Bebbi BänggBasler Schnitzelbägg |
|
PereFyss 2015
D BaZ, das isch e Zytig und der Somm en Art Verleeger,
Do deents uss Ziiri: „Läck dä Somm isch geil und voll inteeger!“
Drum hämmer sofort derfir gsorgt, ass dää in Basel blybt,
Und doo die letschte dreiedryssig Lääser no verdrybt.
Es fääle Fraue, s isch fatal, däm nooble Club de Bâle,
Und ääne an der Brugg findsch Fraue, graad in Iiberzaal,
Die kasch zer Zyt rächt ginschtig ha, joo jetze wurd sich s loone,
Denn s gilt au fir d Wääbergass nei die verkeersfrei Zoone.
D Frau Pegoraro dretzeled: „Mir wai nit fusioniere!
Wai au kai Rappe ins Theater Basel inveschtiere,
Öisi Kultur, das isch der Buur, jetz gääbed ändlech Rue,
Scho mit Kollega Wüetrich Urs hai mir Theater gnue.“
Jä Ziircher glaube no an Beegg, dien in de Stäärne lääse,
Glauben an Brunz vom Shiva Mike, an Häxen uff de Bääse,
An Wuduu-Zauber glaube die, und fescht an beesi Gaischter,
Und zwai, drei Ziircher glaube glatt, si wurde Schwyzer-Meischter!
Syt kuurzem faart der Achter zue de Schwoobe z Weil am Ryy,
Und doo der Euro s Loch ab isch, kauft tout Bâle dussen yy.
Im Dram e Riisedruggedde, ai Stosse und ai Rysse,
Ergatterisch e Holzsitz, fangsch derzue am Arsch e Sprysse!
Mir faare mit der SBB durs scheene Baselland,
Uff Schritt und Dritt die Armuet gsee, nai das isch e Schand.
Mir Stedter hälfe jeedem Rammel – dasch e Riiselaischtig,
Doch laider isch die Hilf fir d Katz, denn d Armuet die isch gaischtig.
Der Bundesroot hett dangg em Root vo Griene und de Roote,
Sich noch Noote loo beroote iiber d Frauequoote,
Fir uns drei wurde Frau und Dochter d Frauequoote rette!
Doch wär sell denn bi uns dehaime butze, koche, glette?
Je veux, tu veux, il veut – s isch difficile – joo merde alors,
Das chaibe Friefranzeesisch kunnt uns beide spanisch vor!
Doch d Leerere isch schandbar nätt – gitt Nochhilfstund à trois,
Sythäär versteen mir zwai: voulez vous jouer avec moi.
Mir faare mit der SBB, durs scheeni Baselbiet,
Gseen Heechefyyr an Heechefyyr, das schloot is bees uffs Gmiet,
Si nämme Holz vo iiberaal, die Fraue, Männer, Kind:
Jo nämmed doch firs näggschte Fyyr die Brätter vor em Grind.
Dää Hoeness hett ganz raffiniert, die aigne Styyre optimiert,
Amänd hänn si iin iiberfiert und fir e paar Joor arreschtiert:
Gäll Hoeness, hesch halt dilettantisch glooge und bedrooge,
Derbyy wärs doch ganz aifach gsii, der FIFA-Blatter z frooge!
Die z Bärn hänn aim jo gärn – si schiggen is so Jod-Dablette,
Zem is vor Straale, Ratte und vor anderem Gugus z rette.
Mir hänn grad zwai drei ussprobiert – lägg hämmer miesse renne,
Und dangg em Jod em Jod em Jod jo hämmer jod-le kenne.
Die Ussicht vo däm Roschduurm aabe, stuunsch und s wird der stuurm,
De gseesch Vogeese, Schwarzwald und wytt wägg – der Eiffelduurm,
Vo Oscht bis Weschte präsentiert sich s ganze Alpeband,
Im Süüde en Entwiggligsland – me sait em Baselland!
Sag uff däm Geri Müller-Selfie, gseet me deert si Gleggli?
Hee schwaafled nit so primitiv, das haut mi uss de Seggli!
Nai loos, im Kindsgi hämmer hitte s Selfie-Liedli gsunge:
„S Selfie-Gleggli lytet scho, jetz isch Zyt zem haime goo,
Uff em Haimwääg d Sunne gniesse, und derbyy e Selfie schiesse!“
Mir unternämme mit eich zämme jetz e Basler Duur,
Und zeigen eich ussgsuechti Blätzli – mit Romantig puur:
Pfäffergässli, Spiegelhoof, vom Stapfelbärg der unter Dail,
Elsbeetebassaasch, Gämsbärg zwelf, deert wirds uffsmool eeländ stail,
Maiegass und Stainegraabe und au s glaine Glingedaal,
Tessinerstrooss, Theatergässli, dasch verglemmi kaibeschmaal,
Im lange Loo, der Binzestrooss und uff der Schitzematte,
Nonnewääg und Zolliparggblatz, dää Dail, dää im Schatte,
Loowääg, Nauedunnel, Fröschgass nyyn bis drizää Bee,
Das sinn die sibzää Blätzli, wod dää Roschduurm nit muesch gsee.
Arr. Melodie:
David Rossel