Bebbi BänggBasler Schnitzelbägg |
|
PereFyss 2023
An däm Schwingfescht z Prattele, hetts is fascht ebbis gää:
Hesch Fläsche harrasswyys in die Arena derfe nää,
Im Joggeli isch das verbotte, si filze Segg und Däsche,
Doch drotz Kontrolle findsch uff em Raase lutter lääri Fläsche!
Das Foti vom neie Bundesroot wirggt farbloos, faad und kiel:
Die drei Dytschschwyzer steen, numme die andere vier hänn Stiel.
Es herrscht e myysi Stimmig und me macht e suure Stai,
Und d Herzog hoggt mit iirem suure Stai elai dehai.
Gege d Gliimaa-Erweermig gläbbt sich d Sarah muetig uff e Strooss,
In dääre kalte Winternacht interessiert das niemerts grooss,
D Sarah friert die ganzi Nacht vo de Zeeche bis an d Oore,
Do tscheggt si: «Nur dangg däm warme Gliimaa bin y nit verfroore!»
E jeede zwaite Basler maint, d Regierig syygi z grooss,
Statt siibe, fimf Regierigsrööt, das wääri doch grandioos,
Weeli zwai as uuse miesste, das entschaidet s Loos.
Doch Hand uffs Härz, es blyybe fimf, s Brobleem wiirsch so nit loos.
Der Infantino findet sy Begriessig originell:
«Heut‘ fühl ich mich behindert und auch homosexuell!»
D Behinderig isch gaischtig, dä gueti Maa isch doch debil!
Do winscht me sich der Blatter zrugg, dä isch stabil senil!
S nei Bio-Zentrum koschtet hundert Kischte mee als blaant,
Gar niemerts hett bim Bio-Zentrum dää Bio-Flop eraant.
Syygs Bio-Zentrum, Bio-Baggstai, Bio-Medizin,
Bio-Händy, Bio-Windle, Bio-Aschbiryyn,
Bio-Dingsbums oder Bio-Antibiotikum,
Kaufsch Bio yy, leggsch immer druff – und kaine waiss worum!
Drotz unserem Soziaalstaat gitts soziaali Heertefäll:
Hett ain e Frau, vier Kinder und kai Job, no goots ganz schnäll,
Verdient kai Gäld me, duet der ganz Daag nummen ummegammle,
Är raist au nimm – drum wämmer fir der Federer hitt sammle.
Bis zwanzigfuffzig isch die ganzi Schwyz gliimaa-neutraal,
Doch mir sinn vyyl schnäller als der Räschte – typisch Bâle.
Photovoltaigg iiberaal, au an der Roothuus-Fassaade,
Denn missisch s erscht Mool positivi Spannig in däm Laade.
Pro Wuche griegt e jeedes Kind mindeschtens ai Leggtioon,
In Legasthenie, Logopädie, Dyskalkulie, Bulimie, Orthografie,
Schizophrenie – däm sait me In-te-gra-ti-on.
Der Fritzli rieft: «Ha d Schnauze voll, ych will nit hogge blyybe,
Statt integriere wott ych wider rächne, lääse, schryybe!»
Mir sinn die drei Dschender-Freaks, jo Matscho-Feminischte;
Bi Frauefindligkait dien mir is konsequänt entrischte!
Uff butze, wäsche, glette, do verzichte mir ganz stuur,
Mir sinn geege d Aaeignig vo Huusfraue-Kultuur.
Drotz Hamschterkäuf und Subvenzioone – «Hakle» hetts verbloose.
Im Ärnschtfall bruuchsch Babyyr-Ersatz, denn sunscht goots
voll in d Hoose,
Bruuch BaZ, Bligg, Tagi, NZZ, bis s Fiidle aafoot schimmere,
Bass uff, ass d nit die Lätzi nimmsch, d Wältwuche wurds
verschlimmere!
Der Gipser Schorsch schafft hitt als Leerer, s haig iin aifach graizt,
Will är nit druss kunnt, hett är scho fimf Klasse voll verhaizt.
Au d Spidäler sueche Queeryystyyger, zum s Gsundhaitswäse rette,
Scho steen e Huffe Metzger aa, wo operiere wette.
Wäg däm Grieg kasch dir hitt d Energyy fascht nimmi laischte,
Benzin und Gas schleen duurend uff, bim Stroom spyyrsch es
am maischte,
Losch s Auti stoo, stellsch d Haizig zrugg, s dryybt di fascht in Ruin,
Doch noch wie vor für zwanzig Stutz fliegsch «easy» uff Berlin.
Wenn iir jetzt unsere Zeedel grieged, wärded iir s erfaare,
Dä isch vyyl dünner, brüchiger – au mir hänn afoo spaare,
D Babyyr-Recycling-Energyy kunnt vo Wassergraft und Sunne,
S Babyyr, das hämmer uss yygstampfte CS-Aggzie gwunne.