Bebbi BänggBasler Schnitzelbägg |
|
Giftnuudle 2016
Yych bi dr Raschty und das dr Luc my Frind
ass miir zwai Schwyzer sinn das gseet e jeedes Kind
wägg unsre Hoose mache sy son e riise Gschyss
jetz hämmer halt e Hanfblatt druff statt Eedelwyss
De bisch en eggelhafte Siech und findsch dy toll
duesch gärn e Jointli drille und bisch ständig voll
es goot dr alles am Aarsch verbyy, es zellt nur Bares
jo denn wirsch sicher au emol “Schweizer des Jahres”
“Mer mache dicht” oder haissts nid “miir dien zue”
dää Unterschiid losst is syt aafangs Joor ghai Rue
bim Fasnachtskomytee doo gseeschs doch goppelony
zue sinn sy maischtens, aber ganz dicht sinn sy noony
Wo d Terrorischte iber dr Zoll sinn zue n ys ghoo
het me se gfroggt: Hänn iir au Waare mit eych doo
e paar Kalaschnikov isch d Antwort ussem Kaare
druff sait dr Zellner: Aha ghai Flaisch, iir kenned faare
Mit mynere Frindyn laufts laider nimme guet
I waiss nid wien er es saage sell, ha gar ghai Muet
zem Gligg gitts ändlig Abhilff fir my Händykäbb
fir ebbys gitts en jo dää Basler Abfuehr-App
Unser Basel muess sich gottvergässe loone
schänggt em Baselbiet grad achzig Millione
die bruuche s Gäld fir all die Mässer umsveregge
wo sy uns bi näggschter Gläägehait in Rugge stegge
Syt langem sinn mer uff der Suechi nooch me Job
jo lueget ys aa so nimmt ys nur e “Coffee Shop”
im Baselbiet het s doch no glappt, e Stell isch frey
mer sinn jetz Indoorgärtner bi dr Boolizey
Unsre Regierigsroot dr Brutschin hänn sy gheert
lauft in e Drämli vo dr BLT, sisch gsteert
doch jetzt kunnts uss äär het ghai Schuld, s liggt uff dr Hand
s isch nur e fyyse Aaschlaag gsii vom Baselland
Unsery Wält isch grangg, soo gitts emol e Gnall
Flichtlingseländ und Terror iiberall
ai Liechtbligg gitts won ys Gliggseelyghait duet bringe
he dr Bo Katzmann heert jetz ändlig uff mit singe
Bi gescht go lauffe mit mym Hundeli em Baschty
ha zue nem gsait mer geen in d Stadt, y iiberrasch dy
am Spaalebäärg luegt äär my aa, y sett mol saiche
no goot dää Poller aabe und nass sinn myny Schaiche
Dr Ryym isch ganz banaal, dr Rhythmus schlächt
au ally Pointe sytze aifach nid so rächt
isch doch egaal, y schigg das isch my Driggli
alles ans Drummeli, hejoo fiir s Raamestiggli4
dr Donald Trump verdient nur Hoon und Spott
d Merkel verzellt fang huffe Schrott
dr Obama am Aendi vo sym Trott
dr Hollande, dää waiss nid was er wott
dr Tsipras und Griecheland banggrott
dr Erdogan und Putin liebe Verbott
hejoo doo kaasch am Aend, uns goots efang esoo
an unsrem Baschi Dürr scho wider Fraid bikoo