Bebbi BänggBasler Schnitzelbägg |
|
PereFyss 2024
Ych froog mi jingschte Soon, was är denn speeter wärde wott,
Do bin y scheen verschrogge, denn dää sait doch sapperlott:
«Das isch no komplett offe, joo d Entschaidig fallt mir schwäär,
Und bis y waiss, eb Maa, eb Frau, blyyb ych no non-binäär!»
Dittige, Bämbel, Lauel, Zwinge, Duggige und Tennike,
Titterte, Hobel, Liedertswil, Nusshof, Buus und Hemmike,
Ormalinge, Häfelfinge – s isch druurig und s duet wee,
Geegen all die Deerfer spiilt näggscht Saison unsere FCB!
Den Innerschwyzer mache d Gsundhaitskeschte gar nid wee,
Denn alli Buure wääle deerte numme SVP,
Sälbscht kurz vor em Veregge goot bigoscht kai Sau ins Spittel,
Denn dääne stegge zvyyl Ussländer in de wysse Kittel.
Dangg «Hightech» dauche d Amis dief und fliege hoch ins All,
Wenn d Technigg straiggt, verjagts das Baschtelzyyg mit luttem Gnall.
Jetz miesst me doch em Donald Trump – rächtzytig vor de Waale,
En Adventure-Dauchgang zur Titanic aabe zaale.
Es duurt und duurt und duurt und duurt – aber nyt basiert,
Erscht in Minute säggsefuffzig isch är explodiert.
Dä harti Ziircher Grind blybt s letscht Joor fascht e Stund intaggt,
Vyyl schnäller als dää Böög hetts z Ziiri d Credit Suisse verjaggt!
Die hoche Granggekassekeschte gfäärden Exischtänze,
Derfir kasch alles kinschtlig haa, doo gitts fascht kaini Gränze:
Syygs Härz und Niere, Buuse, Lippe und au jeedes Glängg,
Wenn d alles zämme mache losch, griegsch neii Zeen als Gschängg,
Dablette frissisch geege z hoche Bluetdrugg und Demänz,
Viagra-Pille staigere bi laame Schwänz d Potänz,
Die neischte Yygriff, die sinn reserviert fir d Brominänz:
Do gäbtis fir d Baume-Schneider doch die kinschtlig Intelligänz!
Sytt fuffzää Joor verdaile mir die scheene griene Zeedel,
Die Griene hänn is gsponseret, mir finde das zwoor eedel.
Doch noo de letschte Waale dunggt is grien nimm opportuun,
Nei sponseret is d SVP, drum sinn jetz d Zeedel…..
…allewyyl no grien!
D Luft flimmeret, y lauf fascht uss und ha ganz schwääri Bai,
Ha Durscht, ka nimm glaar dängge und wott schleunigscht wider hai.
Kai Baum, kai Struuch, kai Grien, kai Mensch, was isch do numme los?
Nyt bsunders, dasch e Summerdaag in der Freie Strooss.
Gseesch alli in iir Händy bysse, drum hämmer is gfroggt,
Was isch mit dääne Type los, sinn die vom Hunger bloggt?
Die neischti KI-Äpp kaa tolli Sache sälber leere,
Jetz losst sich s Smaartfoon anhand vom Mundgruch mit aim Biss
entspeere.
Es lauft fascht dääglig eppis schief im Europapargg in Ruscht,
Denn Baan um Baan um Baan blybt stoo, es isch e Riisefruscht!
Hoggsch stundelang im Wäägeli und s Fiidle macht dir wee,
Die bruuche dängg die glyyche Schiine, wie unsri BVB!
D Fasnacht, die drei scheenschte Dääg – glaubed iir doo dra?
Ischs s Drummle, Pfyffe, Schränze, Bänggle, wod nie gnueg kasch ha?
Es muess no ebbis anders gää, denn s Volgg, das strömt in Schaare:
He joo, de wiirsch drei Dääg lang vo kaim Drotti iberfaare!
Noo de Waale frogsch di, wie so eppis kaa basiere,
Ass d Sibel Arslan wyterhii uff Bärn darf go parliere.
Au wenn si deerte nyt bewegt, dients eme guete Zwägg,
Solang si vyyl uff Bärn raist, hämmer si doo z Basel wägg.
S isch biirewaich, das Waalkampf-Filmli vo der SVP:
«Danzed mit der SVP, danze duet doch niemertem wee!»
Der Danzschritt kasch dir aifach mergge, s bruucht nid vyyl Verstand,
S gitt numme vorwärts, ruggwärts, linggs – rächts goot nit, dert kunnt
d Wand!
Wenn d hitte goosch go wandere in unsre Schwyzer Alpe,
Bass uff, sunscht duesch diräggt uff e Sunnekolläggter tschalpe.
Aadie Alperoose, aadie Kälbli und Kueflaade,
Derfir kasch jetz uff jeeder Alp di Handy nei ufflaade.