Bebbi BänggBasler Schnitzelbägg |
|
PereFyss 2018
Veganer lääse bim Salat e jeedes Wiirmli uuse,
Veganer, won e Miggli schlugge, kenne wuchelang nimm pfuuse,
Mir drei ässe numme Fleisch, solang mir kenne dängge,
Vom Saltimbocca dien mir dääne s Salbeiblettli schängge.
Drummle, Pfyffe, Guggemuusig, Schääse, Schnitzelbängg,
Drum simmer jetze Wältkulturerb, merci fir das Gschängg,
Es hett is fascht verjaggt vor Stolz – mir wänn au gar nit glaage,
Doch Hand uffs Härz, wär erbt denn scho gärn e Waggiswaage!
No langem Warte hett s Tessin si Bundesroot bikoo,
Me wäält statt ere Frau dää scheen Cassis Ignazio,
D Tessiner hänn iin zimftig griemt: «Ignazio isch famos!»
Jetz hoffe mir, mit Loobe wärde mir au d Herzog los!
Do sait d Jeannette zer Babette: «Wottsch nit mit mir wette,
Weeli vo de Basler Baize sich äggscht no kaa rette?»
«S isch wurscht, was mir do wette», maint d Babette zer Jeannette:
«Denn bald gitts z Basel iiberaal numme no Buv.....Take-Away!»
Gäll Babbe, du wottsch d Billag nimmi zaale, drum stimmsch joo.
Loosed Buebe, dasch kompläx, das kenned iir nit verstoo!
Hey Alte, alles glaar, dasch doch e Wurf, e geniaale,
Wenn mir denn go ässe geen, muesch d Biilaag nimmi zaale.
Me hirnt, me dischbediert, me blaant – und das syt vyyle Joore,
Wo duure me am beschte sott dä Härzstigg-Dunnel boore?
Doch ebbis wisse mir scho hitt und wärde eich dra maane,
Leend joo firs Dunnelboore nie die Schwoobefirma aane!
Will d Dreier-Drämmli neischtens erscht in St. Louis ääne keere,
Mien Drämmlifierer jetz verdeggel no franzeesisch leere.
Statt Drämmler heissts le chauffeur, und statt Gränze la frontière,
Doch wott e Waggis ebbis frooge, schliesst sich d Sproochbarrière!
Tramp tramp tramp tramp tramp .... tramp, är macht vor gar nyt halt,
Tramp tramp tramp tramp, hett Wyybli gärn, egal eb jung eb alt,
Tramp tramp .… tramp, är gniesst sy Macht, verdramplet jeedi Muus,
Tramp tramp – em neie Bulle gfallts im Elefantehuus.
Mit Värsli, Helge, Riim und Pointe hämmer s ganz Joor z due,
Au an der Fasnacht simmer suuber, leen d Fraue brav in Rue,
Es wär au schwär, denn durch die Schlitz doo, seemer vo der Biini,
Numme grad der Zingge, d Botox-Lippe, s Doppelkiini.
Ungarn, Pole, Tschechie – bi de Schwoobe d AfD,
In Ööschtriich gar e Neo-Nazi, d Schwyz hett d SVP,
Dangg rächte Bobbulischte macht scho halb Europa schlabb,
Doo hämmer z Basel kai Brobleem, bi uns goot d Boscht no ab!
Mir Basler mien jo allewyyl die neischte Drämmli boschte,
Und die wo mir nimm bruuche doo, verschutte mir in Oschte.
Noch Sofia haig me au die letscht Gugummere verkauft,
Dasch gar nit woor, solang do z Basel d Fetz no ummelauft.
Mir hänn e gmeinsams Bangg-Konto fir Père e Fyss e Mère,
Unsri Huusbangg isch jetz blau und nennt sich neischtens ‚Cler‘.
Sait doch d Grandmère zem Grandpère: «Gäll die Bangg gfallt dir au,
Du bisch zwoor laider sälte clair, derfir bisch allbott blau!»
«Kurze Sätze machen, ohne Schnörggel, bitte schöön,
Wir schwatzen mögligscht einfach, damit alle es verstöön,
Und wenn öbber Mühe hett, so hilf ich wenn ich kann,
Soodeli, jetz föön mir mit der Grossroots-Sitzig an.»
S Röösli goot syt kurzem in die erschti Kindsgi-Glass,
S ka lääse und au rächne, macht sy Höösli nimmi nass,
E gliggligs Kind und ganz normal – das hämmer gmaint bis gescht:
Äs muess in Therapie, äs isch im Laischtigsthescht die Bescht!
Syt Joore dien mir Basler unsre Abfall suuber drenne,
Mit Alu, Pet und Batterie zem Container renne,
D Heilsarmee griegt unsri alte Glaider, Schue und Däsche,
Und im Roothuus, deert entsorge mir die grosse griene Fläsche!
Zletscht hett der Morin no sy Stadtentwiggler uusegschmisse,
Do hett der Lieschtlemer Stapi schnäll dä Boschte an sich grisse,
Kuum im Amt, do stellt dää fescht: «So kaa s nit wytergoo,
Mit Entwiggle muess ych bi der Aggermaa aafoo!»
Zum Schluss hänn mir, wie allewyyl, e Värs zue unsrem Zeedel,
Au das Joor isch är wiider grien, mir finde s aifach eedel,
S Papier kunnt nei vom Bio-Buur, mir leens deert ainzeln brässe,
Es schmeggt lycht noch Salbei, damits d Verganer au gärn ässe!