Bebbi BänggBasler Schnitzelbägg |
|
nonnkonform 2023
Frinde, mir gseen euch das aa: Dir händ duurscht!
Nämmed doch nomol e Wyy unbeschwäärt.
Und genned euch noohär doch au none Wuurscht,
Will morn, do isch euer gliebts Gäld nyt me Wäärt.
Jä, wägg dären Inflation kenne die maischte,
Sich glyy nit emool mene Blaggedde laischte!
Mir Nonne mien jetz au bis 65 schaffe,
Fir d AHV - vo de Mench und de Pfaffe.
Im Geegezuug bikemme mir us Draditioon,
Kaini Rächt und sicher nit dr glyychi Loon!
“Fir unser Glooschter han ych s ganze Lääbe
Gschafft Daag und Nacht, das isch mini Missioon.”
“Erika, nai - das isch gaar nit z ersträäbe,
Vollzyt schaffe und das bi däm Loon.”
“D Generatioon Z het, mir findes drnääbe,
No Zyt zum sich Dailzyt uf d Stroosse go z klääbe!”
Wird s Wasser au bald knapp hän mir is arrangiert:
Mir dringge Wyy statt Wasser, dusche nur no z viert.
Doodrmit wird dur uns dä Dail kompensiert
Wo dr Federer bim Briele als verliert!
Zum iiri Liebi zue dr Monarchie z bewyyse,
Duet d Dorothee dr Queen die letschti Eer erwyyse.
Noch 20 Stund aastoo erfillt sich iire Wunsch,
Schnäller wied im Joggeli di Bier bikunnsch!
Nur 0-0 und 1-1, s isch fascht scho biz maagisch,
Bi unserem FCB, dert druggd dr Schue.
Verliere, emool, isch an sich au nit draagisch,
Dr Grund fir di Kindigung, Alex, loos zue:
Dr Abstiig kunnt nit in Froog, denn das wär nur,
Aaeignig vo Ziircher Fuessball-Kultur!
D Mäss Baasel isch finanziell nimmi so gsund.
S Gäld wo me driisteggd verschwindet perfiid.
Kai Wunder, dä Bau isch e Loch, gross und rund.
Im Baaselbiet, dert verschwindet dr Niid.
Die saage: “Mir hei jetze doch, das isch chranggch,
Au e Milliooneloch, ESAF sei Danggch!”
D SP hät gärn z Bärn e Daame-Disch fir zwai.
Dr Jositsch gratzd das nit - är isst gärn elai.
Z Baasel glaubt me dra - me haig reserviert.
Und denn gits Jura-Wuurscht mit Röschti, kalt serviert!
Zum guete Gligg hän mir schwyzwyt jo beschlosse,
Dass mer wyter Dier in Masse halte losse.
Fascht kai Liecht, sau äng, kuum Luft, das mit Systeem,
Dir hättet suscht do in däm Käller e Brobleem!
Dir händs gheert: Das isch unser Schweschter Fränzli,
Die het scho länger - dr Aasatz vomne Ränzli.
Wills zunre basst und iire Baart spriesst wiene Pflänzli,
Woggd sii dr Umbau und het drum au bald e Schwänzli!
Unser Gschlächt und sins, das sinn zämme zwai,
S git no drei, vier, finf, säggs, siibe,
Wo gärn mechte syy, verschiide.
Schweschter Franz dängg dra, egal ob Frau, ob Maa,
Gott het immer Rächt und är sait Sex isch schlächt!
Dr Ueli will kai “Es” im Bundesroot.
Zum Gligg isch dr “alti wyssi Maa” bald dood!
Hetero fyylt sich nit jede Mensch.
Dängg dra, wennd dr Infantino kennsch!
Är fyylt sich schwuul, är fyylt sich gay,
Abr “one-love” das isch nit okay, Hey!
Unser Gschlächt und sins, das sinn zämme zwai,
S git no drei, vier, finf, säggs, siibe,
Wo gärn mechte syy, verschiide.
Doch s verbietet das, unsre Bundesroot
Und dr FIFA-Gianni, dä isch dumm wie Broot.
Mir als Nonne hän e Rogg, s isch dr Hit.
Lueg mol drunter und de waisch glyych nit:
Ischs e Frau odr ischs e Maa?
S isch uns glyych, s daarf dr Buechbryys ha.
De l’Horizon, kai Affront,
Kim de l’Horizon, de l’Horizon, Hey!
Unsri Gschlächt und euri, das sinn mee als zwai,
S git no drei, vier, finf, säggs, siibe,
Wo gärn mechte syy, verschiide.
Alli hän iir Rächt ufe aiges Gschlächt,
E biz mee Toleranz, fir dr Franz mit Schwanz!