Bebbi BänggBasler Schnitzelbägg |
|
nonnkonform 2022
Euphorie, d Pandemie isch verbyy.
Clique, Bängg und Gugge, alli sin derbyy.
Nur kai Wääge, jo d Regierig wills eso,
Will fir d Ländler hets halt zweenig Parkplätz do.
Dr Buechstaabe G isch dr Gwinner vom Joor:
5G oder 4 als Empfang isch nit lätz.
Und d GGG z Baasel, me kennt se, nit woor?
Glanz und Gloria, 2G plus Gschwätz.
Ai G blybt e Räätsel wies uns Nonne dunggt:
Wär zaigt is jetz ändlig dä hailig G-Punggt?
D Schweschter Fränzi, die isch jetz richtig froo:
Denn scho glyy mues si nym ins Konsi goo.
Ire Cognac ka si bald im Migros haa,
Do fääle nur no Ziigis, Pille und e Maa.
D Britney Spears isch wiider frei, das isch famos,
Und ire Babbe isch scho nimmi arbetslos.
Si neie Mindel isch, jä de lachsch di schlapp:
Dr Marco Rima, dä het au en Eggen ab.
Wäälsch nid linggs und de bhauptisch sygsch nid rächts.
Hesch Angscht vor neiem, denn basiert nur eppis schlächts.
Gosch nym ind Kiirche, duesch am Sunntig lieber fitte.
Denn roote mir, wääl doch die nei Partei: «Die Mitte»!
D Schweschter Dorothee isch digg, do wird is iibel.
Fascht so digg, wie die neien Abfallkiibel.
Und gnau die bruucht si zum, nach jedem feinen Ässe,
Iri zusätzlige Kilo zämme z prässe.
Alli deerfe in dr Schwiz jetz nei hyyroote,
Hinz und Kunz gän sich grad s Jo fir unsri Quote.
Jä, das frait d LGBTQIA+ Community,
Laider sin mir Nonne noni mit derbyy.
Dr FC Baasel wird no Maischter in däm Joor.
Das hänn mir online gseh, also isches woor.
Irgendebber sait scho was me heere wott:
Russia Today, Stricker TV – odr Gott.
D Schweschter Erika gseet nymmi wyt,
Im Augespitaal untersuecht me si schnäll.
S syg nid eso schlimm, das verhailt mit dr Zytt.
Vyyl draagischer sin die nit hailbare Fäll.
Wiescht, die Patiänte: rächts blind und kuum Kraft,
Kai Wunder, si schaffe fir d Staatsaawaltschaft.
S Glooschter-Marketing het von is Nonne welle,
As mir als Wäärbig in dr Freie bätte selle.
D Schuggerei het gmaint, as mir das siiloo sotte,
Will do z Baasel isch das Bättle jo verbotte!
S hän zwai Nonne letschti Ferie
E Pilgerreisli welle mache.
Und das z Fuess duur d Pyrenäe,
Das isch doch nit ganz bache!
Dr Jakobswäg, hui! Zimmlig sportlig,
Fir das sin die Daame z fett!
Staarte dien si drum, mit Cüpli,
Z Baasel vorem Easyjet.
«Hesch di teschtet fir dr Abfluug?»
Frogt die aint die ander Schweschter.
«Wie? Was mainsch?» froggd die denn zrugg,
«I ha mi Pass, bi nit vo geschter!”
«Hä? Was haisst das?» sait die eerschti,
«Fir die Reis bruuchsch 2G plus!»
«Isch doch mir gliich, ych bi gimpft,
Und zwaar mit fimftem Booster Schuss!»
«Ych verstands nid», sait si witer,
«Worum du nit? Bisch drgeege?»
«Waarts nur ab!» sait do die Eerschti,
«Du gosch gli druff, ych kas beleege!
Und wennd nit stirbsch, denn hesch e Chip
Vom Gates im Bluet, druff dueni wette!»
«Wie? Was saisch? Du hesch kai Aanig!
Nur die Impfig kan is rette…»
«Bruuchsch 3G und au e Masgge,
Abstand halte», sait dr Bund.
«Nai, kai Masgge, aber 2G»,
Git kuurz speeter Baasel kund.
«Was mir bruuche isch e Loggdown,
Aber d Schuele blyyben offe.»
Bi däm Ganze bliggsch nym duure,
(Und mir hän no gar nyt gsoffe.)
Abr s Traagisch an dr Gschicht,
Das isch aigentlig jo numme:
Bisch gnueg lut, wird uf di gloost,
Und gwinne dien am Änd die Dumme.
Dr Wisseschaft wird klaar missdraut,
Und niemer wais dr wirgglig Grund.
Drum saage mir an dääre Stell nur:
«Scheeni Faasnacht, blyybet gsund!»