Giftnuudle 2017

Menü:
»Giftnuudle
»2017
»2016
»2015

Bim Schneider Ammann mecht i härzligg mi bedangge
Fiir syy Färnsee-Aaschprooch grichtet an die Grangge
wennd en gseesch und reede heersch so monodoon
denn waisch miir Schwyzer hänn jetz au e Horrorgloon

Was nid vergässe derfsch das isch derbyy no s Scharfe
dr Johann bruucht derzue jo nid emol e Larve

Me sait dr Frytigg, dr dryzäänt isch e Daag
wo me muess Voorsicht walte loo in jeeder Laag
au s mindere Basel settsch denn myyde, im Vertraue
sunscht wirsch wennd Bäch hesch no vom Wilde Maa verhaue

Im Basler Zolli het s e Umfroog gää bi de Affe
wie si d Mensche finde wo si dien begaffe
die syyge langwyylig, e Mängge ooni Reegig
si fraie sich uff d Velobrugg das gitt Beweegig

Humoor und Sex das kunnt bim Publikum guet aa
Humoor und Dier fir das sinn alli immer zha
Humoor mit baidem das isch scho bizz e haisse
gfeerlich wird s denn aber erscht efang mit Gaisse

Die maischte Lyt findes e ryysegroossi Schand
ass dr Trump fir gwissi d Yyrais stoppt ins Land
grad an dr Fasnacht kenne miir yyn bizz verstoo
miir sette nämlig d Zircher au nid yyneloo

Miir hänn ghai Instagram Account, sinn ghaini Blogger
und au das bleede Facebook haut is nid vom Hogger
miir bruuche kaini Tweets und Posts wo jeede maag
s ainzig wo mer amme hänn isch e Hasch-Daag (Hashtag)

D Quändelschnägge vom Margarethestich
mien bald uff Lieschtel zie das goot ne geege Strich
wills Dram dert uffe faart mien die in d Pampas wägg
doo saag i numme Gott sai Dangg bi n yych ghai Schnägg

Wos en s erscht mol gsee het, mis Gottekind
froggt si: “Was isch das gääle derte uffem Grind”
und wo si denne gaanz nooch am Färnsee gläbt
schreyt si bletzlig: “Kumm go luege, i glaub das läbt”

Myy Schwyygermamme het kirzlig mit em Kaare
vo dr Wettstaibrugg zem Baanhoof welle faare
am Aeschegraabe, wägg dr Baustell dääre tolle
kunnt si in Graisel und isch syythäär verscholle

D Frau Burket sait: In d Syydschwyz aabefaare
das kenn si sich bigott vo jetz aa spaare
si haig zwoor im Tessin scho eewig lang e Gotte
doch syyge derte jetze Burkarts schyynts verbotte

D Regrute selle hitte nimm belaschtbar syy
das mäldet s Milidäär und ruumt au Fääler yy
drum het me jetzt im Dialoog ganz unverdrosse
doo baar wunzig glaini Aendrige beschlosse:

dr Moorge-Apäll dää fallt ewägg und das Ruggzugg
will denn kääm jo dr erschti erscht vom Ussgang zrugg

es gitt ghai Fäldwaibel me, wo si duet stresse
jetz gitts zer Oordnigshilf fir jeede Maa Hostesse

fertig luschdig isch jetzt au mit Exerziere
hütt haissts het ebber Luscht no geemer go spaziere

dr gruusig Panzerkääs dää blybt ene erspaart
d Soldaate ässe hittzedaag nur à la Carte

und fyylt sich aine in de Schue nid wool, duet hingge
denn gitts statt Naagelschue derfiir jetz rosa Fingge

Wennd “Wind und Rääge” hassisch muesch es numme saage
denn muesch ganz sicher niemols me e “Sturmgweer” draage

d Kischte gitts au nimm die Zyte sinn verbyy
die ainzig Kischte fangsch dr hit im Ussgang yy

wäär jetze maint das Ganze syyg erschreggend
yych saag drzue nur ains Schwyzer Army second