Bebbi Bängg

Basler Schnitzelbägg

Rollaator Röösli 2015

Also jetzt feertig gschnuurt umme heisse Brey:
Si göön doch au go luege, das “Fifty Shades of Grey”
Jo, s Kino Rex zeigt schyyns als granggi Perversioon
sogaar e Fassig in Züüridütsch Synchroon

Dr Dalai Lama reedet – Si, dä hett denn Charme
Är bruuchi weenig, wel är erlüüchtet syg und aarm
Denn kunnt dr Morin, wo elegant dr Booge schloot:
Är syg dr aarm Lüüchter vom Regierigsroot

Geschter roll y duur e Zolli ins Vivaarium
und stand ellei vor ‘mene druurigen Aquaarium
Deert frisst e Haifisch oohni Zeehn e Maagerquaargg
Das isch vom EHC no schyyns dr letschti Shaark

Wemmer im Altersheim dien Karaoke singe
duen ich immer gäärn d Helene Fischer bringe
Aber bim letschte Mool isch s völlig abverheyt
Do sinn bim Refrain myni Zeehn uff d Büühni kheyt

Y han e Lyschte gmacht mit Hilf vo de Regierige
vo ganz ruggsichtsloose Terror Gruppierige
Was do no fäählt, denn wäär die Lyschte picobello
isch s ganze Lumpephagg z Basel uff de Velo

Unsri BVB, die muess me eifach loobe
Die mache dr Yykauf zem Erlääbnis bi de Schwoobe
Y stegg dr Rollaator - zack - ins Gleis, s isch amme geil
Denn kunnt dr 8er und dä stoosst my bis uff Weil

Dä staarggi Frangge freut my Schwoobe Pflääger Jens:
"Da nehm ich 12 % mehr Lohn über die Grenz"
Si, zem Usglyych vo dr Kaufgraftparitäät
Loss y s jetzt laufe, au wenn s uff s Hyysli länge däät

Hütt am Moorge, am fünf ab halber Elfi
do schiggt dr Geri Müller mir das Selfie
(Helge: e Bild vo sym …! Anm. d. R.)
Si, y ha s Händy uff alli Syte miesse drülle
Y hätt en fascht nit kennt oohni syni Brülle

Y bi an Källerabstiig – ha Medizin bruucht für my Maage
Irgendwenn hetts my in e jääses Loch verschlaage
S hett kuum Liecht kaa, alli sinn blau gsi…bis y check:
y lig jo in ere Deponie für Bebbi Segg

Uff em Höörnli frässe d Reeh, s gooht mer uff d Latte
mym Unggle Eugen jeede Maie ab dr Blatte
Die stilli Revanche, s freut my jeedes Mool e bitzeli
kunnt in dr Friidhoofs Baiz, döört bstell y denn Reehschnitzeli

Mit de graue Panther simmer uff em Rhyy gö Söörfe
Guet, bi dämm Pegelstand hätte mer eigentlig nit döörfe
Y ha nit uffbasst, s git e Dätsch, y gspüür e Zugge
und dä Schlappe mit em Kiis ligt uff em Rugge

Sy hänn im Wessels e neus Hüftglängg implantiert
Jetzt isch er sälber au zer Groossbaustell mutiert
Ich saag, daas hesch dervoo, wenn d uff de Schweedereise
zu Laschte Speeserächnig s Beggi losch lo greise

 


Quelle: Youtube Kanal der Tageswoche