwere
will si in dr Schuel firs Lääbe nyt dien leere
drum schloon i dringend voor, joo das wär i guet
me wuurd ne zaige wie me s Händi abschalte duet
Dr Hansli kunnt in d Schuel dr Leerer griegt e Wuet
will dää sich jetze wie ne Maitli schmingge duet
bisch Du e Wyybli oder Maa froggt äär dää Burscht
doo sait dää nur das isch doch miir Conchita Wurscht
Bi dääne Selfies doo wird yych immer root
voor allem wenn s um gwissi Keerperdaili goot
wuurd yych ains schigge, kääm d Antwoort: “He Du Pfluume
yych gha druff gar nyt gsee, kennsch mer s bitte zoome”
Dää Sado-Maso Film “Fifty Shades of Grey”
setzt bi de Fraue grad enormi Gedangge frey
ganz bsunders Handschälle sinn doo dr letschti Schrey
drum wänn jetz alli Fraue zue dr Boolizey
Me sait s git Droone, die dien is iiberwache
yych ha doo ghai Brobleem, i kenns jo, muess i lache
gang yych uff d Gass und kumm denn hai so noo de viere
isch mi Droone scho im Huusgang am Rottiere