Bebbi BänggBasler Schnitzelbägg |
|
Rollaator Röösli 2017
Y ha my Brief Fründin bsuecht mit Name Olga
Sy durnt im Daame Sportverein Dynamo Wolga
Ha iihri Zaahnbaschta brobiert, gschmeggt hetts no legger
Jetz han y Äärm, verglemmi, wie dr Schwarzenegger
Hoggt e Leu uff e Tiiger, gits häärzigi Liiger
Gumpt e Schoof uff e Geissli, gits syydigi Scheissli
Aber Achtig: nit jeedi Paarig bringt au Glügg:
Grüze Sy jo kei Heidi mit ere Mück
Won y do letschti bi go Gonfi hoole z St. Louis
schlöön 15 Waggis Zöllner uff e Velofaarer yy,
"Dasch kei Droogegäld", schreyt dä, "Ne tirez pas!!
...Je m'appel Wessels
und bring s Gäld fürs Drämmli Trois"
Vom Doggter Morin liebi Griess, äär syg baraat:
„Ha acht Joor Cüpli gsoffe, zaalt hett daas dr Staat
und in de Pfläägeheim die Alte us-spioniert
Dasch jetz my Kundestamm. Merci, bi saniert“
E gleine Dambuurmaioor, zwei Schugger in Zivil
E Schwoob mit Blastiggläärvli, dr Dani Vo Wattewyl
Vier Ladäärnedrääger, im Miville sy Höörgräät, e Schääse,
drey Voordrääbler, im Armin Faes sy digge Ranze
…das hätt me alles au no uff d Blagette könne schtanze
Won y do letschti so my Luxusfüüdle bschau
im Kosmeetigg Spiegel vo unde häär genau
mit em Vergröösserigs Glaas, do dunggt s my neume duure
das Gschmeus bewegt sich wie im Donald Trömp sy Schnuure
Im neue Film vom Winnetou wird nit taktiert
und dr korrupti, böösi Sheriff – ZACK – skalpiert
Mit Skalpiere hätte mir s in Basel schwäär
Im Baschi Dürr sy Köpfli git do z weenig häär
Y han e Rolle welle in dämm neue Winnetou
Jo eso als Indianermaitli oder Geischt vom Manitu
Dä vom Casting rieft (schwööbele: ) „Mensch, ein Naturtalent!
Schön, dass mer endlich jetzt en olde Tschettere hend“
In dr Migros gits jetz Supradyn als Brause
und Hormoontablette für myni Menopause
Antibiotika für Maage, Daarm und Grind
Also wie bim Kauf vo zwei Pfund Ghaggts vom Rind
Wenn dr Dylan Bob d Nobälbryys Fyyr vermyydet
und deheime lieber d Zeecheneegel schnyydet
ka daas dr Katzmaa Bo esoo nid rächt verstoo
Är wurd jo nid emol Prix Garantie bykoo
Si, dä vo Wattewyl isch Zoobe im Mimöösli
an jeed‘re Tombola Hundsverlochete mit Löösli
im Telebasel spoot, im Basilisgg Radio frieh
Nur wenn y e Schuumbaad nimm, denn kunnt dä Seggel nie
Uff em Claraboschte frog y „Bitteschöön,
wird me do gschützt als alti Frau vor Horror Glöön?“
Do sait dä Schugger, also s haut my us de Fuege
„S zwingt Sy jo niemerts, zem Almi&Salvi luege“
Z weenig Gmies und gsundi Frücht, liis ich im Bligg
ässe d Schwyzer, drumm isch jeede zweite z digg
Yych iss halt Kiirsi vyyl, us em Trudeli sym Gaarte
als Vitamyyn in jeedem Stügg Sturtzwälder Schwaarte
Ruedi: Und wyteri Kiirsi, sy bruucht zwaar e Wyyli
gnüüblet sy us de Mon Chéri-li
Unsre Azubi, dr Abdul Ben Karim
(är isch Dambuurmaioor bi de Vereinigte Muslim)
wott jetz vor Gricht goo, duet sich fanaatisch yynesteigere
wel s Fasnachts Comité dr Handschlaag wurd verweigere
Voor em Spaaledoor do wäär ich alti Nuss
fascht überfaahre woorde vom Panoraama Buss
Bi heftig gstollperet, mit em Grind in 3er dütscht
Si, aber dä Pokémon, dä han y no verwütscht!
Si, was ligt do wien e Suppehuehn am Boode?
Es isch dr Vögele: gstutzti Flüügel sinn jetz Moode
Dämm syni Lümpe wird y sicher nit vermisse
Do hätt y lieber no e Glaidersagg uffgrisse
7 Blaneete, mälde d Wältruum Agentuure
Hett me gfunde mit brimitiivschte Läbens Spuure
Uff em Hinterschte, s isch doo nit guet z erkenne
ka me gseeh, wie sy grad e Böögg verbrenne
