Bebbi BänggBasler Schnitzelbägg |
|
PereFyss 2025
Die Dytsche, die hänn d Schnauze voll und mache d Gränze dicht,
Wänn kaini fremde Fetzel mee – Migrante, Beesewicht.
Leend is au unsri Gränze schliesse, s wär bigoscht kai Saich,
Schtell dir vor, kai Druggede am näggschte Morgestraich.
Läb gsund, iss numme Gmies und Fricht, Siesses isch passé,
Dryyb ganz vyyl Sport und schloof joo gnueg, statt Alkohol dringg Tee.
Bisch wirgglig konsequänt, derno läbsch hundert Joor und mee,
No kasch hundert Joor lang vor dym Huus die glyychi Baustell gsee.
D Wält gheit uss de Fuegen und es rischten alli uff,
S Glyyma isch kai Theema mee, das macht is richtig muff!
D Entwiggligshilf wird gstriche, denn d Armee bruucht vier Milliaarde,
Derbyy hänn mir doch d SVP mit iire Hellebaarde.
Wyt iiber dausig Missbruuchsfäll hänn si zletscht byychte miesse,
In Schaare renne d Scheefli fuurt, jetz mien si sälber biesse.
Der Dopf und d Kiirche blyybe läär, si mien Gotteshyyser schliesse,
D Mariiebildli griegt d Ameti, si bruucht si zum druff schiesse.
Wottsch s Auti uff Allmänd parggiere, koschtets e paar Lappe,
«Die spinne jo, das bringt mi um!» soo joomeret der Babbe!
Doch jetz isch Schluss, mir styygen um, dien zimftig inveschtiere,
In e Säggsblatz-Kischtevelo, no kasch iiberaal wild parggiere.
Fimfdausig Lyt samt Bundesroot kasch uff däm Bild bewundere,
Au mir, samt Mamme, sinn do druff, dasch an däm Helge s Bsundere,
Trotz Sueche finde mir is nimm, dasch druurig aber woor,
Denn unsers Foti wird verdeggt vom Jans sym linggen Oor.
Das Groossmuul Trömp läbt offesichtlig allewyyl in Gfoor,
Doch hett dä Schitz nit suuber braicht, drifft numme s rächten Oor.
Är haig zwoor gnau in d Mitti zyylt mit Brezisioonsfärnroor,
Doch s Hirni kasch kuum dräffe, denn s isch halb so gross wie s Oor.
Die grieni Faarb vo unsrem Zeedel – s wird eich interessiere,
Hänn mir uss Dubai-Pischtaazie-Schoggi kenne deschtiliere,
Non em Lääse kasch en röllele und ganz ooni Bedängge,
Mit Schlagraam gfillt, als Pâtisserie, der Schwiigermamme schängge.
Doo letschti simmer iber d Brugg ins mindere Basel gloffe,
Sinn in der Linde yykeert und hänn deert e Kaffi gsoffe.
Sinn wyter denn ins Hirschenegg, hänn kurz e Bierli gnoo,
……………..……………………….. wider zuen is koo.
Ungarn, Eeschtriich, Poole, bi de Schwoobe d AfD,
D Amis hänn dä Trottel Trömp, mir Schwyzer d SVP:
«D Migrante muess me remigriere!» heersch si lamentiere,
All dääne Veegel muesch der rächti Fliigel amputiere!
Basel waggst in Himmel, joo das isch die neischti Moode,
Es schiessen in der ganze Stadt Hoochhyyser uss em Boode.
S stoot ai Glotz näbem andere, duet s Stadtbild bees versaue,
Doch drunder darfsch verdeggel nid emool ai Dunnel baue.
Als Muschterschieler setze aimool mee mir schwyzwyt Zaiche:
Will mir vyyl friener als die andere «Netto Null» erreiche!
Doch zum das Zyyl erreiche, bruuchts Verzicht und das duet wee,
Kai Flugi, kai Auti, kai Zug – nai muesch z Fuess an ESC.
Hesch Schwiirigi, Schwachi in der Klass, no isch das «Inklusioon»,
Inzwische tscheggts ejeede, Inklusioon – dasch Illusioon!
S gitt wider glaini Sonderglasse, fir die wo s sunscht nit goot,
Doch deerfsch nit z vyyl erwaarte, gseeschs jo bim Regierigsroot.
Wenn iir jetz unsere Zeedel grieged, bassed gfelligscht uff,
Denn das Joor hetts en Unterschrifte-Booge hinde druff:
Mir sammle Stimme, filled uss, fir was wisse mir nit;
Das isch jo wurscht, solang s fir uns pro Stimm e Zääner gitt.