Bebbi BänggBasler Schnitzelbägg |
|
nonnkonform 2025
"Ich will nit", "ich au nit", "ich ha bessers z due"
"Dä Job isch z belaschtend! “Blooset uns in d Schue.”
S Aarbedsklima: schissig! Es hätt no Stelle frei:
Zum Gligg sinn mir vier Nonne und nit bi dr Bolizei.
"Nach dr Waal isch vor dr Waal", das drifft z Baasel zue,
Es het sich nyt veränderet, vier Joor hesch wider Rue.
Z Amerika, do isch me nach de Waale anderscht druff:
Dert weermt me jetzt die gruusig alti Schissi wider uff.
D Schweschter Fränzi het Verwandti in de USA
Si schrybt no als e Brief mit vyyl blablabla
Vorsoorglig duet si dä jetzt doppled frankiere
Bim Trump waisch drum nie wie vyyl Zoll si grad kassiere
Dr Trump will d Ukraine ufdaile loo
Mit Status quo, dr Putin isch si "Broo".
E Riviera in Gaza fänd är "très beau"
D Lyt umsiidle loo, fir baar Bungalow
Das Grönland will är kaufe, hänn mir vernoo,
Apropos: au Kanada, dert waiss kain wieso.
Und dä Kanal in Panama hätt är sich gärn gnoo.
Dr Golf vo Mexiko het är jo scho bikoo.
Wenn d Wält denn nei verdailt isch, vo däm liebe Maa
Blybt als Aaschtandsräscht s Baaselbiet no z haa.
Dr Retter, dr Hailand, vo Gott userwäält.
Irdisch verurdailt und doch widergwäält.
Begnaadigt alli Sinder in dr Geegewaart.
Jetzt waarte mir seenligscht uffem Trump si Himmelfaart!
D Schweschter Fränzi macht Gschwellti und schellt si dernoo,
Duet si riibe statt schniide und Angge verloo.
Im Fätt breetle, draaie mit Hilf vome Deggel,
Die Rööschti e Draimli, dr ander e Seggel.
Wie fein isch sone Schoggikuss: - luftig, siess und zart,
D Fillig wiss und usse bruun, e Spiil vo weich und hart.
Jede fimfte Schwoob hets lieber umgekeert, herjee:
Usse wiss, im Kärn ganz bruun - so wie d AfD
Zum Gottesdienscht faart d Erika mit iirem BMW,
Im Stau vornedraa stoot im VW d Dorothee.
Zämme faare isch als Leesig masslos iiberschetzt,
Bi baide sinn die freie Plätz fir d Schutzängel bsetzt.
Dr Baschar al Assad schloofft bim Putin im Bett,
Dr Kim Jong-un liggt bald drzue, do mache mir e Wett.
Wenn die zämme schmuuse mit Paitsche und Latex,
Denn nennt me die Paarty: "Tyranne-Sau-Russ Sex".
Kennet iir das Gschichtli scho/ Vo Nemo?
Wo in Malmö aimol so/ Herrlig zumne Siig isch ko.
Basel kriegt die Show im Mai/ D Jakobshalle isch nit z glai.
Dr Cramer fraits, är tanzt elai/ Mit sine zwai lingge Bai.
D Politygg macht do mit/ Git e ESC-Kredit.
Gsends e biz als benefit/ Fir d Muusigvyylfalt; mee gits nit!
Frooglig isch no d Sicherhait/ S fääle Schugger wyt und brait,
Dr Eymaa duet das schampaar Laid/ Doch sii het sicher nit versait.
Wie kunnsch an das Kabaree/ D BVB faart nit phersee,
Maischtens bruuchts nit mol Schnee/ S staut scho ab em SBB.
S Auti nää, e Schnapsidee/ Zaalsch fir d Parkplätz jetzt no mee.
Drum kasch du vier Nonne gsee/ Uff em E-Trottinée.
Bim Iigang bruuchts e Plan B/ S het kaini Byyljee mee.
Kai Brobleem fir d Dorothee/ Si zaigt iires Decolleté.
Im Joggeli herrjeminee/ Schaad fir d Fans vom FCB,
Wo alli wän der Xherdan gsee/ S moderiert dr Epiney.
S Finaal denn aaber wird perfäggt/ Mir vier steen dert unbefläggt
Singe Väärs uf Dialäggt/ Dasjoor gwinnt: Sisteract!