Bebbi BänggBasler Schnitzelbängg |
|
nonnkonform 2026
Mir Nonne sin modärn, doch Vyyles blibt bim alte:
Uf d Gneu go zum Bätte, Begryzige, d Händ falte.
Wenn das alles machsch, kunnsch safe mol in Heaven,
Wieso waiss kai Sau, genau wie bi «six, seven».
D Erika und s Fränzi, die hän e riise Grach,
Si gän sich verbal und au mit Fyscht ufs Dach.
Si gingge, gratze, haue und sin drum klaarerwyys
Baidi nominiert fir e FIFA-Friidensbryys.
Wie gseet me, dass d Schwiz mit Erfolg verhandlet het?
Es git e Kompromiss, ooni Gschiss und denn Raclette.
Wenn das mol nit hilft, bruuchts zuesätzlig Charme:
E Rolex an Arm und e Barre Gold in Darm.
6, 7 Schruube und 15 Scharnier,
Bruuchsch Haissliim und Bostitch und Neegel, 3 bis 4.
Zem sälber zämme baue, d Aalaitig isch myys,
So gits die Kampfjet no zum fixe Bryys.
Dr Wladimir Putin, dr Recep Erdoğan,
Ali Chamenei, Kim Jong Un, Viktor Orbán.
Sin gaischtig verwandt: gruusig und fyys
Und drumm hän die bald e FIFA-Friidensbryys.
Mir Nonne gönn allewyyl ins Joggeli an Gingg,
Deert lyychtet dr Himmel fir uns zoobe pingg.
Sins d Noordliechter odr ischs dr Raase wo bliet?
Nai, s isch dr Shäq, wo vor Wuet nocheglieht.
Z Baasel im Museum, do gseesch dr Minschterschatz,
Im Tower of London hän d Kroonjuweele Blatz.
D Mona Lisa hängt im Louvre z Paris,
Doch nur dr Donald Trump het e FIFA-Friidensbryys.
Die Buesse z Birsfälde, die bruuchts geege Stau,
Mir Nonne im Glooschter, mache das jetzt au:
Bi uns ischs aber umgekeert; es griegt Wyy und Brot,
Wär länger als e Viertelstund dr Gottesdienscht yyberstoot.
Im Superblock im Santihans do hesch dini Rue,
Das Faarverbot, das setzt mängem Autifaarer zue.
Dängget an d Gliichstellig s isch doch nur fair
Mir arme Nonne hänn au kai Verkeer
«Es git die Idee, di ID als E-ID.»
Die Digitalisierig missfallt dr Dorothee.
Die Schwurblere het Angscht s wird jetzt alles regischtriert:
Wär s Land verlosst, wär Gott vergisst, und wenn si maschturbiert.
Die junge Nonne spinne, s isch nid yybertriibe,
Si bätte us dr Biible Jesaia 6, 7.
Si influence, streame, das isch hit normal,
Si mache Reels und Storys und gön drmit viral.
Si like, si ghoste, si dien DMs slide,
Si swipe, si scrolle, ooni sich z entschaide.
Was sell mit däre Jugend in Zuekunft mol bassiere?
Es kenne jo nit alli spöter d USA regiere!
Es sait dr Xherdan Shaqiri,
Zue sim Chef Celestini,
Im Papa Joe’s bim Martini
«Die Titel sin mini!»
Dr Fabio fyylt das nit so und sait «Schluss, das isch Stuss, hooli Nuss, ich nimm jetze dr Buss ab zum Russ!»
Denn kunnt dr Ludovic Magnin:
«E Titeli wuurd isch jo au nää!»
Är duet si Taktik bekannt gää:
«Isch hoffe uf forfait»
Dr Dääge, dä isch do dergääge, sait «Lüdo, ins Büro!
S fäält s Niveau, es isch so, du muesch jetze go!»
Denn maint dr Dääge verlääge:
«E Pinggtli-Sääge kääm glääge.»
Dr Liechtsteiner staartet verwääge,
D Mannschaft blybt underlääge.
Dr FCB spiilt nur no Schrott, d Transfer flop, niemer top, s isch dr Wuurm dinn im Stuurm, jä do hilft nid mol Gott!
Dr Titeldraum isch gstoorbe, ojeojeoje,
Dr Titeldraum isch gstoorbe, oo arme FCB.
Glaubet nit an Gaischter, e jede Draum wird woor:
Mir wärde wider Maischter in 6, 7 Joor!