Bebbi BänggBasler Schnitzelbägg |
|
PereFyss 2020
Quelle: Basler Marionetten Theater
Dää Frauestraiggdaag drifft is hart, das hämmer nit verdient,
Uns wäärfe d Fraue vor, si haigen is vyyl z lang bedient!
«Fir glyychi Aarbet glyyche Loon!» schreit frau ins Miggrofoon,
Was hänn au die – fir d Frau isch doch e Maa der greeschti Loon!
En Ärbsli-Beenli-Hirse-Tofu-Gschnätzlets – sträng vegan,
Das schmeggt noch Hobelspöön und Karton gmischt mit Lääbertran.
Doch uss de Räschte losst sich wunderbaar e Larve glaischtere,
Und noo der Fasnacht – uffkocht – kasch di näggschte Bsuech begaischtere!
S wird jeede Summer heisser, in der Stadt haltschs kuum no uss,
D Sunne brääglet aabe, kunnsch ins Schwitze, kuum bisch duss,
Im Büro kasch nimm schaffe, scho am Morge bisch ermattet,
Hösch wäggsle doch zur CS, deert wirsch rund um d Uur beschattet!
Yyne – uuse – yyne – uuse – yyne – uuse – yyne,
Die ainte hänns gärn hart und schnäll, anderi meege s Fyyne,
Und uff und ab und hii und här und au no vo der Syte,
Ganz langsam kunnts zem Hööepunggt – bim Brexit vo de Brite!
Der Digitalisierigswaan hett jetz au d Schuele braicht,
E jeede Binggis griegt si aigne Läpptopp iberreicht,
S hett voll modärni Softweer druff, au d Sproochprogramm sinn neu,
Gisch byspiilswyys s Wort «Schyssdrägg» yy, no iibersetzts «Mille feuilles».
Der Otti sait zem Lotti: «En Erinnerig vo dir wott y,
Kumm stand do nääbe mii, y schiess vo uns e Selfie-Foti.»
Doch wird nyt uss däm Foti mit em Otti und sym Lotti,
Denn laider wird der Otti iiberfaare vomene Drotti!
Der Staat gitt de Musee z weenig Gäld, das gseet e Blinde,
Im Lager herrscht ai Buff, me kaa die beschte Stigg nimm finde.
Der Heer Diräggter joomeret: «S fäält au e Basler Dyybli!»
Wo d Aggermaa denn s Wort ergryfft, mergsch: doo fäält au e Schryybli.
Blybt der Cassis oder wirds d Frau Rytz? Bärn hett do schnäll entschiide;
Dehaim hänn mir lang dischbediert, schaad isch der Cassis bliibe!
Ab dääne Baide griegt e jeede Hund grad s Ooresuuse,
Riefsch «Ritz» no hoggt är ab und heert är «Cassis» wott är uuse.
Saisch «ych bi grien», no wirsch grad gwäält – dasch simpel und banal!
Spinatgrien, grasgrien, lindegrien – zer Not grien-liberal,
Wäälsch dunggel- oder hällgrien – hesch verdeggel d Qual der Waal,
Dasch wurscht, s hoggt ainewääg nur fläschegrien im Grossrootssaal!
Am Neijoor stoot d Somaruga ine Beggerei und maint:
«Liebs Schwyzervolgg, Brot isch das, wo Stadt und Land veraint,
Wiene Beggerei duen ych mi Departemänt verwalte.»
Jetz wott d Aggermaa iiri nägschti Reed ime Saftlaade halte!
S Dante Drudi sait: «Me sott kai Maitlibai mee ässe!
Au Schänggeli und haissi Wäädli muess me glatt vergässe,
Hienerbrischtli, Schweebli und Berliner kasch dir spaare,
Derfir loss ych – ganz haimlig – als e Nunnefirzli faare!»
D SVP schiesst aimool mee uff die Lingge und die Nätte,
Der Röschti heersch die immer glyyche Psalmen aabebätte:
«Wääled üüs, mir rette d Schwyz vor em grüene Klima-Sturm!»
Doch fuult dä Schwyzer Öpfel numme wäg däm bruune Wurm!
Si verkauft sich prächtig, unseri scheeni Stadt am Ryy,
Drum falle immer mee Turischte-Hoorde z Basel yy;
Drei Mool pro Wuche gfierti Gruppeduure quer dur d Stadt,
Au mir sinn gange – Sii, so demonschtriere isch no glatt!
Hundertzää Millione zvyyl, hee Hampe bisch no zwääg?
Dää maint: «Wurum? S gitt dängg uff jeedem Stogg e Velowääg!
Bänder an de Ränder, und an allne Wänd e Gländer,
Und an alli Gländerränder schruub ych sälber Veloständer.»
Gratis-ÖV fir die Junge, en Uffdraag ganz e glaare,
«Dasch e diggi Sach, no mien die baide nimm schwarz faare!»
«Hösch Babbe, mir begryffes nit, wie sell das funggzioniere?
Die hänn kai Personaal zem s Graatisfaare kontrolliere!»