Bebbi BänggBasler Schnitzelbängg |
|
PereFyss 2026
Mir drei sinn groossi Trömp-Fän, yes he isch our great Idool!
Au mir hänn Fraid am Bschysse, fyylen is bim «Deale» wool,
Iir sotted schleinigscht d Rolex und Goldbaarre fiire bringe,
Und klappt dä Deal, no wurde mir eich ai, zwai Värsli singe.
Das Spaare bi der Boscht wird als wie mee zer schlächte Gwooned,
Si Boscht verdailt der Böschtler numme noo zwaimool im Mooned.
Au kunnt är nimm go lytte, nai vo wytem gseesch en wingge,
Kai Wunder, duet d Geburteraate als wie wyter singge.
Der Trömp, dä schafft und schafft und schafft, är schafft und schafft und schafft,
Doch amme fäält em d Graft zem Schaffe und si Graft erschlafft.
Drum pennt är doo und deerten yy, duet kurz e Pfüüsi mache,
S Brobleem isch, ass är nochhär immer wider duet verwache.
S bescht an däm neie Globus isch der Urwald uff em Dach,
Mir deerfe numme zaale, doch hänn nyt dervo – dasch schwach!
Doo maint der Basler Zolli: «Hösch, dää Standort isch geniaal:
Mir nutze doch das Dach als Ussegheeg vom Groossrootssaal!»
D Martullo Blocher macht gärn Gschäftli; s glyych macht iire Maa,
Är kauft drum d Kienzle-Durnschue, kaa d Fabrigg sauginschtig haa.
Was wänn au Blochers mit so Schlabbe und in dääre Masse?
Zue dääne wurde doch vyyl besser bruuni Halbschue basse.
Die Schlyymspuur vo de Wirtschaftsbosse wird is Närve koschte:
Dää Yankee-Brunz mien mir jetz kaufe, statt in der Migros boschte.
En orangsch-bruuni Sunnegreem, derzue e Maga-Kappe,
Griegsch mit em Trömp sim Foteli fir numme fuffzig Rappe.
Mir importiere Billigfleisch en masse – heersch d Buure motze,
Bim Ässe lyydisch s erschte mool und s zwaite mool bim Kotze.
Bruchsch d Zeen nimm butze, s Chlorhuen duet dir s Muul desinfiziere,
Drum hämmer d Schnauze gstriche voll, dien d Contenance verliere:
Däm Trömp go hinde yyne schlieffe, nai das duet is gruuse,
Obwool, dää losst si ganze Schyssdrägg nummen ooben uuse.
Dää Zoll-Deal mit den Amis isch doch fuul und obermyys:
Mir importiere Bison-Fleisch und Chlorhuen tonnewyys,
Vom Huen griegsch Hienerauge und vom Flaisch griegsch Bison-Waan,
Kai Wunder wäggslet d Uni-Mensa schleinigscht uff vegaan.
Der Cramer muult: «Dää Boscht-Dachstogg bruuch ych fir myni Gescht,
Mit Salon, Wellness, Fumoir, Bar; fir d Gescht zellt numme s Bescht!
Ych machs fir Basel, fir mi Volgg, fir eich – und dängged draa:
Als Breesidänt vo Wält muess ych mi aigne Ballsaal haa!»
Der Muurer und der Brunner heersch mit stolzer Bruscht verkinde:
«Mir wänn en Aidgenosseschaft fir EU-Geegner grinde!
Mir wärde d Schwyz mit voller Kraft vor fremde Richter schitze,
Hopp Aidgenosse, hälfed is bim Hellebarde schnitze!»
Si hänn jo fir dä ESC Millioone uuse gschmisse,
Dää blaugrien Schmaalspuurdeppig hett is glatt vom Sässel grisse,
Doch hänn si unsrer Zoë nit ai ainzigs Pinggtli gschänggt!
Doo hätt verdeggel au en alte Bettvorleeger glängt!
Si wänn die ganzi Innerstadt vom Dramverkeer befreie,
S gitt graui Blatte, nit ai Baum, gnau glyych wie in der Freie;
Kai Drämmli, kaini Schiine mee, kenntsch unfallfrei yykaufe,
Vorussgsetzt kasch trotz wild parggierte Velo duurelaufe.
Trömp-Center, Trömp-Arena, Trömp-Museum und Trömp-Halle,
Trömp-Bar, Trömp-Pöb, Trömp-Opera – sim Ego duet das gfalle!
Trömp-Tämpel und Trömp-Hailigdum; Trömp vorne und Trömp hinde,
Möög är doch glyy s Friide im Trömp-Mausoleum finde!
Gäll d Zircher gänn sich all Joor Mie, is neii Süüschee z bringe,
Drum diemmer eich vo Friefranzeesisch und Laubbleeser singe:
Laubbleeser oder Friefranzeesisch – s Gmeinsam vo de baide:
S isch baides lutt und nit z verstoo – und drum nit z unterscheide.
Das «20 Minute» wird nimm druggt, es isch s Bapyyr nit wärt;
Glyych goots em Rädäbäng, hett s Fasnachts-Comité erklärt.
Am Fasnachts-Zyschtig dien si ändlig d Waggiswääge stryyche,
Iberläbbt hett bishär s Drummeli – doch e Lyyche blybt e Lyyche.
Wenn iir jetz unsre Zeedel grieged, fallts eich sicher uff:
Doo hetts e Hampfle bitterbeesi Värs zem Donald druff.
Doch hett dää Käärli Null Humor, mir hänns is glaub verscheerzt,
Drum hämmer vorsichthalber schnäll no alli Trömp-Värs gschweerzt.