Bebbi BänggBasler Schnitzelbägg |
|
PereFyss 2019
Aadie Negro, Moorekopf, Dummpeeter darfsch nimm saage,
Au Alti Dante isch tabu, sunscht goot me dir an Graage.
Disggriminierigswaan au an der Fasnacht – dasch doch grangg,
Und falls d Veganer duure kemme, haissts au nimm Schnitzelbangg!
Am Midaagsdisch gitts nie kai Flaisch, d Schuel unterstitzt s Vegane,
S gitt Fläädlisuppe, Tofuschnitzel, Gmies, Salat, Banaane,
Die ganzi Wuche flaischlos ässe, griegsch verglemmi s Rysse,
Do muesch di joo nit wundere, wenn d Schieler d Leerer bysse!
Me wäält e Fraue-Doppelpagg in Bärn – dasch e Première,
Drum hogge jetz im Bundesroot drei Frauen und vier Heere.
Drotz Fraue-Pauer isch das Glassefotti au nit glatter,
S wirggt wiene Wäärbig fir die letschti Staffle vom Bestatter.
Aadie Wartegg Hyyserzyyle – schaad hesch miese wyyche,
Doch fir e näggschte Wulggegratzer, geen si iiber Lyyche.
Der Bauheer losst fir d Baulytt zwai Baraggen installiere,
Deert inne kennt me d Uuremäss 2019 duurefiere.
Der Fritzli spiilt in Blastigg-Stiifel in sym Blastigg-Schloss,
Hett lutter Blastigg-Auti und e Blastigg-Gampiross.
Är isst und dringgt uss Blastigg-Gschiir und goot uffs Blastigg-Kloo,
Aber wäägen em Umwältschutz isch s Reerli nei uss Stroo.
Der Bresidänt verbannt e Buschi uss em Grossrootssaal,
Ganz Basel eschoffiert sich – dasch jo wirgglig e Schkandaal!
Au Buschi hänn e glaine Wortschatz, babblen ooni z dängge,
Doch bi de Buschi blybt der Schyssdrägg in de Windle hängge!
Basel waggst, jää guete Daag, iir Grieche und iir Dääne,
Japaaner, Inder, Russe, iir Bulgaare und Rumääne,
Chilene, Schotten und Ägypter, kemmed Hand in Hand,
Au Finnen und Chineese, numme kain uss Baselland!
Der Rogg wird kirzer, der Vorbau greesser, s Adela als wie nätter,
Drum luege d Männer s Telebasel-Gfaasel ibers Wätter,
Als Bätschelerette schänggt si iirem Schatz die letschti Roose,
Doch laider goot au daas Basler Härzstigg voll in d Hoose!
Die Halle ains stoot immer läär, d Mäss hett e Glotz am Bai,
Me kennt si jo mit Wasser fille, fir Pinguin, Delfin, Hai,
Statt em Ozenanium uff der Haiwoog e Volière baue,
Deert kenne denne d Schütteler go Doppeladler bschaue.
Dangg Daagesstruggduuraagebot isch s Röösli nimm ellai,
Dert issts, machts Uffzgi, nochhär spiilts, äs fyylt sich ganz dehai.
Sy Babbe isch drum nie dehaim zem hiete – gopfriidstutz!
Sy Daagesstruggduur isch syt vyyle Joor der bruuni Mutz.
Der Schugger Meier vier funggt ganz nervees d Zentraalen aa:
«Kolleege, dangg däm neie Tesla hämmer der Dieb fascht ghaa!
E wildi Jagd dur d Gloggegass, no s Imbergässli duruff,
Doch grad bim Zuegriff mergg y, ych grieg d Fliigeldiir nit uff!»
Uffnää mien jetz d Heerezimft, contre coeur au Fraue,
Deert kenne sich die Fraue jetz e zimftig Netzwärgg baue.
In d Wääbere sott d Aggermaa, no wurd si ändlig leere,
Wie sii statt ummestaggele, faadegraad ka schneere.
«Mit Siri und Alexa hänn mir baidi ständig z due,
An unsre Lippe hängge si und leen is nie kai Rue.»
«Joo Buebe, ych mags eich jo gunne, gniessed die neie Zyte,
My Händy kunnt halt nie zue Wort, nääbe mynere Gryte.»
Dä wunderscheeni Lällekeenig, kasch z Basel nimmi gsee,
Är isch der Rhy durab und faart jetz z Köln – ojeminee!
Bim neie Rhystärn dänggsch grad an e Ruumschiff ooni z liege,
Und hett der Rhy kai Wasser, kaa das Ding bestimmt au fliege!
Der FCB kauft s Joggeli, das finde mir nit schlächt,
Erschtens hett är Stutz as glepft und zwaitens hett är rächt,
Und drittens wisses alli Lyt, vo Laufe bis noo Brig,
Mir hänn s scheenschte Stadion, vo der ganze Challenge League!