Bebbi BänggBasler Schnitzelbägg |
|
nonnkonform 2024
Unser Glooschter spyyrts grad finanziell,
D Kiirchenustritt hän sich letschtjoor verdreifacht.
Dr Kiircheroot het fir uns ganz speziell,
E Iibernaam arrangiert iiber Nacht.
S frogt sich jetzt nur no, ischs Fluech odr Sääge:
Kauft het is nämlig dr David Dääge!
Jetzt wänn si d Kinder mit Brobleem nim unterrichte,
Das syygi z schwiirig heert me d Leerpersone brichte.
E Glaiglass wurde mir no naime anderscht gsee:
Im Groosse Root - fir die ganzi SVP.
S Baudep. het an dr Spitze e blonds Gschepf.
Die ka nit vyyl, doch sii het scheeni groossi Depf.
Sii macht voorwäärts, git em Klima eppis zrugg,
Und stellt die Depf mit Baim dinn uff d Dreiroosebrugg
D Sahra Waageknächt isch ganz e bitz narzistisch,
Si git sich linggs, doch d Argumänt: rächtspopulisitsch.
Fäält an iirer Syte no e stargge Maa,
Kennt si us dr Schwyz ganz gärn dr Jositsch haa.
E Skandaal, Korruption im Bundeshuus
E kaufti Waal - in dr Schwyz, es isch e Gruus.
Gisch dr Buurelobby, jo do seen mir root,
Zwai, drei Läggerli und scho bisch Bundesroot
D Dorothee het welle KI usprobiere,
Sii frogt GPT wied s Glooschter kenntsch saniere.
GPT maint s Potential, das syyg immäns,
Vyyl Profit wär meeglig mit däm “Only Fans”.
D Schweschter Erika frogt Chat-GPT,
“Was isch dr Sinn vom Lääbe?” git si haimlig yy.
Die KI antwoortet saudiräggt: “Hösch Digge!
Dr Sinn isch Suffe, Frässe, Lache und au - Strigge”.
Barbie isch letschtjoor grandios im Kino koo,
Mir Nonne hän en gluegt, mir hättes gscheiter gloo.
Het dä Film do inne epper kenne gniesse?
Uns erstuunts nit, het denn s Pathé miesse schliesse.
Dr Elon Musk, dä Seggel, hän mir nit so gärn.
Dr Mars besiidle, nai das ligt uns Nonne färn.
Mir sinn beschaide, mien nit uf e fäärne Stärn.
Es längt is, isch e Baasler ändlig wiider z Bärn.
Dr Globus het die Globi-Biechli jo erfunde;
Im neischte Band draait är do z Baasel syni Runde.
Abentüür vom Määrtblatz bis zum Käppelijoch,
Und dr Titel: “Globi und das schwarze Loch”.
Faasnachts-Euphorie
Z Baasel an mim Ryy
Mir steen do inkognito
Dien s Joor revue bassiere lo:
D Margarethebrugg
Het e Schruube lugg.
S draut sich niemer iibre z goo
D Kroo isch dumm am ummestoo.
1. Mai, s goot loos
Friidlig uf dr Strooss.
D Schuggereymaa stoot uf Gfächt
Gummi geege Menscherächt.
In dr Falknerstrooss
Stuune Glai und Grooss:
Nai, was gseet me Drämmli stoo,
Grien und gääl, s faart kains dervoo.
D Credit Suisse isch wägg,
Am Banggverain blybt Drägg.
D UBS stygt jetzt in d Hoose,
Duet di räschtligs Gäld verbloose.
D Stadt scheen grien mit Baim,
Blyybe fiechti Draim:
D GLP, grau-liberaal
Teer und Beton iiberaal
Es sinn die drei scheenschte Dääg
D Lyt sinn entsprächend zwääg
Me drummled, pfyfft, luegt dief ins Glaas
Dr liebi Gott verzeit eich das
Z Baasel an mim, z Baasel an mim Ryy
Gänd is Nonne, gänd is none Wyy!