Bebbi BänggBasler Schnitzelbägg |
|
PereFyss 2017
Kupfer stoot bischaide doo, firs Drummle und firs Pfyffe,
Silberig macht Gugge froo – kai Glygge kaas begryffe,
E Buebeziigli hett der Kinschtler goldig loo umrande,
Ass s Bijou joo scheen uusekunnt, sinn mir drei Modäll gstande.
Es hett sich uns e Wunsch erfillt, no joorelangem Warte,
Denn syt däm Summer hänn au mir en aigne Schreebergaarte,
Der neii Gaartedisch hänn mir vom Möbel Roesch lo koo,
Und in der Freie Strooss e Hampfle Stiel mitlaufe loo.
D Tanja Soland zeigt iir Härz fir Hünd und Hundedrägg,
E Hundeblatz miess uff e Märt, wintscht sii als Waalkampf-Gägg.
Doo loobe mir is s Moni Gschwind, äs haltet sich gärn zrugg:
Ääs sorgt sich statt um Hundedrägg mee um e Händedrugg!
E Schott verlauft sich am Tattoo, verirrt sich ins Quartier,
Är schländeret durs Rotliecht und wird langsam blau vom Bier,
Är schwanggt de griene Linie noo, e Gritte kaifft en aa:
„Faar ab, ych duld kai Konkurränz – jesses – s isch e Maa!“
Bisch friener z lang im Ussgang gsii, hesch s letschti Dram verpasst,
No hesch dir halt e Taxi gnoo, esoo vyyl Gäld verprasst.
Hitt loosch di fir e Schnäppli kurz vo Uber heime faare,
Und schaffsch am rächte Ort, no bringt me dir di Schuggerkaare!
Wottsch mit der Boscht zwai Liter siesse Moscht verschigge, proscht,
No stuunsch, was sone Päggli Moscht im Boschtversand di koscht.
Schniersch d Wanderschue und wogsch zer näggschte Boscht die
langi Duur,
No laufsch und laufsch – und bis de aakunsch, isch dää Moscht
denn suur!
„S Schwyzer Volch, das straalt vor Glück, hett Chraft und Energie,
Und Aarmuet haimer kaini, well mer Eidgenosse sii!“
Der Frehner rieft: „Kai Aarmuet in der Schwyz – e Super-Laischtig!“
Doch grad bi däm isch d Aarmuet gross – politisch wie au gaischtig.
Fir jeede no so bleede Saich gitts hitt efang en App,
Kasch Pokemöönli jaage uff der Basel City map!
„Sälbscht yych finds cool und bi uff d Jagd no Fabelwääse gange,
Am Fischmärt unde han y s dürre Baschi-mönli gfange!"
Jä unsri AaKaWee, die lääbe Joore, Joore, Joore,
Expäärte seen jo niene kaini Gfoore, Gfoore, Gfoore,
Uff unseri Expäärte diemmer loose, loose, loose,
Doch aimool wirds esoone Kaib verbloose, bloose, bloose!
Mir wandere durs Baselbiet, im Daal und uff der Heechi,
Und geen mit unsre Noochbere, e gaischtig aifach Gspreech yy,
Zem Abschiid hänn is die denn voll e baar uff d Schnuure gää,
Joo d Rammle dien die Handschlag-Pflicht laider z weertlig nää!
Der Morin Guy hett nie vyyl gschafft, jetz foot är uffsmool aa,
Bis hitt hänn mir kai Aanig kaa, ass dä Maa au schaffe kaa:
Bi der Kasäärne paggt är aa und zwoor mit aller Kraft,
Är hofft, ass är aimool im Lääbe au e Durchbruch schafft!
Fir d Wäärbig immene Laade, do muesch kai Erlaubnis haa,
Derfir nimmt dii fir Trottoirwäärbig s Baudepp zimftig draa.
S Nelly uss der Wääbergass frologgt: „Ych frai mi soo,
Wenn mir der Hampe Wessels zeigt, wien ych muess aanestoo!“
Wo der Fidel Castro zruggdritt, duet äär sim Kuba kund:
"Erscht wenn Amerika zersteert isch, schloot mi letschti Stund!"
No joorelangem Warte huucht är – grad no knapp am Lääbe:
"Amerika hett jetz dää Trump, drum kaan y rueig entschwääbe."
E Hampfle groossi Muusiger hett d Wält s letscht Joor verloo:
Der Bowie und der Cicero hänn baidi miesse goo,
Au Cohen, Prince und Michael sinn verglemmi nimme doo,
O Gott, wurum hesch denn der Gölä wytersinge loo!
E jeede muess si Scheff begriesse, s herrscht e Handschlag-Pflicht,
Und wenn das ain nit mache wott, no schleppt me iin vor Gricht!
Vor langer Zyt hett ain emool, doo in unsere Lande,
Au sym Scheff nit Griezi gsait – esoo isch d Schwyz entstande!
Wenn iir jetz unsre Zeedel grieged, bitte joo nit drängele,
Denn dää isch brichig und porös – diend en fyyn aalängele,
Au joo nit rolle oder falte, gänd bitte bitte acht,
S Bapyyr das hämmer uss de Nati-EM-Lyybli gmacht!
