Bebbi BänggBasler Schnitzelbägg |
|
PereFyss 2014
S bruucht Alkohool und Nikotiin, ass d bime Matsch kasch schwääbe,
Nur Dünnbier und kai Zigarette, nai das isch kai Lääbe!
Ins Stadion derfe numme no die Liebe und die Nätte,
Und vor em Aapfiff diemer zämme fir der Geegner bätte!
In Ziiri kasch syt neischdem grad ind Sexbox yynefaare,
Verrichtisch deert di Gschäftli – suuber und im warme Kaare,
Der Boxebryys bedraagi schyynts pro Schäferstund e Lappe,
Gnau glyych vyyl muesch in Basel fir e Parggplatz blutt berappe!
In alte Drämmli stoot uff eme Schild ganz gross und breit:
"Wär jung isch stoot us Heefligkeit, der Drammdiräggter hett das gsait."
Dä Spruch, dä passt au hitte no, jo hitte isch dä Spitze,
Die Junge steen, der Drammdiräggter, dää muess jetze sitze.
Die Schuggerei in Vollmontuur, an der Basler Art,
In Vollmontuur au an der Uni – d Medie findes hart,
Wo blybt denn au der Baschi Dürr, was sait denn do die Fläsche:
"Ych ha nit ebbe d Wesch, nai myni Händ in Unschuld gwäsche!"
In syyne junge Joore hett der glaini Binggis Wesseli,
Am allerliebschte gsändelet, mit Schyyfeli und Kesseli,
Und hitte locht und grabt in jeeder Strooss der groossi Wessel,
Hösch Hampe, schütt die Lecher zue, sunscht griegsch e paar...
...uff d Schnuure!
Hey Monn, isch gail in erschte Glass, bald ych scho gang in zweite,
In zweite Glass ych denne due Frie-Franzi vorbereite,
Voll Stress Monn, will in vierte Glass mues scho Frie-Änglisch goo,
Und Leerer sait, in sibte Glass, mir Frie-Dütsch dien aafoo!
Dä Drammdiräggter syygi schyynts e Gfoor fir jeede Rogg,
Schiggt vo sich blutti Bildli umenand – dä gäili Bogg!
Si hänn en frischtlos uusegschosse, ooni Zyt z verliere,
Scho z spoot, syt neischtem dien bigoscht scho Drämmli kopuliere.
E Finfstärn-Wellness-Super-Luxus-Schuppe muess es syy,
Mit Sauna, Massasch, Feng Schui und Aroma-Therapie,
Wirsch rund um d Uur umsorgt, kaschs gniesse ooni jeede Drugg,
Mir hoffe fescht, der Carlos fändi so in Alldaag zrugg!
Fir alli, wo das nimme wisse: d BaZ, das isch e Zyttig,
Aifach gstriggt und aifach baschtlet, aifach rächt aisyttig.
Syt neischdem gitts e BaZ Kompaggt, zem Gligg nid jeede Morge,
S Lääse loont sich nit, doch kasch si ganz kompaggt entsorge!
Dä Ober-Drämmler Gudenrath isch paggt vom Greessewaan,
Faart näb de Schiine und verirrt sich uff die schiefi Baan,
E son e Niete losst me doch uff gar kai Fall ans Styyr,
Denn es heisst im Sprichwort scho: Gudenrath isch dyyr!
Der Conti dailt si Ruggdritt mit, das finde alli toll,
Derby bschysst dä syt Joor und Daag, hett d Hose gstriche voll!
Los Carlo, due grad alles byychte, denn mir wisse mee,
Mir hänn als Coop-Bangg-Kunde uss Versee dii Usszug gsee!
E Lampebäärger Chiirsibuur froologgt: „S isch nit zem sääge,
Dangg myyner Stimm stoot uff ai Chlapf Europa voll im Rääge,
D Ussländer miesse d Schwyz verloo – das sich für öis e Sääge,
Sii alli duss, no schutte ändlig wiider beidi Dääge!“
Ooo friidligs Baselbiet mit dyyne Bärgen und de Dääler,
Nit ganz so friidlig laufts zer Zyt mit dyyne drei Spidääler,
Die guten Ärzt sinn längschtens wägg, d Katheeter blyybe drogge,
So laufts, wenn uff der Scheff-Etaasche lutter Blinddärm hogge!
E grosses Dier, das hinterlosst gärn syyni eigne Spuure,
Und nimmt derbyy in Kauf, ass aller Gattig Gfoore luure,
Doch ganz ellai weiss au e dytsches Schlachtross nimm wo duure,
E Schrei – und unser Angi gheit bim Langlauf voll uff d Schnuure!