Bebbi BänggBasler Schnitzelbägg |
|
PereFyss 2016
D FIFA hett scho joorelang die ganzi Wält belooge,
Und d Schwoobe hänn bim Abgastescht die ganzi Wält bedrooge,
Der ainti bschysst der anderi – und falls eich das sett steere,
Mir bschysse-n-eich syt Joore, denn iir diend is «Playback» heere.
Vo Scheenebuech bis Ammel isch das Baselbiet banggrott,
Drum hälfe mir de Rammle – will me Arme hälfe sott,
Scho achzig Millioone isch der Bydraag an dä Schaade,
Mir leege no zwai fuffzig druff – und kaufe-n-is dää Laade.
S gitt am «White Dinner» wyssi Beenli, Wyssbroot, wysse Schtoggi,
Wysswyy, wysses Fleisch und oobedrii no wyssi Schoggi.
Die ganzi Brominänz drait wyss, die Scheenschte und die Beschte,
Doch wohäär hett dää Blatter Sepp uffsmool e wyssi Weschte?
Marignano isch e Kampfplatz gsi, fir uns Eidgenosse,
Deert hämmer briiglet, gstoche, gmetzlet, mit der Armbruscht gschosse,
Mir schleen uff alles Fremde-n-yy, doch was uusekunnt isch schytter,
D Politik vo der SVP isch hitte nooni wyter.
Mir faare mit em Waldeburgerli dur Wald und Fäld,
Das wunderscheene Bäänli sell verschwinde, s fäält am Gäld,
Doch kennt d Regierig s Waldeburgerli ganz aifach schitze,
Die finf sinn jo wod aane luegsch in Sache Schmalspuur spitze.
S gitt neii Smartphones und Tablets fir d Basler Schuggerei,
Drum muess e jeede d Schuelbangg drugge, kaine griegt doo frei.
Am Änd vom Grundkurs mäldet sich spontan der Gfreiti Riffel:
«Bi myner neie Daafele fäält s Schwimmli und der Griffel!»
Si schutte wie die Grosse, numme s Spiilfäld isch lyycht z glai,
Und wääge-n-iire Ränze sinn si langsam uff de Bai,
Si flueche vor sich aane und dä Diggsagg deert schnuuft schwäär,
Im Gfängnishof lauft s Grimpeli vo de FIFA-Funktionäär!
Es schneielet, es beielet, es goot e kiele Wind,
Und d Maitli leege d Händsche-n-a, und d Buebe laufe gschwind.
Glyy noo de Waale schittle d Rammle numme no der Grind,
Und bätte: «Liebe Gott, loss du d Frau Gschwind verschwinde
gschwind!»
Der Zellner Müller rieft entnärvt uff syyner Äxtraschicht:
«Dä Aasturm hämmer nimm im Griff, stopp mached d Gränze dicht!»
Do kemme si mit Sagg und Pagg, si schlebbe, s isch zem gryyne,
Joo alli Schwyzer wänn halt noonem Shopping wiider yyne!
O Heimatland o Schwyzerland, o Schwyzerland o Heimatland,
O Schwyzerland o Heimatland, o Heimatland o Schwyzerland,
Die Wort zer neie Landeshymne sinn äxtra aifach ghalte,
Do sait Shakiri: «Alte, kaa dä schwääre Täggscht nit bhalte!»
Mir Basler nämme d Baselbieter finanziell zer Bruscht,
Die suuge, suuge, suuge, suuge, suuge – s isch e Luscht.
Und wenn si denn gnueg gsooge hänn, no setze si e Zaiche,
Und dien is partnerschaftlig aimool mee an Schaiche saiche.
Ganz eerlig dää Urs Fischer macht si Sach doch gar nit schlächt,
Und ass e Ziircher z Basel schafft, isch au e Menscherächt.
Mir Basler sinn soo tolerant, do gitts nie kai Beschwäärde,
Esoo ka wenigschtens ai Ziircher Schwyzermaischter wäärde!
Die Bombedrooig z Prattele isch ganz e iibli Geschicht,
Doch d Schuggerei ruumt schnäll und macht das Shopping-Center dicht,
Si speert s ganz Areal, es strande Dausigi samt Kaare,
Dää Uffwand hätt me sich bim Stüggi-Center kenne spaare.
S nei Logo doo kasch nit lo stoo, do muesch noonemool driiber goo:
Däm Balgge hämmer d Lengi gnoo, und d Belle do verschwinde loo,
Au d Richtig isch nit scheen esoo, die sott me doo so ummeschloo,
Als Faarb hänn mir e-n-andri gnoo – und soo isch s Logo uusekoo.
Als Depoo vomene Bächer zaalsch an jeedem Fescht zwai Stutz,
Fir Ruum und Eer vo Basel und au fir der Umwältschutz,
Fir unsri Zeedel miemmer jetz vo eich zwai Frangge nää,
Und s näggscht Joor kenned iir si uns denn wiider retour gää.