Bebbi BänggBasler Schnitzelbägg |
|
PereFyss 2022
Syt vyyle Joor sinn mir drei underwäggs als PereFyss,
Jetz driffts au uns, das bleede non-binääre Gschlächter-Gschyss,
S Glyychstelligs-Amt verlangt vo uns im Äärnscht – herjeemynee,
Statt PereFyss als neie Naame: Pere-LGBT!
En Ärbsli-Beenli-Hirse-Tofu-Gschnätzlets – sträng vegan,
Das schmeggt noch Hobelspöön und Karton, gmischt mit Lääbertran, Doch uss de Räschte losst sich wunderbaar e Larve glaischtere,
Und no der Fasnacht – uffkocht – kasch di näggschte Bsuech
begaischtere!
Der Otti sait zem Lotti: «En Erinnerig vo dir wott y!
Kumm stand do nääbe mii, y schiess vo uns e Selfie-Foti.»
Doch wird nyt uss däm Foti mit em Otti und sym Lotti,
Denn laider wird der Otti iiberfaare vomene Drotti!
O Basel-Stadt, o Stadt vo Wält, mit verdraimte Blätzli,
Wo Veegel pfyffe, Kinder spiile, wo d haimlig driffsch di Schätzli,
Im Lange Loo und Birmannsgass, Spaalebäärg und Wyylerstääg,
Gämpestrooss und Stainegraabe, Koolebäärg und Ulmewääg,
Au Amsel-, Drossel-, Fingge-, Starestrooss und Hächtliagger,
Das sinn die paar Stroosse, ooni Baustell, ooni Bagger!
Lueg unseri siibe Bundesrööt – e Helge wunderscheen,
Wie die verloore uff der Schwyzerkarte umme steen,
Do gseesch, wurums bim Bundesroot scho lang nimm vorwärts goot,
Dasch will der aint em andere bleed uff der Laitig stoot!
D Doppelhaltstell isch passé – e Schnapsidee vo der BVB!
Der voll Erfolg kasch sofort gsee: dangg Drämmlistau lauft
gar nyt mee.
E grieni Wand duet s Läädele syt denne staargg erschweere,
Wottsch am Märtblatz iber d Gleis, muesch an Aescheblatz go keere!
O Schwyzerland, o Heimatland, wo Biinli seelig summele,
Heersch Giggel graaie, Grille ziirpe, Hummele umme brummele,
Scheeffli graase näbedraa, gseesch Kinder Lämmli stryychle,
Und d Alpekälber zien in d Stadt mit iire drümmlige Tryychle!
Kuum isch s Verbott ewägg, do wimmlets in der Stadt vo dääne,
Si hogge iiberaal und bättle, s het Hunderti Rumääne,
Scho kunnt e neis Verbott, do geen d Rumääne wiider hai,
Jetz bättle die uss Lieschtel z Basel wiider ganz elai!
Der Glyymaa-Schwuurbler Beat Jans isch voll im Elemänt,
Är schnuurt und schnuurt und schafft nit vyyl, dasch si Tämpramänt.
Fir d Umwält kämpft är schyynts, proleetet umme, s laufi prima,
Los Beat, waisch denn nit, au heissi Luft belaschtet s Glyymaa!
O Basel-Stadt, o Stadt vo Wält, o Stadt voll offne Stroosse,
Wo Veegel pfyffe, Kinder spiile, die Grosse s Velo stoosse,
In der Winter-, Herbscht- und Summergass und bi der Schitzematte,
Au Amsel-, Drossel-, Finggestrooss – nei gstaltet mit Rabatte,
Was isch denn äggscht an alle däne Blätz und Stroosse s Bsundere,
Wenn d pressiersch, kasch do die letschte Parggblätz no bewundere.
e-Auti und e-Velo, die dien kuum der Umwält schaade,
Derfir muesch das Eleggtro-Zyyg allewyyl nei laade.
Mir drei laufe mit Musggelgraft dangg unsere satte Waade,
Und drotzdäm geen au mir ganz gärn emoole ain go laade.
E Primat, dä sait zem andere: «Scheen deerfe mir soo blyybe,
Stell dir vor, sunscht miesste mir jetz rächne, lääse, schryybe,
Uff aimool wiirsch Regierigsroot und denn muesch di bewääre,
Will du der Eschter Käller alles fimf Mool muesch erglääre!»
Joo s Anschi Merkel hets verdient, äs goot in Ruestand,
Doch wyt und breit gitts kai Ersatz im ganze Schwoobeland.
Die beschti Leesig wär, si liesste s Anschi nomool draa,
Mir wintsche-n-is jo – statt däm Jans – au wiider d Aggermaa!
D Medallie-Spiegel vo der Schwyz: siibe Männer, zwanzig Fraue,
Wurum kasch denn verglemmi uff uns Manne nimme baue?
Jo d Zyt firs Dreening fäält is halt, sälbscht wenn mir das no wette,
Miemer wäg däm Tschender-Saich duurend butze, wäsche, glette!
D Lara Guet rieft iirem Ma, nervees mit haissen Oore:
«Y glaub, y ha mi Goldmedallie irgendwo verloore!»
«Was dasch di Medallie gsi, ha si entsorgt, ych Tschooli,
S hett ussgsee wie der Deggel vonere Biggse Raviooli.»